കാനത്തിന് തന്നോടുള്ള വിരോധം എന്തെന്ന് അറിയില്ലെന്ന് ജോസ് കെ. മാണി
September 17, 2021 3:12 pm
0
കോട്ടയം: സി.പി.ഐ സംസ്ഥാന സെക്രട്ടറി കാനം രാജേന്ദ്രനെതിരെ രൂക്ഷ വിമര്‍ശനവുമായി കേരള കോണ്‍ഗ്രസ് എം ചെയര്‍മാന്‍ ജോസ് കെ. മാണി. കാനത്തിന് തന്നോടുള്ള വിരോധം എന്തെന്ന് അറിയില്ലെന്ന് ജോസ് കെ. മാണി പറഞ്ഞു.
കാനത്തില്‍ നിന്നും തനിക്കെതിരെ മുമ്ബും വ്യക്തിപരമായ പരാമര്‍ശങ്ങള്‍ ഉണ്ടായിട്ടുണ്ട്. താന്‍ ബഹുമാനിക്കുന്ന നേതാവാണ് അദ്ദേഹം. തെരഞ്ഞെടുപ്പ് സംബന്ധിച്ച സി.പി.ഐ റിപ്പോര്‍ട്ടില്‍ പരാതിയില്ലെന്നും ജോസ് കെ. മാണി മാധ്യമങ്ങളോട് പറഞ്ഞു.
നിയമസഭ തെരഞ്ഞെടുപ്പ് അവലോകന റിപ്പോര്‍ട്ടിനെ ചൊല്ലിയാണ് എല്‍.ഡി.എഫ് ഘടകകക്ഷികളായ സി.പി.ഐയും കേരള കോണ്‍ഗ്രസ് എമ്മും തമ്മില്‍ പോര് തുടരുന്നത്. കേരള കോണ്‍ഗ്രസ് മുന്നണിയിലെത്തിയതിന്‍റെ പേരില്‍ വലിയ നേട്ടമൊന്നുമുണ്ടായില്ലെന്നും തട്ടകമായ പാലായിലും കടുത്തുരുത്തിയിലും പരാജയപ്പെട്ടുവെന്നും സി.പി.ഐ റിപ്പോര്‍ട്ടില്‍ പരാമര്‍ശമുണ്ടായിരുന്നു.
പാലായില്‍, ജോസ് കെ. മാണിയെക്കാള്‍ സ്വീകാര്യത മാണി സി. കാപ്പനുണ്ടായിരുന്നുവെന്നും പരാമര്‍ശിച്ചിരുന്നു. ഇതാണ് കേരള കോണ്‍ഗ്രസിനെ പ്രകോപിപ്പിച്ചത്. കേരള കോണ്‍ഗ്രസ് ഉന്നതാധികാരസമിതി യോഗത്തില്‍ സി.പി.ഐക്കെതിരെ രൂക്ഷവിമര്‍ശനമാണ് ഉയര്‍ന്നത്. സി.പി.ഐ യോജിച്ച്‌ പ്രവര്‍ത്തിക്കുന്നില്ല. കടുത്തുരുത്തിയിലും പാലായിലും സി.പി.ഐയുടെ സഹായം ലഭിച്ചില്ലെന്നും പരാതിയുണ്ട്.
രൂക്ഷഭാഷയില്‍ കടന്നാക്രമിച്ചതിന് പിന്നാലെ, സി.പി.ഐക്കെതിരെ ഇടതുമുന്നണി നേതൃത്വത്തെ സമീപിക്കാനും കേരള കോണ്‍ഗ്രസ് തീരുമാനിച്ചിട്ടുണ്ട്. എതിര്‍ ചേരിയിലുള്ളവരോടെന്ന പോലെയാണ് സി.പി.ഐ. പെരുമാറ്റമെന്ന് കാട്ടി എല്‍.ഡി.എഫിന് പരാതി നല്‍കാനാണ് നീക്കം.
