ഇറാൻ വ്യോമയാന മേഖലയ്ക്ക് മേൽ അമേരിക്ക കർശന ഉപരോധം കടുപ്പിച്ചതിന് പിന്നാലെ, ഇറാനിയൻ വിമാന കമ്പനികളുടെ സർവീസുകൾ യുഎഇയും പൂർണ്ണമായി തടഞ്ഞു. ഇതുപ്രകാരം ഇറാനിൽ നിന്നും യുഎഇയിലേക്കും തിരിച്ചുമുള്ള എല്ലാ വിമാന സർവീസുകളും അടിയന്തരമായി നിർത്തിവെച്ചതായി യുഎഇ ജനറൽ സിവിൽ ഏവിയേഷൻ അതോറിറ്റി (ജി.സി.എ.എ) ഇന്നലെ ഔദ്യോഗികമായി അറിയിച്ചു. അമേരിക്കൻ ഉപരോധത്തിന്റെ പശ്ചാത്തലത്തിൽ അന്താരാഷ്ട്ര വിമാനത്താവളങ്ങൾ ഉപയോഗിക്കുന്നതിൽ നിന്നും ഇറാൻ എയർലൈനുകളെ വിലക്കിയതിനെ തുടർന്നാണ് ഈ നിർണായക നടപടി. യുഎഇക്ക് പുറമെ ഒമാൻ, ഇറാഖ്, അസർബൈജാൻ, ജോർജിയ തുടങ്ങിയ രാജ്യങ്ങളും സമാനമായ രീതിയിൽ ഇറാനിയൻ വിമാനങ്ങൾക്ക് വിലക്കേർപ്പെടുത്തിയിട്ടുണ്ട്.
യുഎഇയുടെ ഈ തീരുമാനം ഇരു രാജ്യങ്ങളും തമ്മിലുള്ള വാണിജ്യ, യാത്രാ മേഖലകളിൽ വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഉപരോധം കാരണം ടെഹ്റാനിൽ നിന്നും ദുബായിലേക്കുള്ള സർവീസുകൾ ഉൾപ്പെടെയുള്ളവ അവസാന നിമിഷം റദ്ദാക്കേണ്ടി വന്നു. യാത്രാവിലക്കുകൾ നീക്കുന്നതിനായി നയതന്ത്ര തലത്തിലും വ്യോമയാന തലത്തിലും ചർച്ചകൾ പുരോഗമിക്കുകയാണെന്ന് ഇറാൻ സിവിൽ ഏവിയേഷൻ ഓർഗനൈസേഷൻ വക്താവ് മജീദ് അഖ്വാൻ വ്യക്തമാക്കി. എങ്കിലും നിലവിലെ അനിശ്ചിതത്വം കാരണം യാത്രക്കാർക്ക് ടിക്കറ്റ് ബുക്കിംഗ് ഉൾപ്പെടെയുള്ള കാര്യങ്ങളിൽ കനത്ത തിരിച്ചടിയാണ് നേരിട്ടിരിക്കുന്നത്.
