കുണ്ടറ പീഡന പരാതി: മന്ത്രി എ.കെ ശശിന്ദ്രന് പൊലീസിന്‍റെ ക്ലിന്‍ ചിറ്റ്
August 25, 2021 4:20 pm
0
കുണ്ടറ: എന്‍.സി.പി.നേതാവ് പീഡിപ്പിക്കാന്‍ ശ്രമിച്ചെന്ന യുവതിയുടെ പരാതിയില്‍ ഇടപെട്ട മന്ത്രി എ.കെ. ശശീന്ദ്രന്‍ കുറ്റക്കാരനല്ലെന്ന് പൊലീസ് റിപ്പോര്‍ട്ട്. നിയമ വകുപ്പിന്‍റെ ക്ലീന്‍ ചിറ്റിന് പിന്നാലെ പൊലീസിന്‍റെ അനുകൂല റിപ്പോര്‍ട്ടും മന്ത്രിക്ക് ആശ്വാസം പകരുന്നതാണ്. പരാതിക്കാരിയെ മന്ത്രി ഫോണില്‍ വിളിച്ചിട്ടില്ലെന്നും പരാതിക്കാരിയുടെ പിതാവിനെയാണ് വിളിച്ചതെന്നും റിപ്പോര്‍ട്ടിലുണ്ട്. ഈ ഫോണ്‍ വിളി ഏതാനും മിനിറ്റുകള്‍ മാത്രം നീണ്ടതാണെന്നും റിപ്പോര്‍ട്ടില്‍ പറയുന്നു.
കേസ് പിന്‍വലിക്കാനോ പരാതിക്കാരിയെ ഭീഷണിപ്പെടുത്താനോ മന്ത്രി ശ്രമിച്ചിട്ടില്ല. പരാതിക്കാരിയുടെ പേരോ, പരാതിക്കാരിക്ക് എതിരെ എന്തെങ്കിലും പരാമര്‍ശമോ ഫോണ്‍ സംഭാഷണത്തില്‍ ഇല്ല. അതിനാല്‍ തന്നെ ഈ ഫോണ്‍ സംഭാഷണത്തിന്‍റെ അടിസ്ഥാനത്തില്‍ മന്ത്രിക്കെതിരെ കേസ് എടുക്കാനാകില്ലെന്നും റിപ്പോര്‍ട്ട് വ്യക്തമാക്കുന്നു. പ്രശ്നം ‘നല്ല രീതിയില്‍ പരിഹരിക്കണം‘ എന്നാണ് ഫോണ്‍ സംഭാഷണത്തില്‍ ഉള്ളതെന്നും റിപ്പോര്‍ട്ട് പറയുന്നു.
കഴിഞ്ഞ ആഴ്ച ജില്ല ഗവ: പ്ലീഡര്‍ വിഷയത്തില്‍ പൊലീസിന് നിയമോപദേശം നല്‍കിയിരുന്നു. യൂത്ത് ലീഗ് നേതാവിന്‍റെ പരാതിയിലാണ് പൊലീസ് റിപ്പോര്‍ട്ട്. ജൂണ്‍ 28 നാണ് യുവതി എന്‍.സി.പി സംസ്ഥാന കമ്മിറ്റിയംഗം തന്നെ പീഡിപ്പിക്കാന്‍ ശ്രമിച്ചെന്ന പരാതി കുണ്ടറ പൊലീസിന് നല്‍കിയത്.
