ഉമ്മന്‍ ചാണ്ടിയുടെ കൈയിലുളളത് ആകെ ആയിരം രൂപ, ചെന്നിത്തലയ്‌ക്ക് 25,000 രൂപ; സ്വത്തുവിവരങ്ങള്‍ ഇങ്ങനെ
March 17, 2021 12:36 pm
0
കോട്ടയം: നാമനിര്‍ദേശ പത്രികയ്‌ക്കൊപ്പം നേതാക്കള്‍ സമര്‍പ്പിക്കുന്ന സത്യവാങ്മൂലത്തില്‍ സ്വത്തുവകകളെ സംബന്ധിച്ച്‌ നല്‍കിയിരിക്കുന്ന വിവരങ്ങള്‍ അറിയാനാണ് പലര്‍ക്കും താത്പര്യം. മുന്‍ മുഖ്യമന്ത്രി ഉമ്മന്‍ ചാണ്ടിയുടെ കാവശമുളളത് ആകെ ആയിരം രൂപ മാത്രമാണ്. ഉമ്മന്‍ ചാണ്ടിയുടെ ഭാര്യ മറിയാമ്മയുടെ കൈവശം അയ്യായിരം രൂപയും, മകന്‍ ചാണ്ടി ഉമ്മന്റെ കൈവശം 7500 രൂപയുമുണ്ട്.
ബാങ്ക് നിക്ഷേപമായി ഉമ്മന്‍ ചാണ്ടിയുടെ പേരില്‍ 67,704 രൂപയും, ഭാര്യയുടെ പേരില്‍ 24,83,092 രൂപയുമാണുളളത്. ചാണ്ടി ഉമ്മന്റെ പേരില്‍ 14,58,570 രൂപയുടെ നിക്ഷേപമുണ്ട്. ഉമ്മന്‍ ചാണ്ടിക്ക് സ്വന്തമായി വാഹനമില്ല. ഭാര്യയുടെ പേരിലാണ് സ്വിഫ്റ്റ് കാര്‍. ഉമ്മന്‍ ചാണ്ടിയുടെ കൈവശം 38 ഗ്രാം സ്വര്‍ണവും, ഭാര്യയുടെ കൈവശം 296 ഗ്രാം സ്വര്‍ണവുമുണ്ട്.
ഉമ്മന്‍ ചാണ്ടിയുടേയും, ഭാര്യയുടേയും, മകന്റേയും പേരില്‍ 74.37 ലക്ഷത്തിന്റെ സ്ഥാവര ജംഗമ വസ്‌തുക്കളുണ്ട്. 3.41 കോടി രൂപ വിലമതിക്കുന്ന ഭൂമി ഇവര്‍ക്ക് പുതുപ്പളളിയിലുണ്ട്. ഭാര്യയുടെ പേരില്‍ തിരുവനന്തപുരത്ത് 2200 ചതുരശ്ര അടിയുളള വീടുണ്ട്. ഉമ്മന്‍ ചാണ്ടിയുടെ പേരില്‍ ബാദ്ധ്യതകളില്ല. എന്നാല്‍ ഭാര്യക്കും മകനും കൂടി ബാങ്കില്‍ 31,49,529 രൂപയുടെ ബാദ്ധ്യതയുണ്ട്.
25,000 രൂപയാണ് പ്രതിപക്ഷ നേതാവ് രമേശ് ചെന്നിത്തലയുടെ പേരിലുളളത്. ഭാര്യ അനിതാ രമേശിന്റെ കൈവശം 15,000 രൂപയുണ്ട്. ഡല്‍ഹി പാര്‍ലമെന്റ് ഹൗസിലെ എസ് ബി ഐ ശാഖയില്‍ 5,89,121.12 രൂപയുടെ നിക്ഷേപമാണ് ചെന്നിത്തലയ്‌ക്കുളളത്. ഇതിനൊപ്പം തിരുവനന്തപുരം ട്രഷറി സേവിംഗ്സ് ബാങ്കില്‍ 13 ,57,575 രൂപയും നിക്ഷേപമായുണ്ട്.
ശാസ്തമംഗലം ധനലക്ഷ്‌മി ബാങ്ക് അക്കൗണ്ടില്‍ 42,973 രൂപ നിക്ഷേപിച്ചിട്ടുണ്ട്. ഭാര്യയുടെ പേരില്‍ ഡല്‍ഹി ജന്‍പഥ് എസ് ബി ഐ ശാഖയില്‍ 6,16,246 രൂപ നിക്ഷേപമുണ്ട്. അവിടെതന്നെ മറ്റ് രണ്ട് അക്കൗണ്ടിലായി 20,97,698 രൂപയും 11,99,433 രൂപയുമുണ്ട്.
ഇന്ത്യന്‍ ഓവര്‍സീസ് ബാങ്ക് പേരൂര്‍ക്കട ശാഖയില്‍ 51,367 രൂപയും ആര്‍ ഡിയായി 1,32,051 രൂപയുടെ നിക്ഷേപവും അനിതക്കുണ്ട്. ആക്‌സിസ് ബാങ്കിന്റെ കവടിയാര്‍ ശാഖയില്‍ 1,96,289 രൂപയും തൊടുപുഴ നെടുമറ്റം സര്‍വിസ് സഹകരണ ബാങ്കില്‍ 1,27,678 രൂപയും അനിതയുടെ പേരിലുണ്ട്. ഇവിടെ 4,07,312 രൂപയുടെ സ്ഥിര നിക്ഷേപമുളളതായും നാമനിര്‍ദേശപത്രികയോടൊപ്പമുളള സത്യവാങ്മൂലത്തില്‍ കാണിച്ചിട്ടുണ്ട്. വിവിധ സ്റ്റേഷനുകളിലായി എട്ടോളം കേസുകളും ചെന്നിത്തലയുടെ പേരിലുണ്ട്.
