ഇന്ത്യയില്‍ നിന്ന് ആഗസ്റ്റ് രണ്ട് വരെ വിമാനമില്ലെന്ന് ഇത്തിഹാദ് എയര്‍വേഴ്സ്
July 26, 2021 6:17 pm
0
ദുബൈ: ഇന്ത്യയില്‍ നിന്ന് ആഗസ്റ്റ് രണ്ട് വരെ വിമാന സര്‍വീസില്ലെന്ന് അബൂദബി ആസ്ഥാനമായ യു.എ.ഇയുടെ ഇത്തിഹാദ് എയര്‍വേഴ്സ് അറിയിച്ചു. സാമൂഹിക മാധ്യമത്തില്‍ വിമാന സര്‍വീസ് സംബന്ധിച്ച്‌ ചോദ്യമുന്നയിച്ച ഉപഭോക്താവിനെയാണ് ഇത്തിഹാദ് ഇക്കാര്യം അറിയിച്ചത്. ഇതോടെ ആഗസ്ത് ആദ്യവാരത്തില്‍ വിമാന സര്‍വീസ് പുനരാരംഭിക്കുമെന്ന പ്രതീക്ഷക്ക് മങ്ങലേറ്റു.
യാത്രവിലക്ക് സംബന്ധിച്ച്‌ അധികൃതര്‍ അറിയിപ്പൊന്നും നല്‍കാത്ത സാഹചര്യത്തില്‍ സര്‍വീസ് പുനരാരംഭിക്കുന്നത് വീണ്ടും നീണ്ടേക്കുമെന്നും കമ്ബനി അറിയിച്ചു. നേരത്തെ ജൂലൈ 31വരെ വിമാനമുണ്ടാകില്ലെന്നാണ് ഇത്തിഹാദ്, എമിറേറ്റ്സ്, എയര്‍ ഇന്ത്യ കമ്ബനികള്‍ അറിയിച്ചിരുന്നത്. ഇന്ത്യന്‍ വിദേശകാര്യ മന്ത്രാലയം യാത്ര പുനരാരംഭിക്കുന്നതിന് ചില ഇടപെടലുകള്‍ ജൂലൈ ആദ്യത്തില്‍ നടത്തിയിരുന്നു. ഈ സാഹചര്യത്തില്‍ ആഗസ്ത് തുടക്കത്തിലെങ്കിലും സര്‍വീസുകള്‍ പുനരാരംഭിക്കുമെന്ന പ്രതീക്ഷയിലായിരുന്നു മലയാളികളടക്കമുള്ള പ്രവാസികള്‍.
കോവിഡ് വ്യാപനത്തിെന്‍റ പശ്ചാത്തലത്തില്‍ ഏപ്രില്‍ 24മുതലാണ് ഇന്ത്യയില്‍ നിന്ന് യു.എ.ഇയിലേക്ക് യാത്ര വിലക്ക് ഏര്‍പ്പെടുത്തിയത്. ഇന്ത്യക്ക് പുറമെ 15രാജ്യങ്ങളില്‍ നിന്നും വിലക്കുണ്ട്. എന്നാല്‍ നിലവില്‍ യു.എ.ഇ പൗരന്മാര്‍, അവരുടെ അടുത്ത ബന്ധുക്കള്‍, നയതന്ത്ര ഉദ്യോഗസ്ഥര്‍, നേരത്തെ അനുമതിയെടുത്ത ഔദ്യോഗിക പ്രതിനിധികള്‍, ഗോള്‍ഡന്‍, സില്‍വര്‍ വിസയുള്ള താമസക്കാര്‍, കാര്‍ഗോ, ട്രാന്‍സിറ്റ് വിമാനങ്ങളുടെ ജീവനക്കാര്‍, പ്രത്യേക അനുമതി ലഭിച്ച ബിസിനസുകാര്‍, സുപ്രധാന മേഖലകളിലെ ജീവനക്കാര്‍, എക്സ്പോ 2020യില്‍ പങ്കെടുക്കുന്നവര്‍ എന്നിവര്‍ക്ക് കോവിഡ് മാനദണ്ഡങ്ങള്‍ പാലിച്ച്‌ യാത്രക്ക് അനുമതി നല്‍കുന്നുണ്ട്.
