ശബരിമലയിൽ പ്രസാദ നിർമ്മാണത്തിനായി എത്തിച്ച മിൽമ നെയ്യ് മറിച്ചുവിറ്റ് കോടികളുടെ തട്ടിപ്പ് നടത്തിയ കേസിൽ ആദ്യ അറസ്റ്റ് രേഖപ്പെടുത്തി. കേസിൽ ട്രാൻസ്‌പോർട്ട് കരാറുകാരനായ എസ്. എസ്. ബിനുവാണ് ഇന്ന് പിടിയിലായത്. ഹൈക്കോടതി നിർദ്ദേശപ്രകാരം കേസ് അന്വേഷിക്കുന്ന വിജിലൻസിന്റെ പ്രത്യേക സംഘമാണ് ബിനുവിനെ കസ്റ്റഡിയിലെടുത്തത്.
സന്നിധാനത്തേക്ക് അയക്കാൻ മിൽമയിൽ നിന്ന് ശേഖരിച്ച ഉയർന്ന ഗുണനിലവാരമുള്ള യഥാർത്ഥ നെയ്യ് വഴിതിരിച്ചുവിട്ട് മറിച്ചുവിറ്റെന്നാണ് വിജിലൻസ് കണ്ടെത്തിയത്. തമിഴ്‌നാട്ടിലെ ശ്രീ വെങ്കിടേശ്വര ട്രേഡേഴ്‌സ്, ലിയോ ട്രേഡേഴ്‌സ് എന്നീ രണ്ട് ഏജൻസികൾക്കാണ് ബിനു നെയ്യ് മറിച്ച് വിറ്റത്. തുടർന്ന് അതിന് പകരം വിപണിയിൽ ലഭ്യമായ ഗുണനിലവാരം കുറഞ്ഞതും വില കുറഞ്ഞതുമായ നെയ്യാണ് ഇയാൾ ശബരിമലയിൽ എത്തിച്ചിരുന്നത്.
തമിഴ്നാട്ടിലേക്ക് നെയ്യ് കടത്തി തട്ടിപ്പ് നടത്തിയതിലൂടെ തിരുവിതാംകൂർ ദേവസ്വം ബോർഡിന് ഏകദേശം രണ്ടര കോടി രൂപയുടെ ഭീമമായ സാമ്പത്തിക നഷ്ടമുണ്ടായതായി അന്വേഷണസംഘം സ്ഥിരീകരിച്ചു. പമ്പയിലെത്തിച്ച നെയ്യ് സന്നിധാനത്തേക്ക് കയറ്റി അയക്കുന്നതിന് മുൻപ് ആവശ്യമായ ഗുണനിലവാര പരിശോധനകൾ നടത്താത്തതും ക്രമക്കേടിന് ആഴം കൂട്ടി.
ശബരിമല തീർത്ഥാടനത്തോടനുബന്ധിച്ച് നടന്ന ഈ വലിയ ക്രമക്കേടിൽ കൂടുതൽ ആളുകൾക്ക് പങ്കുണ്ടോ എന്നും, ഉദ്യോഗസ്ഥ തലത്തിൽ വീഴ്ച സംഭവിച്ചിട്ടുണ്ടോ എന്നും അറിയാൻ വിജിലൻസ് അന്വേഷണം കൂടുതൽ ഊർജ്ജിതമാക്കിയിട്ടുണ്ട്. കേസിൽ വരും ദിവസങ്ങളിൽ കൂടുതൽ അറസ്റ്റുകൾ ഉണ്ടായേക്കുമെന്നാണ് സൂചന.
