സംസ്ഥാന സർക്കാരിന്റെ പുതിയ മദ്യനയം സംബന്ധിച്ച അന്തിമ തീരുമാനമെടുക്കുന്നതിനായി യുഡിഎഫ് ഉപസമിതി രൂപീകരിക്കാൻ ഇന്നലെ ചേർന്ന മന്ത്രിസഭാ യോഗത്തിൽ തീരുമാനമായി. മുഖ്യമന്ത്രി വി.ഡി. സതീശന്റെ നിർദ്ദേശപ്രകാരം രൂപീകരിക്കുന്ന ഈ സമിതിയുടെ അധ്യക്ഷനെ തീരുമാനിക്കാൻ കെപിസിസി പ്രസിഡന്റും മന്ത്രിയുമായ സണ്ണി ജോസഫിനെ യോഗം ചുമതലപ്പെടുത്തി. കോൺഗ്രസിൽ നിന്നുള്ള ഒരു പ്രതിനിധിയായിരിക്കും ഉപസമിതിയുടെ അധ്യക്ഷനാകുക. യുഡിഎഫിലെ എല്ലാ ഘടകകക്ഷികളിൽ നിന്നുമുള്ള പ്രതിനിധികളെ സമിതിയിൽ ഉൾപ്പെടുത്താനും ധാരണയായിട്ടുണ്ട്. ഉപസമിതി രൂപീകരണം സംബന്ധിച്ച ചർച്ചകൾ പുരോഗമിക്കുകയാണെന്നും ഏകപക്ഷീയമായി തീരുമാനങ്ങളുണ്ടാകില്ലെന്നും സണ്ണി ജോസഫ് ഇന്ന് വ്യക്തമാക്കി.
എക്സൈസ് മന്ത്രി എം. ലിജുവിന്റെ നേതൃത്വത്തിൽ തയ്യാറാക്കിയ കരട് മദ്യനയത്തിൽ നിലവിലെ വ്യവസ്ഥകളിൽ സമഗ്രമായ മാറ്റങ്ങളാണ് നിർദ്ദേശിച്ചിരിക്കുന്നത്. പുതിയ ത്രീസ്റ്റാർ ബാറുകൾക്ക് ഇനി ലൈസൻസ് നൽകേണ്ടതില്ലെന്നും ബെവ്കോ ഔട്ട്ലെറ്റുകളുടെ എണ്ണം കൂട്ടാതെ അവയുടെ അടിസ്ഥാന സൗകര്യങ്ങളും പ്രവർത്തനരീതിയും ആധുനികവൽക്കരിക്കാനുമാണ് കരട് നയത്തിലെ പ്രധാന ശുപാർശകൾ. ഔട്ട്ലെറ്റുകളുടെ രൂപഘടന ഏകീകരിക്കുന്നതിനൊപ്പം ഉപഭോക്താക്കളുടെ സൗകര്യാർത്ഥം സെൽഫ് ഹെൽപ് കൗണ്ടറുകൾക്ക് പ്രാധാന്യം നൽകാനും താൽപ്പര്യമുള്ള സഹകരണ സംഘങ്ങളെ ചില്ലറ വിൽപ്പനയിൽ പങ്കാളികളാക്കാനും ആലോചനയുണ്ട്.
മദ്യപിച്ച് വാഹനമോടിക്കുന്നത് തടയാൻ ഉപഭോക്താക്കൾക്ക് പകരം ഡ്രൈവർമാരെയോ യാത്രാ സൗകര്യമോ ഒരുക്കേണ്ട ഉത്തരവാദിത്തം ബാർ ഉടമകൾക്ക് നൽകുന്ന നിയമനിർമ്മാണവും കരട് രേഖയിലുണ്ട്. കൂടാതെ, ടൂറിസം കേന്ദ്രങ്ങളിലെ അംഗീകൃത റിസോർട്ടുകളിലും ഹോംസ്റ്റേകളിലും വിനോദസഞ്ചാരികൾക്ക് മാത്രമായി കള്ളുഷാപ്പുകൾ അനുവദിക്കുന്നതിനും പരമ്പരാഗത കള്ളുചെത്ത് മേഖലയിൽ പരിഷ്കാരങ്ങൾ കൊണ്ടുവരുന്നതിനും നിർദ്ദേശമുണ്ട്. വീര്യം കുറഞ്ഞ മദ്യത്തിന്റെ കാര്യത്തിലടക്കം യുഡിഎഫ് ഉപസമിതി വിശദമായ ചർച്ചകൾ നടത്തി സമവായത്തിലെത്തിയ ശേഷം മാത്രമേ മന്ത്രിസഭ നയത്തിന് അന്തിമ അംഗീകാരം നൽകുകയുള്ളൂ. ഈ മാസം 30-ന് മുൻപായി പുതിയ മദ്യനയം പ്രഖ്യാപിക്കാനാണ് സർക്കാർ ലക്ഷ്യമിടുന്നത്.