സെക്രട്ടേറിയറ്റിന് മുന്നിൽ എൽപിഎസ്ടി (LPST) റാങ്ക് ഹോൾഡേഴ്സ് നടത്തുന്ന അനിശ്ചിതകാല സമരം ഇന്ന് 134-ാം ദിവസത്തിലേക്ക് കടന്നതോടെ പ്രതിഷേധം കൂടുതൽ ശക്തമാക്കാൻ ഉദ്യോഗാർഥികൾ തീരുമാനിച്ചു. സമരസമിതി കൺവീനർ എസ്. വളർമതിയുടെ ആരോഗ്യനില അതീവ ഗുരുതരമായി തുടരുന്ന സാഹചര്യത്തിൽ, നിരാഹാര സമരം അനുഷ്ഠിക്കുന്ന കാസർഗോഡ് സ്വദേശി എം. ജയകൃഷ്ണൻ ഇന്ന് തലമുണ്ഡനം ചെയ്ത് പ്രതിഷേധിക്കും. മെഡിക്കൽ കോളേജ് ആശുപത്രിയിലെ തീവ്രപരിചരണ വിഭാഗത്തിൽ (ICU) പ്രവേശിപ്പിക്കപ്പെട്ട വളർമതിയെ വിദഗ്ധ ഡോക്ടർമാരുടെ പ്രത്യേക സംഘമാണ് നിരീക്ഷിക്കുന്നത്. ആവശ്യങ്ങൾ അംഗീകരിക്കാതെ ആശുപത്രിയിലും നിരാഹാരം അവസാനിപ്പിക്കില്ലെന്ന ഉറച്ച നിലപാടിലാണ് വളർമതി.
അതിനിടെ, സമരത്തിൽ മുഖ്യമന്ത്രി ഇടപെടുന്നുവെന്ന് ചൂണ്ടിക്കാട്ടി മുഖ്യമന്ത്രിയുടെ ഓഫീസിൽ നിന്നും ഇന്നലെ വളർമതിക്ക് ഫോൺ സന്ദേശം ലഭിച്ചിരുന്നു. പൊതുവിദ്യാഭ്യാസ മന്ത്രി എൻ. ഷംസുദ്ദീൻ സമരക്കാരുമായി ചർച്ച നടത്തുമെന്നായിരുന്നു അറിയിപ്പ്. എന്നാൽ ചർച്ചയുടെ സമയമോ മറ്റ് ഔദ്യോഗിക അറിയിപ്പുകളോ ഇതുവരെ ലഭ്യമായിട്ടില്ലെന്ന് സമരസമിതി വ്യക്തമാക്കുന്നു. ഇന്ന് വിദ്യാഭ്യാസ മന്ത്രി തിരുവനന്തപുരത്ത് എത്തിയാൽ ഉടൻ ചർച്ചയ്ക്ക് വഴിയൊരുങ്ങുമെന്ന പ്രതീക്ഷയിലാണ് ഉദ്യോഗാർഥികൾ. ചർച്ച നടത്തി വ്യക്തമായ തീരുമാനമുണ്ടാകുന്നത് വരെ നിരാഹാര സമരവും മറ്റ് പ്രതിഷേധ പരിപാടികളും തുടരാനാണ് സമരസമിതിയുടെ തീരുമാനം.
റാങ്ക് ലിസ്റ്റിന്റെ കാലാവധി അവസാനിക്കുന്നതിന് മുൻപ് പരമാവധി ഉദ്യോഗാർഥികൾക്ക് നിയമനം നൽകണമെന്നാണ് സമരക്കാരുടെ പ്രധാന ആവശ്യം. ഇതിനായി ഡിവിഷൻ ഫാൾ നേരിടുന്ന സർക്കാർ ലോവർ പ്രൈമറി സ്കൂളുകളിൽ അധ്യാപക-വിദ്യാർഥി അനുപാതം 1:30 എന്നതിൽ നിന്ന് 1:25 ആയി കുറയ്ക്കണമെന്നും എയ്ഡഡ് സ്കൂൾ നിയമനങ്ങൾ പിഎസ്സിക്ക് വിടണമെന്നും ഇവർ ആവശ്യപ്പെടുന്നു. കഴിഞ്ഞ ദിവസം രാത്രി സെക്രട്ടേറിയറ്റിന് മുന്നിലെ സമരപ്പന്തൽ പോലീസ് പൊളിച്ചുമാറ്റുകയും വളർമതിയെ ബലമായി ആശുപത്രിയിലേക്ക് മാറ്റുകയും ചെയ്തതോടെയാണ് സമരം പുതിയ തലത്തിലേക്ക് കടന്നത്.