ഹോർമുസ് കടലിടുക്കിലെ ഇറാൻ്റെ തന്ത്രപ്രധാന സൈനിക കേന്ദ്രമായ ഖഷ്‌മ് (Qeshm) ദ്വീപിനുനേരെ നടന്ന മിസൈലാക്രമണത്തെച്ചൊല്ലി പശ്ചിമേഷ്യയിൽ യുദ്ധഭീതി വീണ്ടും ശക്തമാകുന്നു. ഇന്ന് പുലർച്ചെയോടെയാണ് ഖഷ്‌മ് ദ്വീപിലെ പ്രതിരോധ സംവിധാനങ്ങൾക്ക് നേരെ മിസൈൽ പതിച്ചതായി ഇറാനിയൻ ഔദ്യോഗിക മാധ്യമങ്ങൾ സ്ഥിരീകരിച്ചത്. ആക്രമണത്തിന് പിന്നിൽ അമേരിക്കയാണെന്ന് തഹ്‌റാൻ ആരോപിക്കുമ്പോൾ, പ്രദേശത്തെ സൈനിക നീക്കങ്ങളും പ്രകോപനങ്ങളും ഗൗരവമായി നിരീക്ഷിച്ചു വരികയാണെന്ന് യു.എസ് പ്രതികരിച്ചു.
ലോകത്തെ ആകെ എണ്ണ വ്യാപാരത്തിൻ്റെ അഞ്ചിലൊന്നും കടന്നുപോകുന്ന തന്ത്രപ്രധാനമായ ഹോർമുസ് കടലിടുക്കിൻ്റെ പ്രവേശന കവാടത്തിലാണ് ഖഷ്‌മ് ദ്വീപ് സ്ഥിതി ചെയ്യുന്നത്. ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സിൻ്റെ (IRGC) തീരദേശ മിസൈൽ ലോഞ്ചറുകളും വ്യോമപ്രതിരോധ സംവിധാനങ്ങളും പ്രധാനമായും വിന്യസിച്ചിരിക്കുന്നത് ഈ മേഖലയിലാണ്. ദ്വീപിൽ വലിയ ശബ്ദത്തോടെ സ്‌ഫോടനങ്ങൾ ഉണ്ടായതായും എന്നാൽ അടിസ്ഥാന സൗകര്യങ്ങൾക്ക് വൻ നാശനഷ്ടങ്ങളോ ആളപായമോ സംഭവിച്ചിട്ടില്ലെന്നുമാണ് ഇറാൻ ഔദ്യോഗിക വക്താക്കൾ അറിയിച്ചിരിക്കുന്നത്.
മേഖലയിലെ കപ്പൽ ഗതാഗത സുരക്ഷ ഉറപ്പാക്കുന്നതിൻ്റെ ഭാഗമായി അമേരിക്ക തങ്ങളുടെ ഉപരോധ സംവിധാനങ്ങളും സൈനിക സാന്നിധ്യവും ശക്തമാക്കിയിരുന്നു. ഖഷ്‌മ് ദ്വീപിലെ തന്ത്രപ്രധാന കേന്ദ്രങ്ങൾ ലക്ഷ്യമിട്ട് നടന്ന ഈ ആക്രമണത്തെ “ചെറിയ സൈനിക നടപടി” എന്നാണ് അമേരിക്കൻ പ്രസിഡന്റ് ഡൊണാൾഡ് ട്രംപ് വിശേഷിപ്പിച്ചത്. ഇറാൻ്റെ വ്യോമപ്രതിരോധ ഉപകരണ തകരാറിലാക്കാനാണ് സൈന്യം നീക്കം നടത്തിയതെന്നും ട്രംപ് വ്യക്തമാക്കി. എന്നാൽ, തങ്ങളുടെ പരമാധികാര അതിർത്തിയിലുണ്ടായ ഏത് കടന്നുകയറ്റത്തിനും കടുത്ത തിരിച്ചടി നൽകുമെന്ന് ഇറാൻ വിദേശകാര്യ മന്ത്രാലയം മുന്നറിയിപ്പ് നൽകി.
ഇരുരാജ്യങ്ങളും തമ്മിലുള്ള നയതന്ത്ര സമാധാന ചർച്ചകൾ ഖത്തറിൻ്റെ മധ്യസ്ഥതയിൽ തുടരുന്നതിനിടെയാണ് ഈ കടുത്ത സൈനിക ഏറ്റുമുട്ടൽ ഉണ്ടായിരിക്കുന്നത്. മേഖലയിലെ എണ്ണക്കപ്പലുകളുടെ സുരക്ഷിതമായ സഞ്ചാരത്തെയും ആഗോള എണ്ണവിപണിയെയും ബാധിക്കുന്ന തരത്തിലേക്ക് സംഘർഷം വളരുന്നത് അന്താരാഷ്ട്ര തലത്തിൽ വൻ ആശങ്ക ഉയർത്തുന്നുണ്ട്. ഖത്തർ ഉൾപ്പെടെയുള്ള ഗൾഫ് രാജ്യങ്ങൾ പ്രശ്നപരിഹാരത്തിനായി അടിയന്തര ഇടപെടലുകൾ നടത്തിവരികയാണ്.
