തൃശൂരിൽ സംസ്ഥാന സ്കൂൾ കായികമേളയോടനുബന്ധിച്ചുണ്ടായ നീന്തൽ മത്സരവേദി തകർന്നുവീണ സംഭവത്തിൽ കായിക വകുപ്പിന് നേരിട്ട് ബന്ധമില്ലെന്ന് കായിക വകുപ്പ് മന്ത്രി ഒ.ജെ. ജനീഷ് വ്യക്തമാക്കി. ഇന്നലെ മാധ്യമങ്ങളോട് സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്. കായികമേളയുടെ സംഘാടനവും നടത്തിപ്പും പൂർണ്ണമായും വിദ്യാഭ്യാസ വകുപ്പിന്റെ ചുമതലയിലാണെന്നും, കായിക വകുപ്പിന് നിലവിൽ ആന്റി ഡോപ്പിങ് പരിശോധനകൾ നടത്താനുള്ള ചുമതല മാത്രമാണുള്ളതെന്നും അദ്ദേഹം കൂട്ടിച്ചേർത്തു. മത്സരങ്ങൾ നടക്കുന്ന വേദിയുടെ സംഘാടക സമിതി ചെയർമാനായി പ്രവർത്തിച്ചത് ഡി.ഡി ഇൻചാർജ് ആണെന്നും മന്ത്രി വ്യക്തമാക്കി.
അപകടത്തിന് കാരണക്കാരായ ഉദ്യോഗസ്ഥർക്ക് ഗുരുതര വീഴ്ച സംഭവിച്ചിട്ടുണ്ടെന്നാണ് വിലയിരുത്തൽ. സംഭവത്തെക്കുറിച്ച് സമഗ്രമായ അന്വേഷണം നടത്തി അന്തിമ തീരുമാനമെടുക്കേണ്ടത് വിദ്യാഭ്യാസ വകുപ്പാണെന്നും, ഇതിനായി വിദ്യാഭ്യാസ വകുപ്പ് ഔദ്യോഗികമായി അന്വേഷണത്തിന് ഉത്തരവിട്ടിട്ടുണ്ടെന്നും മന്ത്രി ഒ.ജെ. ജനീഷ് അറിയിച്ചു.
കഴിഞ്ഞ ദിവസമാണ് തൃശൂരിലെ അക്വാട്ടിക് കോംപ്ലക്സിൽ നീന്തൽ മത്സരത്തിനിടെ താത്ക്കാലിക വേദി തകർന്ന് വിദ്യാർത്ഥികൾക്ക് പരിക്കേറ്റത്.മേളയിലെ സംഘാടന പിഴവുകൾക്കും സുരക്ഷാ വീഴ്ചയ്ക്കുമെതിരെ വ്യാപക പ്രതിഷേധമാണ് രക്ഷിതാക്കളിൽ നിന്നും വിദ്യാർത്ഥി സംഘടനകളിൽ നിന്നും ഉയർന്നു വരുന്നത്. പരിക്കേറ്റ വിദ്യാർത്ഥികൾ ആശുപത്രിയിൽ ചികിത്സയിലാണ്. ഔദ്യോഗിക വീഴ്ചകളിൽ കൃത്യമായ അന്വേഷണം നടത്തി നടപടി സ്വീകരിക്കുമെന്നാണ് സർക്കാരിന്റെ വിശദീകരണം.
