ഐ.പി.എല്ലില്‍ താരങ്ങള്‍ക്ക് കോവിഡ്; ഇന്നത്തെ കൊല്‍ക്കത്ത- ബാംഗ്ലൂര്‍ കളി മാറ്റി
May 3, 2021 3:41 pm
0
മുംബൈ: കൊല്‍ക്കത്ത നൈറ്റ് റൈേഡഴ്സ് താരങ്ങളായ സന്ദീപ് വാര്യറും വരുണ്‍ ചക്രവര്‍ത്തിയും കോവിഡ് പോസിറ്റീവായതോടെ ഇന്ത്യന്‍ പ്രിമിയര്‍ ലീഗില്‍ തിങ്കളാഴ്ചത്തെ കളി നീട്ടി. കൊല്‍ക്കത്തയും ബാംഗ്ലൂരും തമ്മിലെ മത്സരമാണ് നീട്ടിവെച്ചത്. കൊല്‍ക്കത്ത ക്യാമ്ബില്‍ പലര്‍ക്കും രോഗബാധ സംശയിക്കുന്നതായും ചില റിപ്പോര്‍ട്ടുകള്‍ പറയുന്നു. മലയാളി താരമാണ് സന്ദീപ് വാര്യര്‍.
ചക്രവര്‍ത്തിയുടെ കോവിഡ് പരിശോധനാ ഫലം പൊസിറ്റീവ് ആണെന്ന് ഞായറാഴ്ച വൈകീട്ടാണ് വിവരം ലഭിച്ചത്. പിന്നാലെ, സന്ദീപിന്‍റെ ഫലവും പോസിറ്റീവ് ആയി. തുടര്‍ന്ന് ടീമംഗങ്ങള്‍ ഐസൊലേഷനിലേക്ക് മാറുകയായിരുന്നു. ഇതിനകം പാതി പിന്നിട്ട ഐ.പി.എല്‍ പുതിയ സീസണ്‍ ബയോ ബബ്ള്‍ സുരക്ഷയോടെ അടച്ചിട്ട സ്റ്റേഡിയങ്ങളിലാണ് നടക്കുന്നത്.
ഇത്ര കനത്ത സുരക്ഷാ വലയങ്ങള്‍ക്കിടയില്‍നിന്ന് താരങ്ങള്‍ക്ക് കോവിഡ് ബാധിക്കാന്‍ കാരണം എന്തെന്ന് ടീം അധികൃതര്‍ സൂചന നല്‍കിയിട്ടുണ്ട്. പരിശീലനത്തിനും കളിക്കുമിടെ പരിക്കേറ്റതിനെ തുടര്‍ന്ന് സ്കാനിങ്ങിനും പരിശോധനകള്‍ക്കുമായി ഇരുവരും ആശുപത്രിയില്‍ പോയിരുന്നു. അവടെ നിന്നാകാം രോഗം പകര്‍ന്നതെന്നാണ് നിഗമനം.
അവസാനമായി ഡല്‍ഹി ക്യാപിറ്റല്‍സിനെതിരെ അഹ്മദാബാദിലാണ് കൊല്‍ക്കത്ത കളിച്ചത്. കോവിഡ് സ്ഥിരീകരിച്ച സാഹചര്യത്തില്‍ കളിക്കാന്‍ ബാംഗ്ലൂരിന് താല്‍പര്യമില്ലെന്ന് കണക്കാക്കിയാണ് നീട്ടിവെക്കല്‍. നീട്ടിവെച്ച മത്സരത്തിന്‍റെ പുതിയ തീയതി പിന്നീട് അറിയിക്കും.
