ഏഷ്യന് കായിക മാമാങ്കത്തിന് ഇന്ന് ജപ്പാനിലെ ഐച്ചി-നഗോയയില് ഔദ്യോഗികമായി തുടക്കമാവുകയാണ്. ലോകമെമ്പാടുമുള്ള കായികപ്രേമികള് ഏറെ ആകാംക്ഷയോടെ കാത്തിരിക്കുന്ന 20-ാമത് ഏഷ്യന് ഗെയിംസിന്റെ ഉദ്ഘാടനച്ചടങ്ങ് ഇന്ന് പ്രാദേശിക സമയം വൈകുന്നേരം 6 മണിക്കും (ഇന്ത്യൻ സമയം വൈകുന്നേരം 2:30-നും) പലോമ മിസുഹോ സ്റ്റേഡിയത്തിൽ നടക്കും. ജപ്പാന് ഏഷ്യന് ഗെയിംസിന് വേദിയാകുന്നത് ചരിത്രത്തിൽ ഇത് മൂന്നാം തവണ മാത്രമാണ്.
കഴിഞ്ഞതവണ ഹാങ്ചൗവിൽ നേടിയ 107 മെഡലുകളുടെ റെക്കോർഡ് നേട്ടം മറികടക്കാനുള്ള ശക്തമായ തയ്യാറെടുപ്പിലാണ് ഇത്തവണ ഇന്ത്യയുടെ കായിക സംഘം. ഉദ്ഘാടനച്ചടങ്ങില് ഇന്ത്യയെ നയിക്കാനും പതാകയേന്താനുമായി ഒളിമ്പിക്സ് മെഡൽ ജേതാവ് മനു ഭാക്കറിനൊപ്പം പ്രമുഖ കബഡി താരം പവന് സെഹ്റാവത്തുമുണ്ട്. അവസാന നിമിഷത്തെ മാറ്റങ്ങളെത്തുടർന്നാണ് പവന് സെഹ്റാവത്ത് ഈ ദൗത്യത്തിലേക്ക് എത്തിയത്.
വനിതാ ഷൂട്ടിംഗ് താരം മനു ഭാക്കറിന്റെ നേതൃത്വത്തിലുള്ള സംഘവും, പി.വി. സിന്ധു, മിരാഭായ് ചാനു തുടങ്ങിയ പ്രമുഖരും ഇത്തവണ ഇന്ത്യയുടെ മെഡൽ പ്രതീക്ഷകളില് മുന്നിലുണ്ട്. 45 രാജ്യങ്ങളില് നിന്നുള്ള കായികതാരങ്ങള് 43 വ്യത്യസ്ത ഇനങ്ങളിലായി മാറ്റുരയ്ക്കുന്ന ഈ മേള ഒക്ടോബർ 4 വരെ നീണ്ടുനില്ക്കും. ഗെയിംസിന്റെ തത്സമയ സംപ്രേക്ഷണം സോണി സ്പോർട്സ് നെറ്റ്വർക്കിലൂടെയും സോണി ലിവ് ആപ്പിലൂടെയും ഇന്ത്യയില് ലഭ്യമാണ്.
