സംസ്ഥാനത്തെ ടൂറിസ്റ്റ് ബസുകൾക്ക് ഏകീകൃത വെള്ളനിറം നിർബന്ധമാക്കിയ മുൻ ഉത്തരവ് പിൻവലിക്കാൻ സ്റ്റേറ്റ് ട്രാൻസ്പോർട്ട് അതോറിറ്റി (എസ്ടിഎ) എടുത്ത തീരുമാനത്തിന് ഇന്നലെ ഹൈക്കോടതി അംഗീകാരം നൽകി. ട്രാൻസ്പോർട്ട് കമ്മീഷണർ ജി. സ്പർജൻ കുമാർ, ഐജി പി. പ്രകാശ്, സർക്കാർ നോമിനി കെ. സുരേഷ് ബാബു എന്നിവരടങ്ങിയ ഉന്നതതല സമിതി ബസ് ഉടമകളുമായി നടത്തിയ ചർച്ചകൾക്കൊടുവിലാണ് നിർണ്ണായകമായ ഈ തീരുമാനത്തിലെത്തിയത്. 2022-ലെ വടക്കഞ്ചേരി ബസ് അപകടത്തിന് പിന്നാലെയായിരുന്നു സംസ്ഥാനത്ത് ടൂറിസ്റ്റ് ബസുകൾക്ക് വെള്ളനിറം നിർബന്ധമാക്കിയത്. എന്നാൽ, അഖിലേന്ത്യാ പെർമിറ്റുമായി എത്തുന്ന ഇതര സംസ്ഥാന ബസുകൾക്ക് ഈ നിബന്ധനയില്ലാത്തതിനാൽ കേരളത്തിലെ ടൂറിസ്റ്റ് ബസ് മേഖല കടുത്ത പ്രതിസന്ധിയിലാണെന്നും ആയിരക്കണക്കിന് തൊഴിലാളികളുടെ ഉപജീവനത്തെ ഇത് ബാധിക്കുന്നുണ്ടെന്നും ഉടമകൾ പരാതിപ്പെട്ടിരുന്നു. ഉടമകളുടെ നിവേദനങ്ങൾ പരിഗണിച്ച് കഴിഞ്ഞ സെപ്റ്റംബറിൽ നിറംമാറ്റം പുനഃപരിശോധിക്കാൻ സർക്കാർ വിജ്ഞാപനം പുറത്തിറക്കിയിരുന്നു.
ബസുകൾക്ക് ഇഷ്ടമുള്ള നിറം തിരഞ്ഞെടുക്കാൻ അനുമതി നൽകിയെങ്കിലും സുരക്ഷയുമായി ബന്ധപ്പെട്ട കർശന നിയന്ത്രണങ്ങളിൽ യാതൊരു വിട്ടുവീഴ്ചയുമുണ്ടാകില്ലെന്ന് കോടതിയും അധികൃതരും വ്യക്തമാക്കിയിട്ടുണ്ട്. മറ്റ് വാഹനയാത്രക്കാരുടെ ശ്രദ്ധ തിരിക്കുകയോ ബുദ്ധിമുട്ടുണ്ടാക്കുകയോ ചെയ്യുന്ന തരത്തിലുള്ള വലിയ ചിത്രങ്ങളോ ഗ്രാഫിക്സുകളോ എഴുത്തുകളോ ബസുകളുടെ ബോഡിയിൽ പതിപ്പിക്കാൻ അനുവദിക്കില്ല. കൂടാതെ, സ്വന്തം സർവീസുകളുടെ പ്രചാരണത്തിനായി വാഹനങ്ങളിൽ പരസ്യങ്ങൾ പതിപ്പിക്കുന്നതിനും പൂർണ്ണ വിലക്ക് തുടരും. 2019-ലെ ഹൈക്കോടതി ഉത്തരവും കേന്ദ്ര മോട്ടോർ വാഹന നിയമവും അനുശാസിക്കുന്ന എല്ലാ സുരക്ഷാ മാനദണ്ഡങ്ങളും കർശനമായി പാലിക്കുന്നുണ്ടെന്ന് ഉദ്യോഗസ്ഥർ ഉറപ്പുവരുത്തും.
നിയമവിരുദ്ധമായി എൽഇഡി ലൈറ്റുകൾ, സ്ട്രിപ്പ് ലൈറ്റുകൾ, ഹാലൊജൻ ലാമ്പുകൾ എന്നിവ ഘടിപ്പിക്കുന്ന വാഹനങ്ങൾക്ക് യാതൊരു കാരണവശാലും ഫിറ്റ്നസ് സർട്ടിഫിക്കറ്റ് നൽകില്ലെന്നും ഹൈക്കോടതി കർശന നിർദ്ദേശം നൽകിയിട്ടുണ്ട്. ഏറെക്കാലമായി ടൂറിസ്റ്റ് ബസ് ഉടമകളും ജീവനക്കാരും ഉന്നയിച്ചിരുന്ന പ്രധാന ആവശ്യത്തിനാണ് ഇതോടെ പരിഹാരമായിരിക്കുന്നത്. നിയന്ത്രണങ്ങൾ പാലിച്ചുകൊണ്ട് വാഹനങ്ങൾക്ക് പുതുമോടി നൽകാൻ സാധിക്കുന്നത് വിനോദസഞ്ചാര മേഖലയ്ക്കും ബസ് വ്യവസായത്തിനും വലിയ ഉണർവ് നൽകുമെന്ന പ്രതീക്ഷയിലാണ് ഉടമകൾ.