കോവിഡ്; കേന്ദ്രം പ്രചരിപ്പിക്കുന്നത് തെറ്റായ കാര്യമാണെന്ന് ആരോഗ്യമന്ത്രി
April 19, 2022 12:35 pm
0
തിരുവനന്തപുരം: കേന്ദ്രം പ്രചരിപ്പിക്കുന്നത് തെറ്റായ കാര്യമാണെന്നും കോവിഡ് കണക്ക് നല്‍കുന്നില്ലെന്ന ആരോപണം ശരിയല്ലെന്നും ആരോഗ്യമന്ത്രി വീണാ ജോര്‍ജ്.കോവിഡ് കണക്ക് എല്ലാ ദിവസവും നാഷണല്‍ സര്‍വൈലന്‍സ് യൂണിറ്റിന് കൊടുക്കുന്നുണ്ട്. എല്ലാ ദിവസവും മെയില്‍ അയക്കുന്നുണ്ട്. കേന്ദ്രം പ്രചരിപ്പിക്കുന്നത് തെറ്റായ കാര്യമാണെന്നും മന്ത്രി വ്യക്തമാക്കി.ആഴ്ചയിലൊരിക്കല്‍ പൊതുജനങ്ങള്‍ അറിയാന്‍ കോവിഡ് റിപ്പോര്‍ട്ട് ഉണ്ടാകും. രോഗബാധ കൂടിയാല്‍ ദിവസവും ബുള്ളറ്റിന്‍ ഉണ്ടാകുമെന്നും മന്ത്രി അറിയിച്ചു.
ദിവസേനയുള്ള കോവിഡ് കണക്കുകള്‍ പ്രസിദ്ധീകരിക്കുന്നതു നിര്‍ത്തിവച്ച കേരള സര്‍ക്കാരിന് കേന്ദ്രത്തിന്‍റെ രൂക്ഷവിമര്‍ശനമുണ്ടായിരുന്നു. ഏപ്രില്‍ 13നു ശേഷം ഞായറാഴ്ച വരെ അഞ്ചുദിവസത്തെ കോവിഡ് കണക്കുകള്‍ കേരളം നല്‍കാത്തതു മഹാമാരിക്കെതിരായ രാജ്യത്തിന്‍റെ പോരാട്ടത്തിനു ദോഷം ചെയ്തെന്നും മേലില്‍ ദിവസവും ആവശ്യമായ കണക്കുകള്‍ ലഭ്യമാക്കണമെന്നും ആവശ്യപ്പെട്ട് കേന്ദ്ര ആരോഗ്യമന്ത്രാലയം സംസ്ഥാന സര്‍ക്കാരിനു കത്തയച്ചു.
അഞ്ചുദിവസത്തെ ഇടവേളയ്ക്കു ശേഷമാണ് കോവിഡ് -19 മായി ബന്ധപ്പെട്ട വിവരങ്ങള്‍ കേരളം ഇന്നലെ റിപ്പോര്‍ട്ട് ചെയ്തത്. കോവിഡ് കേസുകള്‍, മരണം, പോസിറ്റിവിറ്റി തുടങ്ങിയ ഇന്ത്യയുടെ പ്രധാന നിരീക്ഷണസൂചകങ്ങളുടെ നിലയെ കേരളത്തിന്‍റെ തെറ്റായ നടപടി സ്വാധീനിക്കുകയും വളച്ചൊടിക്കുകയും ചെയ്തുവെന്നു കേന്ദ്രം കുറ്റപ്പെടുത്തി.
തുമൂലം ഒറ്റദിവസംകൊണ്ട് രാജ്യത്തെ പുതിയ കോവിഡ് കേസുകളുടെ എണ്ണത്തില്‍ 90 ശതമാനവും പോസിറ്റിവിറ്റി നിരക്കില്‍ 165 ശതമാനവും കുതിച്ചുചാട്ടം ഉണ്ടായെന്നു കേന്ദ്ര ആരോഗ്യ മന്ത്രാലയം ജോയിന്‍റ് സെക്രട്ടറി ലവ് അഗര്‍വാള്‍ സംസ്ഥാന ആരോഗ്യ പ്രിന്‍സിപ്പല്‍ സെക്രട്ടറി ഡോ. രാജന്‍ എന്‍. ഖോബ്രഗഡെയ്ക്ക് അയച്ച കത്തില്‍ ചൂണ്ടിക്കാട്ടി.
കഴിഞ്ഞ അഞ്ചു ദിവസത്തെ മരണക്കണക്കുകൂടി കൂട്ടിയതിനാലാണ് കേരളത്തില്‍ ഒറ്റ ദിവസം 213 മരണം ഇന്നലെ റിപ്പോര്‍ട്ട് ചെയ്തത്. കേരളം വിവരം പ്രസിദ്ധീകരിക്കുന്നതു നിര്‍ത്തിയ ഏപ്രില്‍ 13ന് രാജ്യത്താകെ 1,088 പുതിയ കേസുകളും 26 മരണവുമാണുണ്ടായിരുന്നത്. ഇതില്‍ 298 പുതിയ കേസുകളും 19 മരണവും കേരളത്തിലാണ്. ഏപ്രില്‍ 12ന് രാജ്യത്താകെ റിപ്പോര്‍ട്ട് ചെയ്യപ്പെട്ട 19 മരണങ്ങളില്‍ 18 എണ്ണവും കേരളത്തിലാണ്.
