താരസംഘടനയായ ‘അമ്മ’യിൽ നിലനിന്നിരുന്ന പ്രതിസന്ധികൾക്കും അധികാര തർക്കങ്ങൾക്കും ഇടയിൽ, സംഘടനയുടെ പ്രവർത്തനങ്ങൾ കൂടുതൽ സുതാര്യവും പക്വവുമാക്കാൻ ലക്ഷ്യമിട്ട് പ്രസിഡന്റ് ശ്വേതാ മേനോനും എക്സിക്യൂട്ടീവ് കമ്മിറ്റിയും അംഗങ്ങൾക്ക് തുറന്ന കത്തയച്ചു. കഴിഞ്ഞ ജൂൺ 21-ലെ ജനറൽ ബോഡി യോഗത്തിന് ശേഷം സംഘടനയിലുണ്ടായ സംഭവവികാസങ്ങളിൽ ഖേദം പ്രകടിപ്പിച്ച ഭരണസമിതി, പിഴവുകൾ തിരുത്തി മുന്നോട്ടുപോകുമെന്ന് ഉറപ്പുനൽകി.
അനുഭവക്കുറവ് മൂലമാണ് സംഘടനയിൽ മുൻപ് ചില വീഴ്ചകൾ സംഭവിച്ചതെന്നും, അത് ആത്മാർത്ഥമായ ആത്മപരിശോധനയിലൂടെ തിരിച്ചറിഞ്ഞ് പരിഹരിക്കാനുള്ള നടപടികൾ ഇതിനകം ആരംഭിച്ചു കഴിഞ്ഞതായും കത്തിൽ വ്യക്തമാക്കുന്നു. കൂടുതൽ പക്വതയോടെയും ഉത്തരവാദിത്തത്തോടെയും കാര്യങ്ങൾ മുന്നോട്ട് കൊണ്ടുപോകുമെന്ന് ഉറപ്പ് നൽകിയ ഭരണസമിതി, പ്രതിസന്ധിഘട്ടങ്ങളിലും സംഘടനയുടെ ദൈനംദിന പ്രവർത്തനങ്ങൾക്കൊന്നും തടസ്സം നേരിട്ടിട്ടില്ലെന്ന് ഓർമ്മിപ്പിച്ചു.
അംഗങ്ങൾക്കുള്ള കൈനീട്ടം, സഞ്ജീവനി പദ്ധതി, മെഡിക്കൽ ഇൻഷുറൻസ് തുടങ്ങിയ ക്ഷേമ പ്രവർത്തനങ്ങൾ മുടക്കമില്ലാതെ തുടരുന്നുണ്ടെന്ന് ഭരണസമിതി അറിയിച്ചു. ഓരോ അംഗത്തിന്റെയും ക്ഷേമവും സംഘടനയുടെ ഐക്യവും കാത്തുസൂക്ഷിക്കുന്നതിനാണ് മുൻഗണന നൽകുന്നതെന്നും, ഈ ലക്ഷ്യത്തിലേക്കുള്ള യാത്രയിൽ എല്ലാ അംഗങ്ങളുടെയും സ്നേഹവും പിന്തുണയും സഹകരണവും പ്രതീക്ഷിക്കുന്നതായും കത്തിൽ പറയുന്നു.
തർക്കങ്ങൾക്കിടയിലും സംഘടനയുടെ ഔദ്യോഗിക ഭരണപരമായ ഉത്തരവാദിത്തങ്ങൾ നിറവേറ്റി മുന്നോട്ട് പോകാനാണ് ശ്വേതാ മേനോന്റെ നേതൃത്വത്തിലുള്ള സമിതിയുടെ തീരുമാനം. കോടതി നടപടികളടക്കം നിലനിൽക്കെ, സംഘടനയ്ക്കുള്ളിൽ സമാധാനം പുനഃസ്ഥാപിക്കാനും അംഗങ്ങളുടെ വിശ്വാസം വീണ്ടെടുക്കാനും ലക്ഷ്യമിട്ടാണ് ഭരണസമിതി ഇത്തരമൊരു നടപടി സ്വീകരിച്ചിരിക്കുന്നത്. സംഘടനയിലെ അംഗങ്ങൾക്കിടയിൽ ഐക്യം വളർത്താനും പുതിയൊരു തുടക്കത്തിന് വഴിയൊരുക്കാനും ഈ കത്തിലൂടെ ഭരണസമിതി ശ്രമിക്കുന്നു.
