ഇന്ത്യന്‍ ക്രിക്കറ്റില്‍ രോഹിത് യുഗം വരുന്നു; ട്വന്‍റി20 ലോകകപ്പിന് ശേഷം വിരാട് കോഹ്ലി നായക സ്ഥാനം ഒഴിയുമെന്ന്
September 13, 2021 4:44 pm
0
ന്യൂഡല്‍ഹി: ട്വന്‍റി20 ലോകകപ്പിന് ശേഷം വിരാട് കോഹ്ലി ഇന്ത്യയുടെ ഏകദിന, ട്വന്‍റി20 ടീമുകളുടെ നായക സ്ഥാനം ഒഴിയുമെന്ന് റിപ്പോര്‍ട്ട്. ഓപണറും ഉപനായകനുമായ രോഹിത് ശര്‍മയാകും പുതിയ നായകന്‍.
ബാറ്റിങ്ങില്‍ കൂടുതലായി ശ്രദ്ധ കേന്ദ്രീകരിക്കുന്നതിനായി കോഹലി നായക സ്ഥാനം ഒഴിയുമെന്ന് ബി.സി.സിയുമായി അടുത്ത ബന്ധമുള്ള വ്യക്തികളെ ഉദ്ധരിച്ച്‌ ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.
നിലവില്‍ 32കാരനായ കോഹ്ലിയാണ് മൂന്ന് ഫോര്‍മാറ്റിലും ടീം ഇന്ത്യയെ നയിക്കുന്നത്. ഏറെ നാളായി കോഹ്ലി ഇതുസംബന്ധിച്ച്‌ ബി.സി.സി.ഐയുമായും രോഹിത്തുമായും ചര്‍ച്ച ചെയ്യുന്നതായി റിപ്പോര്‍ട്ടില്‍ പറയുന്നു. 2014ല്‍ ആസ്ട്രേലിയയില്‍ വെച്ച്‌ ധോണി ടെസ്റ്റ് നായക സ്ഥാനം ഒഴിഞ്ഞതോടെയാണ് കോഹ്ലി നായക സ്ഥാനത്ത് അവരോധിക്കപ്പെട്ടത്. 2017ലാണ് മൂന്ന് ഫോര്‍മാറ്റിലെയും നായകനായത്.
65 ടെസ്റ്റ് മത്സരങ്ങളില്‍ ഇന്ത്യയെ നയിച്ച കോഹ്ലി 38 മത്സരങ്ങളില്‍ ഇന്ത്യയെ വിജയത്തിലെത്തിച്ചു. കോഹ്ലിക്ക് കീഴില്‍ കളിച്ച 95 ഏകദിനങ്ങളില്‍ 65ലും ഇന്ത്യ വെന്നിക്കൊടി പാറിച്ചു. 45 ട്വന്‍റി20കളില്‍ 29ലും ഇന്ത്യക്കായിരുന്നു ജയം.
രണ്ട് ലോകകപ്പുകള്‍ മുന്നിലുള്ളതിനാല്‍ ബാറ്റിങ്ങില്‍ കൂടുതല്‍ മികവിലേക്കുയരണമെന്നാണ് കോഹ്ലിയുടെ ചിന്ത. 2022ല്‍ ട്വന്‍റി20 ലോകകപ്പും2023ല ഏകദിന ലോകകപ്പുമാണ് ലക്ഷ്യം. ടീമിലെ ഏറ്റവും മുതിര്‍ന്ന താരങ്ങളില്‍ ഒരാളായ രോഹിത്ത് ശര്‍മയും മികച്ച ഫോമിലാണ്.
ഐ.പി.എല്ലില്‍ മുംബൈ ഇന്ത്യന്‍സിനെ തുടര്‍ച്ചയായി കിരീട ജേതാക്കളാക്കുന്ന രോഹിത്തിന്‍റെ ക്യാപ്റ്റന്‍സി മികവിനെ കുറിച്ച്‌ ആര്‍ക്കും വിശദീകരിച്ച്‌ കൊടുക്കേണ്ട കാര്യമില്ല. കോഹ്ലിയുടെ അഭാവത്തില്‍ 10 ഏകദിനങ്ങളില്‍ രോഹിത്തിന്‍റെ കീഴില്‍ ഇറങ്ങിയ ഇന്ത്യ എട്ടെണ്ണത്തിലും വിജയിച്ചു. 19 ട്വന്‍റി20കളില്‍ 15ലും വിജയിച്ച ഇന്ത്യ നാലെണ്ണത്തില്‍ മാത്രമാണ് തോറ്റത്. ഐ.പി.എല്ലില്‍ 123 മത്സരങ്ങള്‍ നയിച്ച രോഹിത്ത് 74 മത്സരങ്ങളില്‍ വിജയിച്ചു.
2018ല്‍ ശ്രീലങ്കയില്‍ നടന്ന നിദാഹസ് ട്രോഫിയും യു.എ.ഇയില്‍ നടന്ന ഏഷ്യ കപ്പും രോഹിത്തിന്‍റെ കീഴിലാണ് ഇന്ത്യ സ്വന്തമാക്കിയത്. 2013, 2015, 2017, 2019, 2020 വര്‍ഷങ്ങളില്‍ മുംബൈ ഇന്ത്യന്‍സിനെ ഐ.പി.എല്‍ കിരീടത്തിലേക്ക് നയിച്ച രോഹിത്ത് ടൂര്‍ണമെന്‍റ് ചരിത്രത്തിലെ ഏറ്റവും മികച്ച നായകനായാണ് വിലയിരുത്തപ്പെടുന്നത്. ട്വന്‍റി20 ലോകകപ്പില്‍ മെന്‍ററുടെ റോളില്‍ മുന്‍ നായകന്‍ എം.എസ്. ധോണി ടീമിനൊപ്പമുണ്ടാകുമെന്നത് വലിയ ആത്മവിശ്വാസമാണ്.
