രാജ്യതലസ്ഥാനമായ ഡൽഹിയിൽ വായുമലിനീകരണം വീണ്ടും അതീവ ഗുരുതരാവസ്ഥയിലേക്ക് നീങ്ങുന്നു. ഇന്ന് രാവിലെ പുറത്തുവന്ന ഔദ്യോഗിക കണക്കുകൾ പ്രകാരം ഡൽഹിയിലെ ശരാശരി വായു ഗുണനിലവാര സൂചിക (AQI) 403 ആയി ഉയർന്ന് ‘അതീവ ഗുരുതരം’ എന്ന വിഭാഗത്തിലേക്ക് കടന്നു. ഇന്നലത്തെ കണക്കുകളെ അപേക്ഷിച്ച് മലിനീകരണ തോതിൽ വലിയ വർധനവാണ് ഇന്ന് രേഖപ്പെടുത്തിയിരിക്കുന്നത്. ഇന്നലെ വൈകുന്നേരം 359 ആയിരുന്ന സൂചികയാണ് ഇന്ന് രാവിലെയോടെ കുതിച്ചുയർന്ന് 400 കടന്നത്.
നഗരത്തിലെ ആകെയുള്ള 59 നിരീക്ഷണ കേന്ദ്രങ്ങളിൽ വിവരങ്ങൾ ലഭ്യമായ 58 കേന്ദ്രങ്ങളിൽ മുപ്പതിലധികം ഇടങ്ങളിൽ വായുനിലവാരം അതീവ ഗുരുതരാവസ്ഥയിലാണ്. ഐഐടി ഡൽഹി (487), നോർത്ത് ക്യാമ്പസ് (478), ചാന്ദ്‌നി ചൗക്ക് (477), പൂസ (468), ബുരാരി ക്രോസിംഗ് (458), ഐടിഒ (455), ആനന്ദ് വിഹാർ (419), രോഹിണി (413) എന്നിവിടങ്ങളിലാണ് ഏറ്റവും ഉയർന്ന മലിനീകരണ തോത് രേഖപ്പെടുത്തിയത്. പിഎം 2.5 (PM2.5), പിഎം 10 (PM10) എന്നീ സൂക്ഷ്മ പൊടിപടലങ്ങളുടെ അളവ് അപകടകരമായ നിലയിലാണ് തുടരുന്നത്. രാവിലെ കനത്ത പുകമഞ്ഞും മൂടൽമഞ്ഞും നഗരത്തെ മൂടിയതോടെ റോഡുകളിൽ കാഴ്ചപരിധി ഗണ്യമായി കുറയുകയും ഗതാഗതത്തെ ബാധിക്കുകയും ചെയ്തു.
ദീപാവലി ആഘോഷങ്ങൾക്ക് ശേഷവും തുടരുന്ന അനുകൂലമല്ലാത്ത കാലാവസ്ഥയും കാറ്റിന്റെ വേഗത കുറഞ്ഞതുമാണ് മലിനീകരണ തോത് പെട്ടെന്ന് ഉയരാൻ കാരണമായത്. അയൽസംസ്ഥാനങ്ങളിലെ കാർഷിക അവശിഷ്ടങ്ങൾ കത്തിക്കുന്നതിൽ നിന്നുള്ള പുകയ്ക്ക് പുറമെ, ഡൽഹിയിലെ വാഹനങ്ങളിൽ നിന്നുള്ള പുകയും പൊടിപടലങ്ങളുമാണ് വായു വിഷലിപ്തമാക്കുന്നതിൽ പ്രധാന പങ്കുവഹിക്കുന്നത്. മലിനീകരണം നിയന്ത്രിക്കുന്നതിനായി മുഖ്യമന്ത്രി രേഖാ ഗുപ്തയുടെ നേതൃത്വത്തിലുള്ള ഡൽഹി സർക്കാരും പരിസ്ഥിതി മന്ത്രി മൻജീന്ദർ സിംഗ് സിർസയും വിവിധ കർമ്മപദ്ധതികൾ നടപ്പിലാക്കി വരികയാണ്. നഗരത്തിലെ വിവിധ ഭാഗങ്ങളിൽ വാട്ടർ സ്പ്രിംഗ്ലറുകളും ആന്റി-സ്മോഗ് ഗണ്ണുകളും ഉപയോഗിച്ച് പൊടിപടലങ്ങൾ നിയന്ത്രിക്കാൻ ശ്രമം തുടരുന്നുണ്ട്.
കൂടാതെ, മലിനീകരണ നിയന്ത്രണ സർട്ടിഫിക്കറ്റ് (PUCC) ഇല്ലാത്ത വാഹനങ്ങൾക്ക് ഇന്ധനം നൽകാതിരിക്കുക, പുറത്തുനിന്നുള്ള പഴയ വാഹനങ്ങൾക്ക് നിയന്ത്രണം ഏർപ്പെടുത്തുക തുടങ്ങിയ നടപടികളും ശക്തമാക്കിയിട്ടുണ്ട്. വായുനിലവാരം മോശമായ സാഹചര്യത്തിൽ എയർ ക്വാളിറ്റി മാനേജ്‌മെന്റ് കമ്മീഷൻ (CAQM) ഗ്രേഡഡ് റെസ്‌പോൺസ് ആക്ഷൻ പ്ലാൻ (GRAP) മൂന്നാം ഘട്ട നിയന്ത്രണങ്ങളും ഏർപ്പെടുത്തിയിട്ടുണ്ട്. വരും ദിവസങ്ങളിലും വായുനിലവാരം മോശമായി തുടരാൻ സാധ്യതയുള്ളതിനാൽ കുട്ടികളും പ്രായമായവരും ശ്വാസകോശ സംബന്ധമായ അസുഖമുള്ളവരും പുറത്തിറങ്ങുന്നത് ഒഴിവാക്കണമെന്നും മാസ്ക് ധരിക്കണമെന്നും ആരോഗ്യവിദഗ്ധരും അധികൃതരും മുന്നറിയിപ്പ് നൽകുന്നു.
