ന്യൂഡല്ഹി: കൊറോണ വൈറസ് പടര്ന്നുപിടിക്കുന്ന ചൈനീസ് നഗരങ്ങളില് കുടുങ്ങിയ ഇന്ത്യക്കാരെ നാട്ടിലെത്തിക്കാനുള്ള ആദ്യ എയര് ഇന്ത്യ വിമാനം ഇന്ന് പുറപ്പെടും.
325 ഇന്ത്യക്കാരാണ് കൊറോണ വൈറസ് ബാധിച്ച വുഹാനില് കുടുങ്ങിക്കിടക്കുന്നതെന്നാണ് സര്ക്കാര് റിപ്പോര്ട്ടില് പറയുന്നത്. ബോയിംഗ് 747 വിമാനം ഇന്നുച്ചയ്ക്ക് 12 മണിക്ക് ഡല്ഹിയില് നിന്ന് പുറപ്പെടുമെന്നാണ് റിപ്പോര്ട്ട്. 16 ജീവനക്കാരു൦ ഡോക്ടര്മാരും അടങ്ങിയ സംഘമാണ് കുടുങ്ങിയവരെ തിരിച്ചെത്തിക്കാന് പുറപ്പെടുന്നത്.
അതേസമയം വൈറസ് ബാധയേറ്റവര് യാത്രയില് ഇല്ലെന്ന് ഉറപ്പ് വരുത്തും. മാസ്കുകള്, ഗ്ലൗസുകള്, മരുന്ന് എന്നിവ കരുതും. ഓരോ സീറ്റിലും ഭക്ഷണവും വെള്ളവും നല്കും.
ഡല്ഹിയില് നിന്ന് പുറപ്പെടുന്ന വിമാനം വുഹാനിലേക്കാണ് പോകുക. വൈറസിന്റെ പ്രഭവകേന്ദ്രമായ വുഹാനിലും പരിസര പ്രദേശങ്ങളിലും കുടുങ്ങിയവരെയാണ് ആദ്യം നാട്ടിലെത്തിക്കുക, തുടര്ന്ന് ഹൂബൈ പ്രവിശ്യയുടെ മറ്റ് ഭാഗങ്ങളില് കുടുങ്ങിയവരെയും ഒഴിപ്പിക്കുമെന്നാണ് സൂചന.
വുഹാനില് കുടുങ്ങിയവരെ ഇന്ന് വൈകിട്ടോടെ ഒഴിപ്പിക്കാനുള്ള തയാറെടുപ്പുകള് തുടങ്ങിയതായും അവിടെ കുടുങ്ങിക്കിടക്കുന്നവര്ക്ക് ഇതു സംബന്ധിച്ച് അറിയിപ്പ് നല്കിയതായും ഇന്ത്യന് എംബസി വ്യക്തമാക്കിയിട്ടുണ്ട്.
വിദ്യാര്ഥികളടക്കം 600 ഇന്ത്യക്കാര് ഇതുവരെ ബെയ്ജിംഗിലെ ഇന്ത്യന് നയതന്ത്രകാര്യാലയവുമായി ബന്ധപ്പെട്ടതായി വിദേശകാര്യ മന്ത്രാലയം കഴിഞ്ഞ ദിവസം അറിയിച്ചിരുന്നു.
അതേസമയം, ചൈനയില്നിന്നും എത്തിക്കുന്നവരെ 14 ദിവസത്തെ നിരീക്ഷണത്തിനു ശേഷം മാത്രമേ പുറത്തുവിടുകയുള്ളൂവെന്ന് സര്ക്കാര് അറിയിച്ചിട്ടുണ്ട്.