വാക്സിന്‍ ഇന്ത്യക്കാര്‍ക്ക് നല്‍കാതെ കയറ്റി അയച്ചപ്പോള്‍ നല്‍കേണ്ടിവന്നത് വലിയവില -കെജ്രിവാള്‍
May 26, 2021 7:36 pm
0
ന്യൂഡല്‍ഹി: വാക്സിന്‍ ഇന്ത്യക്കാര്‍ക്ക് നല്‍കേണ്ട സമയത്ത് കയറ്റി അയച്ചതിന് നല്‍കേണ്ടിവന്നത് നിരവധി ജീവനുകളെന്ന് ഡല്‍ഹി മുഖ്യമന്ത്രി കെജ്രിവാള്‍. കോവിഡ് ഓണ്‍ലൈന്‍ ബ്രീഫിങ്ങിലാണ് കെജ്രിവാള്‍ കേന്ദ്രത്തെ കുറ്റപ്പെടുത്തിയത്.
” ലോകത്ത് എല്ലാ രാജ്യങ്ങളും വാക്സിനേഷന്‍ പ്രവര്‍ത്തനങ്ങള്‍ നേരത്തെ തുടങ്ങി. എന്നാല്‍, ഇന്ത്യയില്‍ രാജ്യത്തെ ജനങ്ങള്‍ക്ക് വാക്സിന്‍ നല്‍കുന്നതിനു പകരം വിദേശത്തേക്ക് കയറ്റി അയച്ചു. വാക്സിനേഷന്‍ നേരത്തെ തുടങ്ങിയിരുന്നെങ്കില്‍ രണ്ടാം തരംഗത്തില്‍ നിരവധി ജീവനുകള്‍ നമുക്ക് രക്ഷിക്കാമായിരുന്നു”- കെജ്രിവാള്‍ പറഞ്ഞു.
”വാക്സിന്‍ എത്തിക്കാന്‍ എല്ലാ മുഖ്യമന്ത്രിമാരും ശ്രമം നടത്തിയെങ്കിലും ഒന്നും വിജയിച്ചില്ല. ആഗോള ടെണ്ടറിന് തയാറെടുത്തതും പരാജയമായി. കോവിഡിനെതിരായ യുദ്ധത്തില്‍ സംസ്ഥാനങ്ങള്‍ കേന്ദ്രത്തെ പിന്തുണക്കാന്‍ തയാറാണ്.
ഈ പോരാട്ടത്തില്‍ നമ്മള്‍ക്ക് തോല്‍ക്കാനാവില്ല. കേന്ദ്രം കോവിഡിന് മുന്നില്‍ തോറ്റാല്‍ ബി.ജെ.പിയല്ല തോല്‍ക്കുന്നത്, ഇന്ത്യ ഒട്ടാകെയാണ്”- ഡല്‍ഹി മുഖ്യമന്ത്രി പറഞ്ഞു. കൂടുതല്‍ വാക്സിന്‍ സംസ്ഥാനങ്ങള്‍ക്ക് കേന്ദ്രം എത്തിക്കണമെന്നും വൈറസിനെ തോല്‍പിക്കാന്‍ ടീം ഇന്ത്യ ഒറ്റക്കെട്ടായി അണിനിരക്കണമെന്നും കെജ്രിവാള്‍ ആവശ്യപ്പെട്ടു.
