നെടുമ്പാശ്ശേരിയിൽ മൂന്നുപേരുടെ ദാരുണമായ മരണത്തിനിടയാക്കിയ മിനി കൂപ്പർ വാഹനാപകടക്കേസിൽ അന്വേഷണം കൂടുതൽ നിർണായക വഴിത്തിരിവിലേക്ക് കടക്കുന്നു. കേസിൽ മുഖ്യപ്രതിയായ സുഹൈൽ സജീവ് സമർപ്പിച്ച ജാമ്യാപേക്ഷ കോടതി തിങ്കളാഴ്ച വിശദമായി പരിഗണിക്കും. ഇതിനുമുന്നോടിയായി കേസിലെ അന്വേഷണ റിപ്പോർട്ട് സമർപ്പിക്കാൻ പോലീസിന് കോടതി നിർദ്ദേശം നൽകിയിട്ടുണ്ട്. ഇതിനിടെ, അപകടത്തിൽപ്പെട്ട ആഡംബര കാറിന്റെ ഉടമസ്ഥയും സുഹൈലിന്റെ മാതാവുമായ നൂഹ സജീവിന്റെ മൊഴി രേഖപ്പെടുത്താനുള്ള നടപടികളും അന്വേഷണ സംഘം വേഗത്തിലാക്കി.
അപകടം നടന്നയുടൻ ഒളിവിൽ പോകാൻ ശ്രമിച്ച സുഹൈലിനെയും സുഹൃത്തുക്കളെയും പോലീസ് കസ്റ്റഡിയിലെടുത്തിരുന്നു. എന്നാൽ, സുഹൈൽ ചോദ്യം ചെയ്യലിൽ നൽകിയ പല മൊഴികളും തെറ്റാണെന്ന് ഇതിനോടകം തന്നെ അന്വേഷണസംഘം കണ്ടെത്തിയിട്ടുണ്ട്. മണിക്കൂറിൽ 120 കിലോമീറ്റർ വേഗതയിലാണ് വാഹനം ഓടിച്ചതെന്നാണ് സുഹൈൽ പോലീസിനോട് പറഞ്ഞതെങ്കിലും, വാഹനം അപകടസമയത്ത് 150 കിലോമീറ്ററിലധികം അമിതവേഗതയിലായിരുന്നുവെന്ന് തെളിയിക്കുന്ന ഡിജിറ്റൽ തെളിവുകൾ പോലീസിന് ലഭിച്ചു.
അപകടത്തിന് തൊട്ടുമുമ്പ് കാറിലുണ്ടായിരുന്ന സുഹൃത്ത് പകർത്തിയ സ്നാപ്ചാറ്റ് വീഡിയോയിൽ സ്പീഡോമീറ്ററിലെ വേഗത വ്യക്തമായി കാണാം. അരക്കിലോമീറ്റർ ദൂരം വെറും 11 സെക്കന്റുകൾ കൊണ്ടാണ് ഈ വാഹനം കടന്നുപോയതെന്നും സിസിടിവി ദൃശ്യങ്ങൾ പരിശോധിച്ച് പോലീസ് സ്ഥിരീകരിച്ചു. സാങ്കേതിക തെളിവുകൾ കൂടുതൽ വ്യക്തമാക്കുന്നതിനായി മിനി കൂപ്പറിന്റെ ഇലക്ട്രോണിക് ഡാറ്റാ റെക്കോർഡർ (EDR) ജർമ്മനിയിലെ ബിഎംഡബ്ല്യു ആസ്ഥാനത്തേക്ക് പരിശോധനയ്ക്കായി അയക്കാൻ പോലീസ് തീരുമാനിച്ചിട്ടുണ്ട്.
വാഹനത്തിന്റെ ആർസി ബുക്ക് സുഹൈലിന്റെ മാതാവ് നൂഹ സജീവിന്റെ പേരിലായതിനാലാണ് അവരുടെ മൊഴിയെടുക്കുന്നത്. അപകടദിവസം വാഹനം കൊണ്ടുപോകാൻ അനുവാദം നൽകിയതുമായി ബന്ധപ്പെട്ട കാര്യങ്ങളും, അപകടത്തിന് തൊട്ടുപിന്നാലെ സുഹൈൽ മാതാവിനെ ഫോണിൽ വിളിച്ച് സംസാരിച്ച വിവരങ്ങളും പോലീസ് വിശദമായി പരിശോധിക്കും.
കഴിഞ്ഞ ദിവസം അങ്കമാലി മജിസ്ട്രേറ്റ് കോടതി പ്രതികളുടെ ജാമ്യാപേക്ഷ തള്ളിയിരുന്നു. ജാമ്യമില്ലാ വകുപ്പായ മനപ്പൂർവ്വമല്ലാത്ത നരഹത്യ ഉൾപ്പെടെയുള്ള കുറ്റങ്ങളാണ് പ്രതികൾക്കെതിരെ ചുമത്തിയിട്ടുള്ളത്. തിങ്കളാഴ്ച എറണാകുളം സെഷൻസ് കോടതിയിൽ നടക്കുന്ന ജാമ്യാപേക്ഷാ വാദത്തിൽ പ്രോസിക്യൂഷൻ ശക്തമായ എതിർപ്പ് ഉന്നയിക്കാനാണ് സാധ്യത. കേസിലെ മറ്റു നടപടികളും തെളിവുശേഖരണവും പൂർത്തിയാക്കി അന്വേഷണസംഘം ഉടൻ തന്നെ കുറ്റപത്രം സമർപ്പിക്കും.
