അഭ്യാസത്തിനൊടുവില്‍ ലൈസന്‍സ് നഷ്ടം
April 28, 2021 2:12 pm
0
കൊല്ലം: ലക്ഷങ്ങള്‍ വിലയുള്ള ബൈക്കില്‍ തീരദേശ റോഡിലൂടെ യുവാവിന്‍റെ സ്റ്റണ്ട്. അഭ്യാസം പരിധിവിട്ടപ്പോള്‍ പൊലീസ് പിടികൂടി സ്റ്റേഷനിലെത്തിച്ചു. ഒരു ദിവസം കഴിഞ്ഞ് ബൈക്ക് വിട്ടുകൊടുത്തപ്പോള്‍ സ്റ്റേഷനില് നിന്നിറങ്ങി വീണ്ടും അഭ്യാസം. പോരാത്തിതിന് സമൂഹമാധ്യമങ്ങളില്‍ വിഡിയോ പ്രചരിപ്പിച്ച്‌ വിജയാരവം മുഴക്കലും. എല്ലാം കഴിഞ്ഞപ്പോള്‍ ബൈക്കോടിക്കാനുള്ള ലൈസന്‍സ് പോയികിട്ടി. കാവനാട് സ്വദേശി നിതീഷാണ് (22) കഥയിലെ താരം.
ഓവര്‍ സ്പീഡിനും റോഡില്‍ സ്റ്റണ്ട് നടത്തിയതിനും പരവൂര്‍ പൊലീസാണ് യുവാവിനെ പിടികൂടിയത്. നിയമലംഘനത്തിന് പിഴയീടാക്കി വിട്ടയച്ചപ്പോള്‍ സ്റ്റേഷന് മുന്നില്‍ വീണ്ടും ബൈക്കില്‍ അഭ്യാസം കാണിച്ചു. സുഹൃത്ത് എടുത്ത വിഡിയോ യുവാവ് സമൂഹമാധ്യമങ്ങളില്‍ പങ്കുവെച്ചതോടെ ‘പണി‘ പിന്നാലെ വരുമെന്ന മുന്നറിയിപ്പില്‍ വിഡിയോ പൊലീസും പങ്കുവെച്ചു. സ്റ്റേഷനില് നിന്നിറങ്ങിയപ്പോള്‍ തന്നെ ബൈക്കിന്‍റെ പിന്‍വശം പൊക്കി അഭ്യാസം കാണിച്ച യുവാവിനെ തിരികെ ബൈക്ക് ഉരുട്ടിച്ച്‌ സ്റ്റേഷനില് എത്തിക്കുന്ന വിഡിയോയാണ് പൊലീസ് നര്‍മത്തിന്‍റെ അകമ്ബടിയോടെ പങ്കുവെച്ചത്.
പൊലീസ് സ്റ്റേഷനില് നിന്ന് പുറത്തിറങ്ങി അഭ്യാസം കാട്ടുന്ന വിഡിയോ സമൂഹമാധ്യമങ്ങളില്‍ വൈറലായതോടെ ബൈക്ക് പിടികൂടാന്‍ പൊലീസ് മോട്ടോര്‍ വാഹനവകുപ്പിന്‍റെ സഹായം തേടി. കൊല്ലം എന്‍ഫോഴ്സ്മെന്‍റ് ആര്‍.ടി.എ എ.കെ. ദിലുവിന്‍റെ തന്ത്രപരമായ നീക്കത്തിലൂടെ കല്ലുംതാഴത്തുവെച്ച്‌ യുവാവിനെ ബൈക്കുമായി കസ്റ്റഡിയിലെടുത്തു. വിവരം അറിയിച്ചതിനെ തുടര്‍ന്ന് എത്തിയ പരവൂര്‍ പൊലീസിന് കൈമാറി. സ്റ്റേഷനില് നിന്ന് അഭ്യാസം കാണിച്ചിറങ്ങിപ്പോയ യുവാവിനെ തിരികെ എത്തിച്ചപ്പോള്‍ ബൈക്ക് ഉരുട്ടി എത്തുന്നരീതിയില്‍ വിഡിയോ പൊലീസ് ഉദ്യോഗസ്ഥരാണ് ചിത്രീകരിച്ചത്.
നിതീഷിെന്‍റ ലൈസന്‍സ് സസ്പെന്‍ഡ് ചെയ്തതായി എന്‍ഫോഴ്സ്മെന്‍റ് ആര്‍.ടി.ഒ എ.കെ. ദിലു അറിയിച്ചു. 2.3 ലക്ഷം രൂപ വിലയുള്ള ബൈക്കാണ്. പല ഭാഗത്തും രൂപമാറ്റം വരുത്തിയിരുന്നു. ആര്‍.സി ബുക്ക് റദ്ദാക്കണമോയെന്ന് പരിശോധിച്ചുവരികയാണ്.
