ഓസീസ് താരം സ്റ്റുവര്‍ട്ട് മക്ഗില്ലിനെ തോക്കിന്‍മുനയില്‍ തട്ടിക്കൊണ്ടുപോയി; മണിക്കൂറുകള്‍ക്കു ശേഷം മോചനം
May 5, 2021 3:57 pm
0
സിഡ്നി: ആസ്ട്രേലിയന്‍ ക്രിക്കറ്റില്‍ വര്‍ഷങ്ങേളാളം നിറസാന്നിധ്യമായിരുന്ന സ്റ്റുവര്‍ട്ട് മക്ഗില്ലിനെ നാലംഗ സംഘം തോക്കിന്‍മുനയില്‍ തട്ടിക്കൊണ്ടുപോയി. മര്‍ദിച്ചവശനാക്കിയ താരത്തെ മണിക്കൂറുകള്‍ക്ക് ശേഷം വിട്ടയക്കുകയും ചെയ്തു. ഏകദേശം ഒരു മാസം മുമ്ബ് നടന്ന സംഭവം വൈകിയാണ് പുറംലോകമറിയുന്നത്. മക്ഗില്ലുമായി ബന്ധമുള്ള ഒരാളുള്‍പെടെ അറസ്റ്റിലായിട്ടുണ്ട്. സിഡ്നിയിലെ ക്രിമോണില്‍ ഏപ്രില്‍ 14നാണ് രണ്ടുപേരെത്തി ബലംപ്രയോഗിച്ച്‌ കാറില്‍ കയറ്റി കൊണ്ടുപോകുന്നത്. നഗരത്തിനു പുറത്തെത്തിച്ച്‌ മര്‍ദിച്ചവശനാക്കുകയും വെടിവെച്ചുകൊല്ലുമെന്ന് ഭീഷണിപ്പെടുത്തുകയും ചെയ്ത ശേഷം മറ്റൊരിടത്തുകൊണ്ടുപോയി വിട്ടയക്കുകയായിരുന്നു.
പിന്നെയും അക്രമമുണ്ടാകുമെന്ന് ഭയന്നാണെന്ന് പറയുന്നു, ഏപ്രില്‍ 20വരെ സംഭവം മക്ഗില്‍ പുറത്തുപറഞ്ഞിരുന്നില്ല. കാമുകി മരിയ ഓമീഘറുടെ സഹോദരന്‍ മാരിനോ സോടിറോപോളസിന് സംഭവത്തില്‍ പങ്കുള്ളതായി പൊലീസിനെ ഉദ്ധരിച്ച്‌ മാധ്യമങ്ങള്‍ റിപ്പോര്‍ട്ട് ചെയ്തു. മരിയയുമൊന്നിച്ച്‌ മക്ഗില്‍ ഒരു റസ്റ്റൊറന്‍റ് നടത്തുന്നുണ്ട്. ഇരുവരും അടുത്തിടെ പിരിഞ്ഞതായി റിപ്പോര്‍ട്ടുകള്‍ പറയുന്നു.
സാമ്ബത്തിക താല്‍പര്യങ്ങളാണ് പിന്നിലെന്ന് സംശയിക്കുന്നതായി െപാലീസ് പറഞ്ഞു. എന്നാല്‍, സംഘം മോചന ദ്രവ്യം ആവശ്യപ്പെട്ടതായി പറയുന്നില്ല. പ്രതികളുടെ വീട് റെയ്ഡ് നടത്തിയ പൊലീസ് മൊബൈല്‍ ഫോണ്‍, വസ്ത്രങ്ങള്‍, വാഹനങ്ങള്‍ എന്നിവ പിടിച്ചെടുത്തിട്ടുണ്ട്.
1988 മുതല്‍ 2008 വരെ ഓസീസ് ടീമില്‍ അംഗമായിരുന്ന സ്പിന്നര്‍ 44 ടെസ്റ്റുകളിലായി 208 വിക്കറ്റെടുത്തിട്ടുണ്ട്. സഹതാരമായി ഷെയിന്‍ വോണ്‍ മാധ്യമ ശ്രദ്ധയില്‍നിറഞ്ഞുനിന്നതാണ് മക്ഗില്ലിനെ താരതമ്യേന അപ്രസക്തനാക്കിയത്.
