ഏഷ്യൻ ഗെയിംസ് ഷൂട്ടിങ്ങിൽ ഇരട്ട വെള്ളി മെഡലുകൾ നേടി രാജ്യത്തിനും കേരളത്തിനും അഭിമാനമായി മാറിയ മലയാളി താരം വിദർശ കെ. വിനോദിന് സംസ്ഥാന സർക്കാർ ജോലി നൽകി. സംസ്ഥാന കായിക ഡയറക്ടറേറ്റിൽ അസിസ്റ്റന്റ് ഡയറക്ടറായാണ് വിദർശയ്ക്ക് നിയമനം ലഭിച്ചിരിക്കുന്നത്. ഇന്ന് രാവിലെ ഒൻപത് മണിക്ക് തിരുവനന്തപുരത്ത് മുഖ്യമന്ത്രിയുടെ ചേംബറിൽ നടന്ന പ്രത്യേക ചടങ്ങിൽ മുഖ്യമന്ത്രി വി.ഡി. സതീശൻ നിയമന ഉത്തരവ് വിദർശയ്ക്ക് നേരിട്ട് കൈമാറി. കായിക മന്ത്രി ഒ.ജെ. ജെനീഷ്, കായിക വകുപ്പ് സ്പെഷ്യൽ സെക്രട്ടറി എൻ. പ്രശാന്ത്, ഡയറക്ടർ അഖിൽ വി. മേനോൻ തുടങ്ങിയ ഉന്നത ഉദ്യോഗസ്ഥരും ചടങ്ങിൽ സന്നിഹിതരായിരുന്നു.
2026-ലെ ഏഷ്യൻ ഗെയിംസ് ഷൂട്ടിങ്ങിൽ വനിതകളുടെ 10 മീറ്റർ എയർ റൈഫിൾ ടീം ഇനത്തിലും 50 മീറ്റർ റൈഫിൾ ത്രീ പൊസിഷൻസ് ടീം ഇനത്തിലുമാണ് വിദർശ ഇന്ത്യയ്ക്കായി ഇരട്ട വെള്ളി മെഡലുകൾ വെടിവെച്ചിട്ടത്. ഇതോടെ ഏഷ്യൻ ഗെയിംസ് ഷൂട്ടിങ്ങിൽ മെഡൽ നേടുന്ന ആദ്യ മലയാളി വനിതാ താരം എന്ന ചരിത്രനേട്ടവും കോഴിക്കോട് തിരുവമ്പാടി സ്വദേശിനിയായ വിദർശ സ്വന്തമാക്കിയിരുന്നു. ഏഷ്യൻ ഗെയിംസ് മെഡൽ ജേതാക്കൾക്ക് കായിക വകുപ്പിൽ ജോലി നൽകുമെന്ന് മന്ത്രി ഒ.ജെ. ജെനീഷ് നേരത്തേ പ്രഖ്യാപിച്ചതിന്റെ അടിസ്ഥാനത്തിലാണ് ഈ നിയമന നടപടികൾ വേഗത്തിൽ പൂർത്തിയാക്കിയത്.
കേരളപ്പിറവി ദിനമായ നവംബർ ഒന്നിന് തന്നെ നിയമന ഉത്തരവ് കൈമാറാനായിരുന്നു സർക്കാർ ആദ്യഘട്ടത്തിൽ തീരുമാനിച്ചിരുന്നത്. എന്നാൽ, മറ്റൊരു രാജ്യാന്തര ടൂർണമെന്റിൽ പങ്കെടുക്കുന്നതിനായി വിദർശ വിദേശത്തായിരുന്നതിനാൽ ചടങ്ങ് ഇന്നത്തേക്ക് മാറ്റിവയ്ക്കുകയായിരുന്നു. കേരളത്തിൽ തുടരാൻ ആഗ്രഹമുണ്ടെന്നും സർക്കാർ ജോലി നൽകിയാൽ സ്വീകരിക്കുമെന്നും വിദർശ നേരത്തേ വ്യക്തമാക്കിയിരുന്നു. വരാനിരിക്കുന്ന തലമുറയിൽ നിന്ന് ഇനിയും മികച്ച ഷൂട്ടിങ് താരങ്ങൾ കേരളത്തിൽ ഉയർന്നുവരണമെന്നാണ് തന്റെ ആഗ്രഹമെന്നും, പുതിയ പദവിയിലൂടെ സംസ്ഥാനത്തെ കായിക മേഖലയ്ക്ക് കൂടുതൽ സംഭാവനകൾ നൽകാൻ സാധിക്കുമെന്നും വിദർശ പ്രതീക്ഷ പ്രകടിപ്പിച്ചു.