തിരുവനന്തപുരം വെങ്ങാനൂരിൽ ഓടിക്കൊണ്ടിരുന്ന കാറിന് തീപിടിച്ച് കോട്ടയം ഏറ്റുമാനൂർ സ്വദേശി ടൈറ്റസ് കുര്യൻ വെന്തുമരിച്ചു. ഇന്ന് പുലർച്ചെ അഞ്ചരയോടെ വെങ്ങാനൂർ അയ്യങ്കാളി സ്മാരക സ്കൂളിനും പ്രതിമയ്ക്കും സമീപത്തായിരുന്നു ദാരുണമായ സംഭവം.
റെനോ ക്വിഡ് കാറാണ് അപകടത്തിൽ പൂർണ്ണമായി കത്തിനശിച്ചത്. പുലർച്ചെ ഓടിക്കൊണ്ടിരുന്ന വാഹനം പെട്ടെന്ന് തീഗോളമായി മാറുകയായിരുന്നു. കാർ പിന്നോട്ടെടുക്കുന്നതിനിടയിൽ സമീപത്തെ മതിലിൽ ഇടിച്ചതായും, തുടർന്ന് വാഹനത്തിന് തീപിടിക്കുകയായിരുന്നു എന്നുമാണ് പ്രാഥമിക നിഗമനം. തീ ആളിപ്പടർന്നതിനെ തുടർന്ന് കാറിനുള്ളിൽ കുടുങ്ങിപ്പോയ ഡ്രൈവർക്ക് പുറത്തിറങ്ങാൻ സാധിച്ചില്ല.
നാട്ടുകാർ നൽകിയ വിവരത്തെ തുടർന്ന് ഫയർഫോഴ്സും പൊലീസും ഉടൻ തന്നെ സ്ഥലത്തെത്തി തീ അണച്ചെങ്കിലും ഡ്രൈവറുടെ ജീവൻ രക്ഷിക്കാനായില്ല. കാറിനുള്ളിൽ പൂർണ്ണമായി കത്തിക്കരിഞ്ഞ നിലയിലായിരുന്നു മൃതദേഹം കണ്ടെത്തിയത്. വാഹനം കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് മരിച്ചത് കോട്ടയം തെള്ളകം സ്വദേശിയായ ടൈറ്റസ് കുര്യനാണെന്ന് തിരിച്ചറിഞ്ഞത്.
സംഭവത്തിൽ പൊലീസും ഫയർഫോഴ്സും ഫോറൻസിക് വിദഗ്ധരും ചേർന്ന് വിശദമായ അന്വേഷണം ആരംഭിച്ചിട്ടുണ്ട്. വാഹനം ഷോർട്ട് സർക്യൂട്ട് മൂലമാണോ തീപിടിച്ചതെന്നോ അതോ മറ്റ് എന്തെങ്കിലും സാങ്കേതിക കാരണങ്ങളാണോ എന്ന കാര്യം ശാസ്ത്രീയ പരിശോധനയിലൂടെ മാത്രമേ വ്യക്തമാകൂ. ഇന്ന് പുലർച്ചെയുണ്ടായ ഈ ആകസ്മിക ദുരന്തം പ്രദേശത്ത് വലിയ ഞെട്ടലാണ് ഉണ്ടാക്കിയിരിക്കുന്നത്.
