Blog Post

Karanavars > News > Keralam > നന്ദകുമാറിനെ തകർക്കാൻ മാളവിക ജ്വല്ലറി ഉടമ ജയറാമിന്റെ തിരക്കഥ; ചാല കവർച്ചയിൽ വൻ ട്വിസ്റ്റ്

നന്ദകുമാറിനെ തകർക്കാൻ മാളവിക ജ്വല്ലറി ഉടമ ജയറാമിന്റെ തിരക്കഥ; ചാല കവർച്ചയിൽ വൻ ട്വിസ്റ്റ്

തലസ്ഥാനത്തെ നടുക്കിയ ചാല സ്വർണക്കവർച്ചാ കേസിൽ നിർണ്ണായക വഴിത്തിരിവായി മാളവിക ജ്വല്ലറി ഉടമ ജയറാമിനെ പോലീസ് അറസ്റ്റ് ചെയ്തു. കവർച്ചയ്ക്ക് ഇരയായ വൈഷ്ണവി ജ്വല്ലറി ഉടമ നന്ദകുമാറിന്റെ ബിസിനസ് വളർച്ചയിലുള്ള അസൂയയും വ്യാപാര കുടിപ്പകയുമാണ് കവർച്ചയ്ക്ക് പിന്നിലെന്ന് അന്വേഷണസംഘം കണ്ടെത്തി. ഇന്നലെ മണിക്കൂറുകൾ നീണ്ട ചോദ്യം ചെയ്യലിനൊടുവിലാണ് ഫോർട്ട് പോലീസ് ജയറാമിന്റെ അറസ്റ്റ് രേഖപ്പെടുത്തിയത്. കവർച്ച നടന്ന് 48 മണിക്കൂറിനകം തന്നെ മുഖ്യപ്രതികളെയെല്ലാം വലയിലാക്കാൻ പോലീസിന് സാധിച്ചു.

നന്ദകുമാറിനെ സാമ്പത്തികമായി തകർക്കുക എന്ന കൃത്യമായ ലക്ഷ്യത്തോടെ ജയറാം ആസൂത്രണം ചെയ്ത തിരക്കഥയാണ് കവർച്ചയായി മാറിയതെന്ന് പോലീസ് വ്യക്തമാക്കുന്നു. ചാലയിലെ സ്വർണ്ണ ഏജന്റായ മഹാരാഷ്ട്ര സ്വദേശി അമൂൽ, ദിലീപ് എന്നിവരുമായി ചേർന്നാണ് ജയറാം ഗൂഢാലോചന നടത്തിയത്. 25 ലക്ഷം രൂപയ്ക്കാണ് കവർച്ചാ സംഘത്തിന് ക്വട്ടേഷൻ ഉറപ്പിച്ചിരുന്നതെന്ന് പിടിയിലായ പ്രതികൾ മൊഴി നൽകിയിട്ടുണ്ട്. ദിവസങ്ങൾക്ക് മുൻപ് ജയറാം തന്നെ ഭീഷണിപ്പെടുത്തിയിരുന്നതായി നന്ദകുമാർ നൽകിയ മൊഴിയാണ് അന്വേഷണത്തിൽ നിർണ്ണായകമായത്.

തമിഴ്‌നാട് വഴി കർണാടകത്തിലേക്ക് കടക്കാൻ ശ്രമിച്ച അനിൽ, അനൂപ്, വിനോദ്, രാജീവ് എന്നിവരെ വയനാട്ടിൽ നിന്നാണ് പോലീസ് പിടികൂടിയത്. ഇവരിൽ നിന്നും ഏകദേശം 488 ഗ്രാം സ്വർണം കണ്ടെടുത്തിട്ടുണ്ട്. കേസിലെ മറ്റൊരു പ്രതിയായ ശ്രാവൺ വയനാട് കൽപ്പറ്റയിൽ കീഴടങ്ങിയിട്ടുണ്ട്. കസ്റ്റഡിയിലെടുത്ത ജയറാം ഉൾപ്പെടെയുള്ള പ്രതികളെ ഇന്ന് കോടതിയിൽ ഹാജരാക്കും. ബാക്കിയുള്ള സ്വർണം കണ്ടെത്തുന്നതിനും കൂടുതൽ പേർക്ക് സംഭവത്തിൽ പങ്കുണ്ടോയെന്നും അറിയുന്നതിനായി പോലീസ് അന്വേഷണം ഊർജ്ജിതമാക്കിയിരിക്കുകയാണ്.

Leave a comment

Your email address will not be published. Required fields are marked *