സ്വകാര്യ ഇന്ധന റീട്ടെയിൽ രംഗത്തെ പ്രമുഖരായ നയാര എനർജി രാജ്യത്ത് പെട്രോൾ, ഡീസൽ വില വർധിപ്പിച്ചു. അന്താരാഷ്ട്ര വിപണിയിലെ ക്രൂഡ് ഓയിൽ വിലക്കയറ്റവും പശ്ചിമേഷ്യയിലെ സംഘർഷങ്ങളും ചൂണ്ടിക്കാണിച്ചാണ് കമ്പനി ഇന്ധന വിലയിൽ വലിയ വർധന വരുത്തിയത്. കൊച്ചിയിൽ പെട്രോൾ ലിറ്ററിന് അഞ്ചുരൂപയും ഡീസലിന് മൂന്നുരൂപയുമാണ് വർധിച്ചിരിക്കുന്നത്. ഇതോടെ കൊച്ചിയിലെ പുതുക്കിയ വിലനിലവാരം അനുസരിച്ച് പെട്രോളിന് 118.91 രൂപയും ഡീസലിന് 105.44 രൂപയുമായി ഉയർന്നു.
ആഗോളതലത്തിലുള്ള ഊർജ്ജ പ്രതിസന്ധിയും അസംസ്കൃത എണ്ണവിലയിലുണ്ടായ കുതിച്ചുചാട്ടവുമാണ് ഈ വിലക്കയറ്റത്തിലേക്ക് നയിച്ചതെന്ന് നയാര എനർജി വൃത്തങ്ങൾ വ്യക്തമാക്കുന്നു. പൊതുമേഖലാ എണ്ണക്കമ്പനികൾ നിലവിൽ ഇന്ധന വിലയിൽ മാറ്റം വരുത്താതെ പിടിച്ചുനിൽക്കുമ്പോഴാണ് സ്വകാര്യ മേഖലയിൽ നിന്നുള്ള ഈ വലിയ വർധന. രാജ്യത്തെ മറ്റ് പ്രമുഖ സ്വകാര്യ ഇന്ധന കമ്പനികളോ പൊതുമേഖലാ സ്ഥാപനങ്ങളോ സമാനമായ വിലവർധന ഇതുവരെ നടപ്പിലാക്കിയിട്ടില്ല.
ഇന്ധന വിലയിലെ ഈ കുതിച്ചുചാട്ടം സാധാരണക്കാരുടെ യാത്രാച്ചെലവുകളെയും ചരക്കുകടക്കുക്കൂലിയെയും നേരിട്ട് ബാധിക്കുമെന്ന ആശങ്കയിലാണ് ഉപഭോക്താക്കൾ. സ്വകാര്യ പമ്പുകളിലെ ഈ ഉയർന്ന നിരക്ക് സാധാരണ വാഹനയാത്രക്കാർക്ക് വലിയ സാമ്പത്തിക ബാധ്യതയാണുണ്ടാക്കുന്നത്. നിലവിലെ പ്രതിസന്ധി തുടരുകയാണെങ്കിൽ ഇന്ധന വിപണിയിൽ ഇത് വലിയ മാറ്റങ്ങൾക്ക് വഴിവെച്ചേക്കാം. പൊതുമേഖലാ കമ്പനികളും വരും ദിവസങ്ങളിൽ സമാനമായ പാത പിന്തുടരുമോ എന്ന ആശങ്കയിലാണ് വാഹന ഉടമകളും പൊതുജനങ്ങളും.
