സ്പൈനൽ മസ്കുലാർ അട്രോഫി (എസ്എംഎ) ബാധിച്ച കുട്ടികൾക്കുള്ള മരുന്ന് വാങ്ങുന്നതിനായി സംസ്ഥാന ആരോഗ്യവകുപ്പ് പുറപ്പെടുവിച്ച ടെൻഡർ നടപടികളിൽ വലിയ ക്രമക്കേടും ദുരൂഹതയും ഉയർന്നുവരുന്നു. ടെൻഡർ വ്യവസ്ഥകൾ ഹൈദരാബാദ് ആസ്ഥാനമായ നാറ്റ്‌കോ ഫാർമസ്യൂട്ടിക്കൽസിന് പൂർണ്ണമായും അനുകൂലമായി തയാറാക്കിയതാണെന്നും വെറും ഏഴ് ദിവസത്തെ മാത്രം സമയപരിധി നൽകിയാണ് ഇ-ടെൻഡർ ക്ഷണിച്ചതെന്നുമുള്ള വിവരങ്ങളാണ് ഇപ്പോൾ പുറത്തുവന്നിരിക്കുന്നത്.
സെപ്റ്റംബർ 22-നാണ് സംസ്ഥാനത്ത് പുതിയ മരുന്ന് വാങ്ങുന്നതിനായുള്ള ഓൺലൈൻ ടെൻഡർ നടപടികൾ ആരംഭിച്ചത്. സാങ്കേതികമായി ഏറെ സങ്കീർണ്ണവും വൻ തുകയുടേതുമായ ഇത്തരം ടെൻഡറുകൾ സമർപ്പിക്കാൻ സാവകാശം നൽകേണ്ടിടത്താണ് സെപ്റ്റംബർ 29 വരെ മാത്രം, അതായത് കൃത്യം ഏഴ് ദിവസം മാത്രം സമയം അനുവദിച്ചത്. മറ്റ് പ്രധാന മരുന്ന് കമ്പനികൾക്ക് ടെൻഡറിൽ പങ്കെടുക്കാൻ സാധിക്കാത്ത വിധത്തിൽ സമയം വെട്ടിച്ചുരുക്കിയത് മുൻകൂട്ടി തീരുമാനിച്ച നാറ്റ്‌കോ ഫാർമയ്ക്ക് കരാർ ഉറപ്പിക്കാനാണെന്ന ആരോപണം ശക്തമായിട്ടുണ്ട്.
ഇന്നലെയും മിനിഞ്ഞാന്നുമായി പുറത്തുവന്ന റിപ്പോർട്ടുകൾ പ്രകാരം, മരുന്ന് മാറ്റത്തിനായുള്ള ഫയൽ നീക്കങ്ങൾക്കിടയിൽ നാറ്റ്‌കോ ഫാർമ പ്രതിനിധികളും തിരുവനന്തപുരം എസ്എടി ആശുപത്രി സൂപ്രണ്ടും ചേര്‍ന്ന് ആരോഗ്യമന്ത്രി കെ. മുരളീധരനുമായി അദ്ദേഹത്തിന്റെ ഓഫീസിൽ വെച്ച് കൂടിക്കാഴ്ച നടത്തുന്ന ദൃശ്യങ്ങളും വലിയ വിവാദങ്ങൾക്ക് തിരി കൊളുത്തിയിട്ടുണ്ട്. എന്നാൽ സിഎസ്ആർ (CSR) ഫണ്ടുമായി ബന്ധപ്പെട്ട ചർച്ചയ്ക്കാണ് ഇവർ എത്തിയതെന്നാണ് ആരോഗ്യമന്ത്രിയുടെ ഭാഗത്തുനിന്നുള്ള വിശദീകരണം.
കുട്ടികൾക്ക് വിതരണം ചെയ്ത മരുന്ന് കുപ്പികളിൽ ‘ക്ലിനിക്കൽ ട്രയൽ ഒൺലി’, ‘ഫിസിഷ്യൻ സാമ്പിൾ’ എന്ന് രേഖപ്പെടുത്തിയത് രക്ഷിതാക്കൾക്കിടയിൽ കടുത്ത ഭീതി പടർത്തിയിരുന്നു. തങ്ങളുടെ മക്കളിൽ പരീക്ഷണാടിസ്ഥാനത്തിലുള്ള മരുന്നാണോ പ്രയോഗിക്കുന്നതെന്ന ചോദ്യവുമായി രക്ഷിതാക്കൾ പ്രതിഷേധവുമായി രംഗത്തെത്തി. ഇതിനുപിന്നാലെയാണ് ടെൻഡർ നടപടികളിലെ അടിയന്തര സ്വഭാവവും സമയപരിധിയും കൂടുതൽ സംശയങ്ങൾക്ക് വഴിവെച്ചിരിക്കുന്നത്.
സാധാരണയായി വിദേശ നിർമ്മിത മരുന്നായ റോഷിന്റെ റിസ്ഡിപ്ലാം ഉപയോഗിച്ചിരുന്ന രോഗികൾക്ക് പെട്ടെന്ന് ഇന്ത്യൻ നിർമ്മിത ജനറിക് മരുന്നിലേക്ക് മാറ്റം നിർദ്ദേശിച്ചതിന് പിന്നിൽ വൻ സാമ്പത്തിക താൽപ്പര്യങ്ങളുണ്ടെന്ന് രക്ഷിതാക്കളുടെ സംഘടനകളും പ്രതിപക്ഷ നേതാക്കളും കുറ്റപ്പെടുത്തുന്നു. കോടിക്കണക്കിന് രൂപയുടെ ഇടപാട് നടക്കുന്ന ഈ പദ്ധതിയിൽ ടെൻഡർ മാനദണ്ഡങ്ങൾ അട്ടിമറിക്കപ്പെട്ടതിൽ സമഗ്രമായ അന്വേഷണം വേണമെന്ന ആവശ്യവും ശക്തമാകുകയാണ്.
