കോൺഗ്രസ് നേതാവും എ ഐ സി സി ജനറൽ സെക്രട്ടറിയുമായ പ്രിയങ്ക ഗാന്ധിയുടെ മകനും ഫോട്ടോഗ്രാഫറുമായ റൈഹാൻ വദ്രയുടെ ഫോട്ടോഗ്രാഫി പ്രദർശനത്തിന് അധികൃതരുടെ വിലക്ക്. ഡൽഹിയിലെ ബിക്കാനീർ ഹൗസിൽ സംഘടിപ്പിച്ച ചിത്രപ്രദർശനത്തിൽ നിന്നാണ് ഡൽഹിയിൽ നടന്ന യുവാക്കളുടെയും കർഷകരുടെയും പ്രക്ഷോഭങ്ങളുമായി ബന്ധപ്പെട്ട ചിത്രങ്ങൾ അധികൃതർ നിർബന്ധപൂർവ്വം എടുത്തുമാറ്റിയത്.
ഇന്നലെ വൈകുന്നേരം പ്രദർശനം ആരംഭിക്കാൻ മണിക്കൂറുകൾ മാത്രം ബാക്കിനിൽക്കെയാണ് അധികൃതർ ചിത്രങ്ങൾ നീക്കം ചെയ്യണമെന്ന് ആവശ്യപ്പെട്ടത്. പ്രദർശിപ്പിക്കാൻ നിശ്ചയിച്ചിരുന്ന 105 ചിത്രങ്ങളിൽ 74 ഓളം ചിത്രങ്ങളാണ് അധികൃതരുടെ ഇടപെടലിനെ തുടർന്ന് മാറ്റേണ്ടി വന്നത്. പ്രതിഷേധങ്ങളുമായി ബന്ധപ്പെട്ട ദൃശ്യങ്ങൾ “ആക്ഷേപകരം” എന്ന് ചൂണ്ടിക്കാണിച്ചായിരുന്നു നടപടിയെന്ന് റൈഹാൻ വ്യക്തമാക്കി.
ദേശീയപതാക അടങ്ങിയ രണ്ട് ചിത്രങ്ങളും മാറ്റാൻ അധികൃതർ ആവശ്യപ്പെട്ടിരുന്നെങ്കിലും അതിന് താൻ തയ്യാറായില്ലെന്ന് റൈഹാൻ പറഞ്ഞു. ചിത്രങ്ങൾ നീക്കം ചെയ്തതോടെ ഗാലറിയുടെ ചുമരുകളിൽ വെറും ആണികളും ഒഴിഞ്ഞ ഇടങ്ങളും മാത്രമാണ് ശേഷിച്ചത്. സംഭവത്തിൽ കടുത്ത അമർഷവും പ്രതിഷേധവുമായി പ്രിയങ്ക ഗാന്ധിയും കോൺഗ്രസ് നേതൃത്വവും രംഗത്തെത്തിയിട്ടുണ്ട്. യുവാക്കളുടെ ശബ്ദത്തെ അടിച്ചമർത്താനാണ് സർക്കാർ ശ്രമിക്കുന്നതെന്നും രാജ്യത്ത് ജനാധിപത്യം
ഇല്ലാതായിക്കൊണ്ടിരിക്കുകയാണെന്നും പ്രിയങ്ക വിമർശിച്ചു. സാധാരണ ജനങ്ങളുടെ പ്രക്ഷോഭങ്ങളെ ദൃശ്യരൂപത്തിൽ രേഖപ്പെടുത്തുക മാത്രമാണ് റൈഹാൻ ചെയ്തതെന്നും അതിൽ രാഷ്ട്രീയപരമായ അധിക്ഷേപങ്ങൾ ഒന്നും തന്നെയില്ലെന്നും അവർ കൂട്ടിച്ചേർത്തു. പവൻ ഖേര, കാർത്തി ചിദംബരം തുടങ്ങിയ പ്രമുഖ കോൺഗ്രസ് നേതാക്കളും വൻ പ്രതിഷേധം രേഖപ്പെടുത്തി. സെൻസർഷിപ്പ് നേരിടേണ്ടി വന്നെങ്കിലും നിലവിലുള്ള ചിത്രങ്ങളുമായി പ്രദർശനം തുടരുമെന്നും, നീക്കം ചെയ്ത ചിത്രങ്ങൾ മറ്റെവിടെയെങ്കിലും പൊതുജനങ്ങൾക്ക് മുന്നിൽ എത്തിക്കാൻ ശ്രമിക്കുമെന്നും റൈഹാൻ വദ്ര അറിയിച്ചു.
