ഇന്ത്യൻ ക്രിക്കറ്റ് താരം സഞ്ജു സാംസണെ ഡൽഹി സർക്കാരിന്റെ പ്രധാനപ്പെട്ട യുവജന ശാക്തീകരണ പദ്ധതിയായ ‘ജൻ കൗശൽ കേന്ദ്ര’യുടെ ബ്രാൻഡ് അംബാസഡറായി പ്രഖ്യാപിച്ചു. ഇന്നലെ ഡൽഹി സെക്രട്ടറിയേറ്റിലെത്തിയാണ് താരം മുഖ്യമന്ത്രി രേഖാ ഗുപ്തയുമായി കൂടിക്കാഴ്ച നടത്തിയത്. ഡൽഹി മോത്തി നഗറിൽ പ്രവർത്തിക്കുന്ന ജൻ കൗശൽ കേന്ദ്രയുടെ ഔദ്യോഗിക പോസ്റ്ററും മുഖ്യമന്ത്രിയും സഞ്ജുവും ചേർന്ന് ചടങ്ങിൽ പുറത്തിറക്കി. ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള ആധുനിക ഡിജിറ്റൽ സാങ്കേതിക വിദ്യകളിലും മറ്റ് തൊഴിൽ മേഖലകളിലും ഡൽഹിയിലെ യുവാക്കൾക്ക് പരിശീലനവും സ്വയംപര്യാപ്തതയും നൽകുക എന്നതാണ് ഈ പദ്ധതിയുടെ പ്രധാന ലക്ഷ്യം.
യുവതലമുറയ്ക്ക് വലിയ തോതിൽ പ്രചോദനമാകുന്ന സഞ്ജു സാംസണെ ഈ ദൗത്യത്തിലേക്ക് തെരഞ്ഞെടുക്കാനായതിൽ അഭിമാനമുണ്ടെന്ന് ഡൽഹി മുഖ്യമന്ത്രി രേഖാ ഗുപ്ത വ്യക്തമാക്കി. താൻ ക്രിക്കറ്റ് കരിയറിന്റെ ആദ്യകാലം ചിലവഴിച്ച ഡൽഹി നഗരവുമായുള്ള ആത്മബന്ധം സഞ്ജുവും ചടങ്ങിൽ ഓർത്തെടുത്തു. കായിക രംഗത്തെ മികച്ച വിജയങ്ങൾക്കൊപ്പം സാമൂഹിക പ്രതിബദ്ധതയുള്ള ഒരു വലിയ പദ്ധതിയുടെ ഭാഗമാകാൻ സാധിച്ചതിന്റെ ആവേശത്തിലാണ് സഞ്ജുവിന്റെ ആരാധകരും കായിക ലോകവും. സഞ്ജു സാംസൺ ഡൽഹി ബ്രാൻഡ് അംബാസഡറായി ചുമതലയേറ്റ ഈ പുതിയ ചുവടുവെപ്പ് അദ്ദേഹത്തിന്റെ കരിയറിലെ മറ്റൊരു സുപ്രധാന നേട്ടമായി മാറിയിരിക്കുകയാണ്.
