ഇടുക്കി ശാന്തൻപാറ പൂപ്പാറയില് വീണ്ടും കാട്ടാനയുടെ നടുക്കുന്ന ആക്രമണം. ചക്കക്കൊമ്പന് എന്ന് നാട്ടുകാര് വിളിക്കുന്ന കാട്ടാനയുടെ ആക്രമണത്തില് പന്തടിക്കളം സ്വദേശി പി.വി. വിജയന് (47) ആണ് ഇന്ന് പുലർച്ചെ ദാരുണമായി കൊല്ലപ്പെട്ടത്.
ഏലത്തോട്ടത്തില് കാവലിനു ശേഷം പുലർച്ചെ ജോലിസ്ഥലത്തെ ഷെഡില് നിന്ന് വീട്ടിലേക്ക് മടങ്ങിവരുന്ന വഴിയാണ് വിജയന് കാട്ടാനയുടെ മുന്നിൽപ്പെട്ടത്. ആനയുടെ പെട്ടെന്നുള്ള ആക്രമണത്തില് ഗുരുതരമായി പരിക്കേറ്റ വിജയന് സംഭവസ്ഥലത്തുവെച്ചുതന്നെ മരണപ്പെടുകയായിരുന്നു. പ്രദേശത്ത് കാട്ടാനയിറങ്ങിയിട്ടുണ്ടെന്ന് മുന്നറിയിപ്പുകൾ ഉണ്ടായിരുന്നെങ്കിലും പലർക്കും സമയത്ത് വിവരം ലഭിച്ചിരുന്നില്ല. വിവരമറിഞ്ഞ് വനംവകുപ്പ് ഉദ്യോഗസ്ഥരും നാട്ടുകാരും സ്ഥലത്തെത്തിയിട്ടുണ്ട്.
തുടർച്ചയായ വന്യജീവി ആക്രമണങ്ങളില് വിറങ്ങലിച്ചു നില്ക്കുകയാണ് ഇടുക്കിയുടെ മലയോരമേഖല. കഴിഞ്ഞ നാല് മാസത്തിനിടെ പൂപ്പാറ മേഖലയില് മാത്രം കാട്ടാന ആക്രമണത്തില് കൊല്ലപ്പെടുന്ന നാലാമത്തെ ആളാണ് വിജയന്. ജനവാസ മേഖലകളില് നിരന്തരം ഭീതി പരത്തുന്ന ചക്കക്കൊമ്പനെതിരെ ശാശ്വത പരിഹാരം കാണണമെന്നും നഷ്ടപരിഹാരം ഉറപ്പാക്കണമെന്നും ആവശ്യപ്പെട്ട് നാട്ടുകാര് കടുത്ത പ്രതിഷേധത്തിലാണ്.
