ഫസ്റ്റ്​ ക്ലാസ്​, രാജ്യാന്തര ക്രിക്കറ്റില്‍ നിന്ന്​ വിരമിക്കല്‍ പ്രഖ്യാപിച്ച്‌​ സ്​റ്റുവര്‍ട്ട്​ ബിന്നി

ഫസ്റ്റ് ക്ലാസ്, രാജ്യാന്തര ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ച്‌ സ്റ്റുവര്‍ട്ട് ബിന്നി

August 30, 2021 3:58 pm
0

ന്യൂഡല്‍ഹി: ഏകദിനത്തില്‍ ഒരു ഇന്ത്യക്കാരന്‍റെ ഏറ്റവും മികച്ച ബൗളിങ് പ്രകടനം സ്വന്തം പേരിലുള്ള ഓള്‍റൗണ്ടര്‍ സ്റ്റുവര്‍ട്ട് ബിന്നി രാജ്യാന്തര, ഫസ്റ്റ് ക്ലാസ് ക്രിക്കറ്റില്‍നിന്ന് വിരമിച്ചു. ആറു ടെസ്റ്റുകളിലും 14 ഏകദിനങ്ങളിലും മൂന്ന് ട്വന്‍റി20യിലും ഇന്ത്യക്കായി കളിച്ച 37 കാരന്‍ 2016ലാണ് അവസാനമായി ദേശീയ ജഴ്സിയില്‍ ഇറങ്ങിയത്. പിന്നീടും ആഭ്യന്തര ക്രിക്കറ്റില്‍ സജീവമായിരുന്നു.

ബംഗ്ലദേശിനെതിരെ 2014ല്‍ കുറിച്ച ഒമ്ബതു റണ്‍സിന് ആറു വിക്കറ്റ് എന്ന ഇന്ത്യന്‍ റെക്കോഡ് ഇനിയും ഭേദിക്കപ്പെട്ടിട്ടില്ല. നാട്ടുകാരനായ അനില്‍ കുംെബ്ല വിന്‍ഡീസിനെതിരെ 2013ല്‍ നേടിയ 12 റണ്‍സിന് ആറു വിക്കറ്റ് എന്ന റെക്കോഡാണ് പഴങ്കഥയാക്കിയിരുന്നത്. ആദ്യ ടെസ്റ്റില്‍ 78 റണ്‍സുമായി അരങ്ങേറ്റം ഗംഭീരമാക്കിയ താരം പേക്ഷ, ആറു ടെസ്റ്റുകളില്‍ നേടിയ ഏക അര്‍ധ സെഞ്ച്വറിയും അതാണ്. മീഡിയം പേസ് ബൗളിങ്ങുമായി ആഭ്യന്തര ക്രിക്കറ്റില്‍ ഏറെ കാലം വാണ ബിന്നി സ്വന്തം സംസ്ഥാനമായ കര്‍ണാടക വിട്ട് അടുത്തിടെ നാഗലാന്‍ഡിനൊപ്പം ചേര്‍ന്നിരുന്നു.

17 വര്‍ഷത്തിനിടെ 95 ഫസ്റ്റ് ക്ലാസ് മത്സരങ്ങള്‍ കളിച്ച്‌ 4796 റണ്‍സ് നേടിയിട്ടുണ്ട്. 148 വിക്കറ്റുകളും. 2013-14, 2014-15 വര്‍ഷങ്ങളില്‍ രഞ്ജി ട്രോഫി കിരീടംതൊട്ട കര്‍ണാടക ടീമില്‍ അവിഭാജ്യ സാന്നിധ്യമായിരുന്നു. രാജ്യാന്തര ക്രിക്കറ്റില്‍ ഇന്ത്യന്‍ ജഴ്സി അണിയാന്‍ സാധിച്ചത് മികച്ച നേട്ടമായി കരുതുന്നതായി അദ്ദേഹം പ്രസ്താവനയില്‍ പറഞ്ഞു.

മുന്‍ ലോകകപ്പ് ജേതാവ് റോജര്‍ ബിന്നിയുടെ മകനായ സ്റ്റുവര്‍ട്ട് ബിന്നി 100 ലിസ്റ്റ് എ മത്സരങ്ങളിലും 150 ട്വന്‍റി20കളിലും ഇറങ്ങിയിട്ടുണ്ട്. ഐ.പി.എല്ലില്‍ രാജസ്ഥാന്‍ റോയല്‍സ്, മുംബൈ ഇന്ത്യന്‍സ്, റോയല്‍ ചലഞ്ചേഴ്സ് ബാംഗ്ലൂര്‍ എന്നിവക്കൊപ്പവും കളിച്ചു.