രാജ്യതലസ്ഥാനമായ ന്യൂഡൽഹിയിൽ പന്ത്രണ്ടാമത് ബ്രെക്സ് (BRICS) പാർലമെന്ററി ഫോറത്തിന് ഇന്ന് തുടക്കമാകുന്നു. സംവിധാൻ സദന്റെ ചരിത്രപ്രസിദ്ധമായ സെൻട്രൽ ഹാളിൽ സംഘടിപ്പിക്കുന്ന രണ്ടുദിവസത്തെ ഈ ഉച്ചകോടി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ബ്രെക്സ് അംഗരാജ്യങ്ങളിൽ നിന്നും പങ്കാളിത്ത രാജ്യങ്ങളിൽ നിന്നുമുള്ള പാർലമെന്റ് അധ്യക്ഷന്മാരും നയതന്ത്ര പ്രതിനിധികളും പങ്കെടുക്കുന്ന ഈ വലിയ സമ്മേളനം ഇന്ത്യയുടെ പാർലമെന്ററി നയതന്ത്ര രംഗത്ത് പുതിയൊരു അധ്യായം കുറിക്കുകയാണെന്ന് ലോക്സഭാ സ്പീക്കർ ഓം ബിർള വ്യക്തമാക്കി.
‘ജനകേന്ദ്രീകൃത വികസനത്തിനായി പാർലമെന്റുകളെ ശാക്തീകരിക്കുക’ എന്നതാണ് ഈ വർഷത്തെ ബ്രെക്സ് ഫോറത്തിന്റെ പ്രധാന വിഷയം. സാങ്കേതികവിദ്യ, ആർട്ടിഫിഷ്യൽ ഇന്റലിജൻസ്, സുസ്ഥിര വികസനം, അന്താരാഷ്ട്ര ഭീകരവാദത്തിനെതിരെയുള്ള പോരാട്ടം തുടങ്ങിയ വിഷയങ്ങൾ സമ്മേളനത്തിൽ വിശദമായി ചർച്ച ചെയ്യും. വിദേശ രാജ്യങ്ങളിൽ നിന്നുള്ള പ്രതിനിധി സംഘങ്ങളുമായി പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തുന്നതാണ്.
ഉച്ചകോടിയുടെ ഭാഗമായി ലോക നേതാക്കളുമായി ഉഭയകക്ഷി ചർച്ചകളും സംഘടിപ്പിച്ചിട്ടുണ്ട്. ഇന്നലെ നടന്ന പ്രാഥമിക ചർച്ചകളിൽ ലോക്സഭാ സ്പീക്കർ ഓം ബിർള, റഷ്യൻ സ്റ്റേറ്റ് ഡ്യൂമ ചെയർമാൻ വ്യാചെസ്ലാവ് വോലോഡിനുമായും മറ്റ് പ്രതിനിധികളുമായും കൂടിക്കാഴ്ച നടത്തിയിരുന്നു. റഷ്യ, ക്യൂബ, ഈജിപ്ത്, ബെലാറസ് തുടങ്ങിയ 21-ലധികം രാജ്യങ്ങളിൽ നിന്നുള്ള നൂറിലധികം ജനപ്രതിനിധികളും പ്രതിനിധി സംഘങ്ങളുമാണ് ഡൽഹിയിലെത്തിച്ചേർന്നിട്ടുള്ളത്.
ഇന്നും നാളെയുമായി നടക്കുന്ന നാല് പ്രധാന സമ്മേളനങ്ങളിലൂടെ ആഗോള തലത്തിലെ പുതിയ വികസന മാതൃകകൾക്കും നയതന്ത്ര സഹകരണങ്ങൾക്കും ഫോറം രൂപം നൽകും. രാജ്യങ്ങൾ തമ്മിലുള്ള സൗഹൃദ ബന്ധവും വ്യാപാര-സാങ്കേതിക സഹകരണവും ശക്തിപ്പെടുത്താൻ ഈ ബ്രെക്സ് പാർലമെന്ററി ഫോറം വഴിയൊരുക്കുമെന്നാണ് പ്രതീക്ഷിക്കുന്നത്.
