ഇറാനെതിരായ വൻതോതിലുള്ള സൈനിക ആക്രമണങ്ങൾ താൽക്കാലികമായി നിർത്തിവെക്കാൻ സൗദി അറേബ്യ ഉൾപ്പെടെയുള്ള ഗൾഫ് രാജ്യങ്ങൾ തന്നോട് അഭ്യർത്ഥിച്ചതായി അമേരിക്കൻ പ്രസിഡന്റ് ഡൊണാൾഡ് ട്രംപ് വെളിപ്പെടുത്തി. എന്നാൽ, താൻ വിചാരിച്ചാൽ വെറും മൂന്ന് ദിവസത്തിനുള്ളിൽ ഇറാന്റെ മുഴുവൻ അടിസ്ഥാന സൗകര്യങ്ങളും തകർക്കാൻ കഴിയുമെന്നും ട്രംപ് അവകാശപ്പെട്ടു. വൈറ്റ് ഹൗസിൽ പ്രമുഖ മാധ്യമപ്രവർത്തകൻ സ്റ്റീഫൻ എ. സ്മിത്തിന് ഇന്നലെ നൽകിയ പ്രത്യേക അഭിമുഖത്തിലാണ് ട്രംപ് ഈ നിർണ്ണായക പ്രസ്താവനകൾ നടത്തിയത്.
നിലവിലെ സാമ്പത്തിക-സൈനിക ഉപരോധങ്ങൾ തുടരാനും വലിയ ആക്രമണങ്ങളിൽ നിന്ന് വിട്ടുനിൽക്കാനും ഗൾഫ് സഖ്യകക്ഷികൾ ആവശ്യപ്പെട്ടതുകൊണ്ടാണ് താൻ സംയമനം പാലിക്കുന്നതെന്ന് ട്രംപ് വ്യക്തമാക്കി. സൗദി അറേബ്യയ്ക്ക് പുറമെ ഖത്തർ, കുവൈറ്റ്, യു.എ.ഇ, ബഹ്‌റൈൻ എന്നീ രാജ്യങ്ങളും നിലവിലെ സാഹചര്യം തുടരാനാണ് ആഗ്രഹിക്കുന്നത്. ഗൾഫ് രാജ്യങ്ങളുടെ ഈ നിർദ്ദേശത്തോട് തനിക്ക് പൂർണ്ണ യോജിപ്പില്ലെങ്കിലും, സംരക്ഷണം നൽകുന്ന സഖ്യകക്ഷികളുടെ അഭ്യർത്ഥന മാനിച്ചാണ് ആക്രമണം നീട്ടിവെച്ചതെന്നും അദ്ദേഹം കൂട്ടിച്ചേർത്തു.
ഗൾഫ് രാജ്യങ്ങളുടെ അഭ്യർത്ഥന ഇല്ലായിരുന്നെങ്കിൽ ഇതിനോടകം തന്നെ ഇറാനിൽ വൻ ആക്രമണം നടത്തുമായിരുന്നോ എന്ന ചോദ്യത്തിന് “തീർച്ചയായും” എന്നായിരുന്നു ട്രംപിന്റെ മറുപടി. ഇറാന്റെ ഊർജ്ജ മേഖലയെയും പാലങ്ങളെയും നിർമ്മാണ ശാലകളെയും അമേരിക്ക ഇതുവരെ ലക്ഷ്യം വെച്ചിട്ടില്ല. “ഒരു ദിവസം കൊണ്ട് അവരുടെ ഊർജ്ജ മേഖല ഇല്ലാതാക്കാൻ കഴിയും. അടുത്ത ദിവസം അവരുടെ പാലങ്ങളും, മൂന്നാമത്തെ ദിവസം നിർമ്മാണ ശേഷിയും പൂർണ്ണമായി തകർക്കാൻ സാധിക്കും. ഇതിനെല്ലാം എനിക്ക് വെറും മൂന്ന് ദിവസം മതി,” ട്രംപ് അവകാശപ്പെട്ടു. ഇറാൻ ഭരണകൂടം തകർച്ചയുടെ വക്കിലാണെന്നും യുദ്ധം എപ്പോൾ വേണമെങ്കിലും അവസാനിപ്പിക്കാൻ തനിക്ക് സാധിക്കുമെന്നും അദ്ദേഹം പറഞ്ഞു.
അതേസമയം, ഇറാനുമായി യാതൊരുവിധ സമാധാന കരാറിന്റെയും ആവശ്യമില്ലെന്ന് ട്രംപ് ഇന്നലെ തന്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലൂടെയും (Truth Social) വ്യക്തമാക്കിയിരുന്നു. ഹോർമുസ് കടലിടുക്കിന്റെ നിയന്ത്രണവും ഇറാന്റെ കോടിക്കണക്കിന് ഡോളറിന്റെ ആസ്തികളും ഇപ്പോൾ അമേരിക്കയുടെ കൈവശമാണെന്നും അദ്ദേഹം അവകാശപ്പെട്ടു. യുദ്ധത്തെത്തുടർന്നുണ്ടായ ഇന്ധനവില വർദ്ധനവ് അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് തിരിച്ചടിയായെന്ന് സമ്മതിച്ച ട്രംപ്, എങ്കിലും ഇറാനെ ആക്രമിക്കാനുള്ള തന്റെ തീരുമാനത്തെ ശക്തമായി ന്യായീകരിച്ചു.
