ദുബായിൽ നിന്ന് ഇസ്രയേലിലെ ടെൽ അവീവിലേക്കുള്ള യാത്രയ്ക്കിടെ ഫ്ലൈദുബായ് വിമാനത്തിന്റെ കോക്പിറ്റിൽ വെച്ച് ഇന്ത്യൻ ക്യാപ്റ്റൻ സ്മിത് മച്ചാറിനെ കുത്തിപ്പരിക്കേൽപ്പിച്ച സഹപൈലറ്റിനെ ഔദ്യോഗികമായി തിരിച്ചറിഞ്ഞു. ഒമാൻ പൗരനായ ഹമാം അൽ-ഹമ്മാമി ആണ് ഈ ഭീകരാക്രമണത്തിന് പിന്നിലെന്ന് സൗദി മാധ്യമമായ അൽ അറേബ്യ റിപ്പോർട്ട് ചെയ്തു. തീവ്രവാദ ചിന്താഗതികളും സിറിയയുമായുള്ള ബന്ധവും കാരണം ഒമാൻ ഇയാൾക്ക് പണ്ടേ വിലക്കേർപ്പെടുത്തിയിരുന്നുവെന്ന ഞെട്ടിക്കുന്ന വിവരങ്ങളാണ് ഇന്ന് പുറത്തുവരുന്നത്.
കഴിഞ്ഞ സെപ്റ്റംബർ 30-നാണ് ലോകത്തെ ഞെട്ടിച്ച ഈ സംഭവം അരങ്ങേറിയത്. ദുബായിൽ നിന്ന് 170-ലധികം യാത്രാക്കാരുമായി പുറപ്പെട്ട FZ1073 ഫ്ലൈദുബായ് വിമാനത്തിലാണ് പൈലറ്റുമാർ തമ്മിൽ സുരക്ഷാ ഭീഷണിയുണ്ടായത്. വിമാനത്തിൽ തീവ്രവാദ ആശയങ്ങൾ പ്രചരിപ്പിക്കാൻ ശ്രമിച്ച ഹമാം അൽ-ഹമ്മാമി, ക്യാപ്റ്റൻ സ്മിത് മച്ചാറിനെ ലക്ഷ്യമിട്ട് കത്തി ഉപയോഗിച്ച് ആക്രമിക്കുകയായിരുന്നു. വിമാനം തകർത്ത് വൻ ദുരന്തം വിതയ്ക്കാനായിരുന്നു പ്രതിയുടെ പദ്ധതിയെന്ന് ഇസ്രയേലി ഉദ്യോഗസ്ഥർ വ്യക്തമാക്കുന്നു.
ഗുരുതരമായി പരിക്കേറ്റിട്ടും അതിയായ ആത്മധൈര്യം കൈവിടാത്ത ക്യാപ്റ്റൻ സ്മിത് മച്ചാർ, കോക്പിറ്റ് വാതിൽ തുറന്ന് പുറത്തെത്തുകയും യാത്രക്കാരുടെയും മറ്റ് ജീവനക്കാരുടെയും സഹായത്തോടെ വിമാനം സൗദി അറേബ്യയിലെ തബൂക്കിൽ സുരക്ഷിതമായി ഇറക്കുകയുമായിരുന്നു. ആക്രമണത്തിന് പിന്നിൽ പ്രവർത്തിച്ച ഹമാം അൽ-ഹമ്മാമി മുൻപ് ഒമാൻ എയറിൽ ജോലി ചെയ്തിരുന്നയാളാണ്. എന്നാൽ തീവ്രവാദ സ്വഭാവമുള്ള ആശയങ്ങളും ബന്ധങ്ങളും ശ്രദ്ധയിൽപ്പെട്ടതിനെ തുടർന്ന് 2024-ൽ ഒമാൻ സുരക്ഷാ സേന ഇയാളെ ജോലിയിൽ നിന്ന് പുറത്താക്കുകയും വിമാനങ്ങൾ പറത്തുന്നതിൽ നിന്ന് ആജീവനാന്ത വിലക്ക് ഏർപ്പെടുത്തുകയും ചെയ്തിരുന്നു.
ജീവിതത്തിന്റെ ഏറിയ പങ്കും ഒമാന് പുറത്ത്, കൂടാതെ സിറിയയിലാണ് ഇയാൾ ചെലവഴിച്ചിട്ടുള്ളതെന്നും അവിടെവെച്ചാണ് തീവ്രചിന്താഗതികളിൽ ആകൃഷ്ടനായതെന്നും അന്വേഷണത്തിൽ വ്യക്തമായിട്ടുണ്ട്. കർശനമായ സുരക്ഷാ പരിശോധനകളെയും വിലക്കുകളെയും വെട്ടിച്ച് ഇയാൾ എങ്ങനെ ഫ്ലൈദുബായിൽ ജോലിയിൽ പ്രവേശിച്ചു എന്നത് സംബന്ധിച്ച് യു.ഇ.ഇയും മറ്റ് ഏജൻസികളും ശക്തമായ അന്വേഷണം ആരംഭിച്ചിട്ടുണ്ട്. വിമാനത്തിലെ ദുരന്തം ഒഴിവാക്കി യാത്രക്കാരുടെ ജീവൻ രക്ഷിച്ച ക്യാപ്റ്റൻ സ്മിത് മച്ചാറിന്റെ ധീരതയ്ക്ക് ലോകമെമ്പാടുമുള്ള പ്രശംസയാണ് ലഭിച്ചുകൊണ്ടിരിക്കുന്നത്. സഹപൈലറ്റിൽ നിന്ന് ഇത്തരത്തിലുള്ള സുരക്ഷാ വീഴ്ചകൾ ആവർത്തിക്കാതിരിക്കാൻ അന്താരാഷ്ട്ര വ്യോമയാന മേഖല കർശന പരിശോധനകളാണ് നിലവിൽ നടപ്പിലാക്കുന്നത്.
