ഇറാനെതിരായ പുതിയ സൈനിക നടപടികളിൽ തിടുക്കപ്പെട്ട് തീരുമാനമെടുക്കില്ലെന്നും 2027-ന്റെ തുടക്കത്തിൽ സാഹചര്യങ്ങൾ വിലയിരുത്തിയ ശേഷം തുടർനടപടികൾ സ്വീകരിക്കുമെന്നും യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കി. ചൈനയിലെ ഷെൻഷനിൽ നടന്ന എപെക് (APEC) ഉച്ചകോടിക്ക് ശേഷം എയർഫോഴ്സ് വണ്ണിൽ അമേരിക്കയിലേക്ക് മടങ്ങുന്നതിനിടെ ആക്സിയോസിന് (Axios) നൽകിയ അഭിമുഖത്തിലാണ് ട്രംപ് ഇന്ന് തന്റെ നിലപാട് അറിയിച്ചത്. വിഷയത്തിൽ എടുത്തുചാടാൻ താനില്ലെന്നും വർഷാരംഭത്തിനു ശേഷം എന്തുണ്ടാകുമെന്ന് നോക്കാമെന്നും അദ്ദേഹം പറഞ്ഞു.
ഇറാനെതിരെ വീണ്ടും ആക്രമണം അഴിച്ചുവിടണമെന്ന് ആവശ്യപ്പെട്ട് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രത്യേക പ്രതിനിധിയെ അയച്ചതായുള്ള റിപ്പോർട്ടുകൾക്കിടെയാണ് ട്രംപിന്റെ ഈ നിർണായക പ്രതികരണം. എന്നാൽ, നേരിട്ടുള്ള സൈനിക ആക്രമണങ്ങൾക്ക് പകരം സാമ്പത്തിക, നാവിക ഉപരോധങ്ങളിലൂടെ ഇറാനെ സമ്മർദത്തിലാക്കാനാണ് നിലവിൽ അമേരിക്ക ശ്രമിക്കുന്നത്. അടുത്തിടെ നടന്ന യുഎസ് ഇടക്കാല തിരഞ്ഞെടുപ്പിൽ ഇറാൻ യുദ്ധം റിപ്പബ്ലിക്കൻ പാർട്ടിക്ക് തിരിച്ചടിയായെന്ന് വൈസ് പ്രസിഡന്റ് ജെ.ഡി. വാൻസ് ഉൾപ്പെടെയുള്ളവർ ചൂണ്ടിക്കാട്ടിയതും നയം മാറ്റത്തിന് കാരണമായിട്ടുണ്ട്.
അതേസമയം, ഇറാനെ ആണവായുധം നിർമ്മിക്കാൻ ഒരു കാരണവശാലും അനുവദിക്കില്ലെന്നും അനിവാര്യമായി വന്നാൽ സൈനിക നടപടിക്ക് മടിക്കില്ലെന്നും ട്രംപ് ആവർത്തിച്ചു. മറുവശത്ത്, അമേരിക്ക ഏർപ്പെടുത്തിയ കര, നാവിക, വ്യോമ ഉപരോധങ്ങൾ തുടരാൻ അനുവദിക്കില്ലെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) വക്താവ് ഹുസൈൻ മൊഹെബി മുന്നറിയിപ്പ് നൽകി. ഹോർമുസ് കടലിടുക്കിന്റെ തെക്കൻ മേഖലയിൽ നാവിക മൈനുകളിൽ തട്ടി മൂന്ന് എണ്ണക്കപ്പലുകൾക്ക് തീപിടിച്ചതായുള്ള റിപ്പോർട്ടുകൾ പുറത്തുവന്നതോടെ പശ്ചിമേഷ്യയിൽ ആശങ്ക തുടരുകയാണ്.