പെണ്‍കുട്ടിയുടെ മാറിടത്തില്‍ സ്പര്‍ശിച്ചതിനെ ലൈംഗിക ആക്രമണമെന്ന് വിളിക്കാനാകില്ലെന്ന് ബോംബെ ഹൈകോടതി
January 25, 2021 12:49 pm
0
മുംബൈ: പ്രായപൂര്‍ത്തിയാകാത്ത പെണ്‍കുട്ടിയുടെ മാറിടത്തില്‍ സ്പര്‍ശിച്ചതിനെ ലൈംഗിക ആക്രമണമെന്ന് വിളിക്കാനാകില്ലെന്ന് ബോംബെ ഹൈകോടതി. പെണ്‍കുട്ടിയുടെ വസ്ത്രം മാറ്റിയിട്ടില്ലെന്നും അതിനാല്‍ പോക്സോ കേസിന്‍റെ പരിധിയില്‍ വരില്ലെന്നും കോടതി വ്യക്തമാക്കി.
ബോംബെ ഹൈകോടതിയുടെ നാഗ്പുര്‍ ബെഞ്ച് ജസ്റ്റിസ് പുഷ്പ ഗനേഡിവാലയുടേതാണ് ഞെട്ടിക്കുന്ന വിധി. ജനുവരി 19ലെ വിധിയുടെ വിശദാംശങ്ങള്‍ പുറത്തുവരുന്നത് ഇപ്പോഴാണ്. ലൈംഗിക ഉദ്ദേശത്തോടെ ‘സ്കിന്‍ ടു സ്കിന്‍‘ സമ്ബര്‍ക്കം വരുന്നതിനെ മാത്രമേ ലൈംഗികാക്രമണത്തിന്‍റെ പരിധിയില്‍ ഉള്‍പ്പെടുത്താനാകുവെന്നും വിധിയില്‍ പറയുന്നു.
12കാരിയായ പെണ്‍കുട്ടിയെ 39കാരന്‍ ലെംഗികാതിക്രമത്തിന് വിധേയമാക്കിയെന്ന പരാതിയിലാണ് വിധി. 2016 ഡിസംബറിലാണ് കേസിന് ആസ്പദമായ സംഭവം. നാഗ്പുര്‍ സ്വദേശിയായ സതീഷ് എന്ന 39കാരന്‍ പെണ്‍കുട്ടിയെ ഭക്ഷണം നല്‍കാമെന്ന് പറഞ്ഞ് വീട്ടിലേക്ക് വിളിക്കുകയും മാറിടത്തില്‍ സ്പര്‍ശിക്കാന്‍ ശ്രമിച്ചുവെന്നാണ് പരാതി. എന്നാല്‍ പെണ്‍കുട്ടി അവിടെനിന്ന് രക്ഷെപ്പട്ട് അമ്മയുടെ അടുത്തെത്തി സംഭവം വിവരിക്കുകയായിരുന്നു.
പെണ്‍കുട്ടിയുടെ വസ്ത്രം മാറ്റാത്തതിനാല്‍ ലൈംഗികാക്രമണത്തിന്‍റെ പരിധിയില്‍ വരില്ലെന്നും എന്നാല്‍ ക്രിമിനല്‍ കുറ്റകൃത്യത്തിന്‍റെ പരിധിയില്‍ വരുമെന്നും കോടതി പറഞ്ഞുതുടര്‍ന്ന് ഇയാള്‍ക്ക് സെക്ഷന്‍ 354 പ്രകാരം ശിക്ഷ വിധിക്കുകയായിരുന്നു. ഇതുപ്രകാരം ഒരുവര്‍ഷത്തെ തടവുശിക്ഷയാണ് ഇയാള്‍ക്ക് ലഭിക്കുക. പോക്സോ കേസാണെങ്കില്‍ മൂന്നുവര്‍ഷം വരെ തടവുശിക്ഷ ലഭിക്കും.
