തലശ്ശേരി സ്വദേശിനിയായ വിദ്യാര്‍ഥിനി കൊച്ചിയിലെ ലഹരിമാഫിയയുടെ പ്രണയക്കുരുക്കില്‍.! പോലീസ് രക്ഷിക്കാന്‍ ശ്രമിച്ചിട്ടും സഹകരിക്കാതെ പെണ്‍കുട്ടി; ഒടുവില്‍ വീട്ടുകാരെയും തള്ളി പെണ്‍കുട്ടി കാമുകനൊപ്പം പോയി
January 31, 2020 7:00 pm
0
തലശേരി: കൊച്ചിയിലെ ലഹരിമാഫിയയുടെ പ്രണയക്കുരുക്കില്‍പ്പെട്ട് തലശ്ശേരി സ്വദേശിനിയായ വിദ്യാര്‍ഥിനി.20കാരിയായ വിദ്യാര്‍ത്ഥിനിയെ രക്ഷപെടുത്താന്‍ എറണാകുളം തൃപ്പൂണിത്തുറ ഹില്‍പാലസ് പോലീസും തലശേരി പോലീസും നടത്തിയ ശ്രമം പെണ്‍കുട്ടിയുടെ നിലപാട് മൂലം പരാജയപ്പെടുകയായിരുന്നു . കൊച്ചി തേവര കേന്ദ്രീകരിച്ച്‌ പ്രവര്‍ത്തിക്കുന്ന ലഹരിമാഫിയയുടെ പ്രണയക്കുരുക്കിലാണ് ഇരുപതുകാരിയായ പെണ്‍കുട്ടി അകപ്പെട്ടിട്ടുള്ളത്. സ്വന്തം മാതാപിതാക്കളെയും തള്ളിയാണ് പെണ്‍കുട്ടി ലഹരി മരുന്ന് മാഫിയ തലവനൊപ്പം പോയത്.
കൊച്ചിയിലെ എന്‍ട്രന്‍സ് കോച്ചിംഗ് സെന്‍ററിലെ പരിശീലനത്തിനിടയിലാണ് പെണ്‍കുട്ടി ലഹരി മാഫിയ തലവന്‍റെ കെണിയില്‍ പെടുന്നത്. ഈ കഴിഞ്ഞ ദിവസം പെണ്‍കുട്ടിയെ കാണാതായതിനെ തുടര്‍ന്ന് മാതാപിതാക്കള്‍ നല്‍കിയ പരാതിയെ തുടര്‍ന്ന് പോലീസ് നടത്തിയ അന്വേഷണത്തിലാണ് ഞെട്ടിപ്പിക്കുന്ന വിവരങ്ങള്‍ കണ്ടെത്തിയത്. അതേസമയം നിരവധി കേസുകളിലെ പ്രതിയായ യുവാവിനോടൊപ്പം കോട്ടയത്ത് വച്ചാണ് പോലീസ് യുവതിയെ കണ്ടെത്തിയത്. ബ്രൗണ്‍ ഷുഗര്‍, എല്‍എസ്‌ഡി സ്റ്റാന്പ് ഉള്‍പ്പെടെ ഉപയോഗിക്കുകയും വില്പന നടത്തുകയും ചെയ്യുന്ന യുവാവ് ദിവസവും ഒന്‍പത് മണിക്കൂറോളം ലഹരിയിലാണെന്ന വിവരവും പോലീസിനു ലഭിച്ചു.
അമ്മ മരണപ്പെടുകയും അച്ഛന്‍ മറ്റൊരു വിവാഹം കഴിക്കുകയും ചെയ്തിട്ടുള്ള യുവാവിന്‍റെ താമസം ഇപ്പോള്‍ കൊച്ചിയിലെ ഭിന്നലിംഗക്കാര്‍ക്കൊപ്പമാണെന്ന് പോലീസ് അന്വേഷണത്തില്‍ കണ്ടെത്തി.എന്നാല്‍ യുവാവിന്‍റെ പശ്ചാത്തലം മനസിലാക്കിയ വീട്ടുകാരും പോലീസും പെണ്‍കുട്ടിയെ ഉപദേശിച്ചു പ്രണയത്തില്‍ നിന്ന് പിന്തിരിപ്പിക്കാന്‍ ശ്രമിച്ചെങ്കിലും ഫലം ഉണ്ടായില്ല. യുവാവ് ലഹരിക്കടിമയാണെന്നതും ലഹരി വില്പനക്കാരനാണെന്നതും തനിക്ക് അറിയാമെന്നും അയാളെ രക്ഷിക്കുകയാണ് തന്‍റെ ലക്ഷ്യമെന്നുമാണ് പെണ്‍ക്കുട്ടിയുടെ നിലപാട്.
പെണ്‍കുട്ടികളെ പ്രണയിച്ച്‌ വലയില്‍ വീഴ്ത്തി തങ്ങളുടെ സംഘത്തില്‍ ചേര്‍ക്കുക ഈ ലഹരി മാഫിയയുടെ പതിവാണെന്നു കൊച്ചി പോലീസ് തലശേരി പോലീസിനു നല്‍കിയ റിപ്പോര്‍ട്ടില്‍ പറയുന്നുണ്ട്.
