കളമശ്ശേരി റെയിൽവേ സ്റ്റേഷനിൽ അത്യാധുനിക ഇലക്ട്രോണിക് ഇന്റർലോക്കിങ് സംവിധാനവും സിഗ്നലിങ് നവീകരണവും നടക്കുന്നതിനാൽ ഇന്ന് സംസ്ഥാനത്ത് വിവിധ റെയിൽവേ സർവീസുകൾക്ക് നിയന്ത്രണം ഏർപ്പെടുത്തി. പ്രധാന സർവീസുകളായ പരശുറാം, നേത്രാവതി എക്സ്പ്രസുകൾ ഉൾപ്പെടെ എട്ടോളം ട്രെയിനുകൾ വൈകിയോടുമെന്നും ചില ട്രെയിനുകൾ ഭാഗികമായി റദ്ദാക്കിയതായും റെയിൽവേ അധികൃതർ അറിയിച്ചു.
നവീകരണ ജോലികൾ തടസ്സമില്ലാതെ പൂർത്തിയാക്കുന്നതിനാണ് റെയിൽവേ സർവീസുകളിൽ താൽക്കാലിക ക്രമീകരണം ഏർപ്പെടുത്തിയിരിക്കുന്നത്. സ്ഥിരം യാത്രക്കാരെയും ദൂരദേശങ്ങളിലേക്ക് യാത്ര ചെയ്യുന്നവരെയും ഈ സർവീസ് മാറ്റങ്ങൾ ബാധിക്കാൻ സാധ്യതയുണ്ട്.
വൈകിയോടുന്ന പ്രധാന ട്രെയിനുകൾ
ഇന്ന് സമയക്രമത്തിൽ മാറ്റം വരുത്തുകയും വൈകിയോടുകയും ചെയ്യുന്ന ട്രെയിനുകൾ താഴെ പറയുന്നവയാണ്:
- മംഗളൂരു – കന്യാകുമാരി പരശുറാം എക്സ്പ്രസ് (16649): 1 മണിക്കൂർ 15 മിനിറ്റ് വൈകും.
- തിരുവനന്തപുരം – ലോകമാന്യ തിലക് നേത്രാവതി എക്സ്പ്രസ് (16346): 1 മണിക്കൂർ 20 മിനിറ്റ് വൈകും.
- എറണാകുളം – ഹസ്രത്ത് നിസാമുദ്ദീൻ മംഗള ലക്ഷദ്വീപ് സൂപ്പർഫാസ്റ്റ് (12617): ഉച്ചയ്ക്ക് 1.25-ന് പുറപ്പെടേണ്ട ഈ ട്രെയിൻ ഒന്നര മണിക്കൂർ വൈകി വൈകീട്ട് 2.55-നേ പുറപ്പെടൂ.
- ഷാലിമാർ – തിരുവനന്തപുരം സെൻട്രൽ സൂപ്പർഫാസ്റ്റ് (22642): 50 മിനിറ്റ് വൈകും.
- ഗാന്ധിധാം – തിരുനെൽവേലി എക്സ്പ്രസ് (20924): 45 മിനിറ്റ് വൈകും.
- തിരുനെൽവേലി – ജാംനഗർ എക്സ്പ്രസ് (19577): 40 മിനിറ്റ് വൈകും.
- ദിബ്രൂഗഡ് – കന്യാകുമാരി വിവേക് എക്സ്പ്രസ് (22504): 25 മിനിറ്റ് വൈകും.
- ലോകമാന്യ തിലക് – തിരുവനന്തപുരം ഗരീബ് രഥ് എക്സ്പ്രസ് (12201): 25 മിനിറ്റ് വൈകും.
- ഗുരുവായൂർ – എറണാകുളം പാസഞ്ചർ (56317): 15 മിനിറ്റ് വൈകും.
വന്ദേഭാരത് തൃശൂരിൽ സർവീസ് അവസാനിപ്പിക്കും
ബെംഗളൂരു – എറണാകുളം വന്ദേഭാരത് എക്സ്പ്രസ് (26651) ഇന്ന് തൃശൂർ വരെ മാത്രമേ സർവീസ് നടത്തുകയുള്ളൂ. തൃശൂരിനും എറണാകുളത്തിനുമിടയിലെ സർവീസ് റദ്ദാക്കി. മടക്ക സർവീസായ എറണാകുളം – ബെംഗളൂരു വന്ദേഭാരത് (26652) വൈകീട്ട് 3.20-ന് തൃശൂരിൽ നിന്നായിരിക്കും യാത്ര ആരംഭിക്കുക.
യാത്രക്കാർ റെയിൽവേയുടെ ഔദ്യോഗിക എൻക്വയറി സംവിധാനങ്ങളിലൂടെയോ National Train Enquiry System – NTES ആപ്പ് വഴിയോ ട്രെയിനുകളുടെ തത്സമയ വിവരങ്ങൾ പരിശോധിച്ച് യാത്ര പ്ലാൻ ചെയ്യണമെന്ന് അധികൃതർ അറിയിച്ചു .
