കേരളത്തെ ഞെട്ടിച്ച അരുംകൊലകളിൽ ഒന്നായ അടിമാലി സെലീന വധക്കേസിൽ ഒടുവിൽ നീതി നടപ്പായിരിക്കുന്നു. ഇടുക്കി അടിമാലി ഇരുമ്പുപാലം സ്വദേശിനിയായ സെലീനയെ (38) കൊലപ്പെടുത്തി മൃതദേഹം വികൃതമാക്കിയ കേസിൽ തൊടുപുഴ വണ്ടമറ്റം പടികുഴയിൽ ഗിരോഷിന് (39) തൊടുപുഴ പ്രിൻസിപ്പൽ ജില്ലാ കോടതി ജീവപര്യന്തം തടവും 25,000 രൂപ പിഴയും വിധിച്ചത് ഇന്നലെയാണ്. ഒൻപത് വർഷത്തോളം നീണ്ട നിയമപോരാട്ടത്തിനൊടുവിലാണ് ഈ ക്രൂരകൃത്യത്തിന് കോടതി അർഹമായ ശിക്ഷ വിധിച്ചിരിക്കുന്നത്.
2017 ഒക്ടോബർ 10-നായിരുന്നു കേരളസമൂഹത്തെ നടുക്കിയ ഈ സംഭവം നടക്കുന്നത്. മുൻവിരോധവും സാമ്പത്തിക ഇടപാടുകളിലെ തർക്കങ്ങളുമാണ് കൊലപാതകത്തിലേക്ക് നയിച്ചത്. അന്നേ ദിവസം ഉച്ചയോടെ ബൈക്കിലെത്തിയ പ്രതി ഗിരോഷ്, സെലീനയുടെ വീട്ടിൽ അതിക്രമിച്ചു കയറി കഠാരകൊണ്ട് കഴുത്തിൽ പലതവണ കുത്തി കൊലപ്പെടുത്തുകയായിരുന്നു. എന്നാൽ അതിക്രൂരമായ ഈ കൊലപാതകവും പ്രതിയുടെ പകയും അവിടെ തീർന്നില്ല. സംഭവത്തിനുശേഷം മടങ്ങിയ ഇയാൾ, അന്ന് വൈകീട്ട് മൂന്നുമണിയോടെ വീണ്ടും സെലീനയുടെ വീട്ടിലെത്തുകയും മരിച്ചെന്നുറപ്പുവരുത്തിയ ശേഷം സെലീനയുടെ ഇടതുമാറിടം അറുത്തുമാറ്റി ബാഗിലാക്കി കൊണ്ടുപോവുകയുമായിരുന്നു. സ്വർണ്ണാഭരണങ്ങൾ മോഷ്ടിച്ചെടുക്കാനും ഇയാൾ ശ്രമിച്ചിരുന്നു. രാത്രി കച്ചവടം കഴിഞ്ഞ് വീട്ടിലെത്തിയ ഭർത്താവ് സിയാദാണ് ചോരയിൽ കുളിച്ചുകിടക്കുന്ന നിലയിൽ സെലീനയുടെ മൃതദേഹം കണ്ടെത്തിയത്.
പോലീസിന്റെയും ശാസ്ത്രീയ അന്വേഷണ സംഘത്തിന്റെയും കൃത്യമായ ഇടപെടലാണ് കേസിൽ നിർണായക വഴിതിരിവായത്. സി.സി.ടി.വി ദൃശ്യങ്ങളും ടവർ ലൊക്കേഷനും കേന്ദ്രീകരിച്ച് നടത്തിയ അന്വേഷണത്തിലൂടെയാണ് പ്രതിയെ പിടികൂടിയത്. പ്രതിയുടെ വീട്ടിൽ നടത്തിയ പരിശോധനയിൽ അറുത്തുമാറ്റിയ മാറിടവും കൊലയ്ക്കുശേഷം അപഹരിച്ച മാലയും താലിയും കണ്ടെടുത്തു. കൂടാതെ, സെലീനയുടെ വീടിന്റെ പരിസരത്തുനിന്ന് ശേഖരിച്ച മണ്ണും പ്രതിയുടെ ചെരിപ്പിനടിയിൽനിന്ന് ലഭിച്ച മണ്ണും ശാസ്ത്രീയമായി പരിശോധിച്ചപ്പോൾ സാമ്യത കണ്ടെത്തിയത് കേസിൽ നിർണായക തെളിവായി മാറി. പ്രോസിക്യൂഷൻ ഹാജരാക്കിയ ശക്തമായ തെളിവുകളും സാക്ഷിമൊഴികളും പരിഗണിച്ചാണ് കോടതി പ്രതി കുറ്റക്കാരനാണെന്ന് കണ്ടെത്തി ജീവപര്യന്തം തടവ് ശിക്ഷ വിധിച്ചത്. മനുഷ്യസാധ്യമല്ലാത്ത ക്രൂരത കാട്ടിയ പ്രതിക്ക് ലഭിച്ച ഈ ശിക്ഷ അർഹമായ അന്ത്യം തന്നെയാണ്.
