കേരളത്തിലെ പൊലീസ് സംഘടനകളെ പുനഃക്രമീകരിക്കാനും പിരിച്ചുവിടാനും ലക്ഷ്യമിട്ട് സംസ്ഥാന സർക്കാർ പുറപ്പെടുവിച്ച വിവാദ ഉത്തരവ് ഇന്ന് ഹൈക്കോടതി പൂർണ്ണമായി റദ്ദാക്കി. ജസ്റ്റിസ് ബെച്ചു കുര്യൻ തോമസിന്റെ ബെഞ്ചാണ് സർക്കാരിന്റെ നീക്കം ഭരണഘടനാ വിരുദ്ധമാണെന്ന് വ്യക്തമാക്കി സുപ്രധാന വിധി പുറപ്പെടുവിച്ചത്. പൊലീസ് ഓഫീസേഴ്സ് അസോസിയേഷൻ അടക്കമുള്ള സംഘടനകൾ നൽകിയ ഹർജികൾ അംഗീകരിച്ചുകൊണ്ടാണ് ഈ ഉത്തരവ്.
സംസ്ഥാനത്തെ വിവിധ പൊലീസ് സംഘടനകളെ പുനഃക്രമീകരിച്ചു കൊണ്ട് ആഭ്യന്തര വകുപ്പാണ് നേരത്തെ ഉത്തരവിറക്കിയിരുന്നത്. നിലവിലുണ്ടായിരുന്ന മൂന്ന് പൊലീസ് സംഘടനകൾക്ക് പകരം രണ്ട് സംഘടനകൾ മാത്രം മതിയെന്നായിരുന്നു സർക്കാരിന്റെ തീരുമാനം. ഇതിന്റെ ഭാഗമായി നിലവിലെ അസോസിയേഷനുകളെ പിരിച്ചുവിടുകയും പകരം അഡ്ഹോക്ക് കമ്മിറ്റികളെ ചുമതലപ്പെടുത്തുകയും ചെയ്തിരുന്നു. എന്നാൽ ഈ നടപടി ജനാധിപത്യ രീതികൾക്കും അഭിപ്രായ സ്വാതന്ത്ര്യത്തിനും എതിരാണെന്ന് ചൂണ്ടിക്കാട്ടിയാണ് ഹൈക്കോടതിയുടെ ഇടപെടൽ.
പൊലീസ് സംഘടനകൾ രൂപീകരിക്കുന്നതിൽ മാത്രമല്ല, തടസ്സമില്ലാതെ തുടർന്നു പ്രവർത്തിക്കാനും ജീവനക്കാർക്ക് ഭരണഘടനാപരമായ അവകാശമുണ്ടെന്ന് കോടതി നിരീക്ഷിച്ചു. ജനറൽ ബോഡിയുടെ മൂന്നിൽ രണ്ട് ഭൂരിപക്ഷമില്ലാതെ ഒരു സംഘടനയെ പിരിച്ചുവിടുന്നതോ ഘടന മാറ്റുന്നതോ നിയമപരമായി നിലനിൽക്കില്ലെന്നും കോടതി വ്യക്തമാക്കി. സർക്കാർ രൂപീകരിച്ച അഡ്ഹോക്ക് കമ്മിറ്റികളുടെ പ്രവർത്തനവും കോടതി തടഞ്ഞിട്ടുണ്ട്. കോടതിയുടെ ഈ വിധി നിലവിലെ പൊലീസ് അസോസിയേഷൻ ഭാരവാഹികൾക്കും അംഗങ്ങൾക്കും വലിയ ആശ്വാസമാകുമ്പോൾ, സംസ്ഥാന സർക്കാരിന് കനത്ത തിരിച്ചടിയായിരിക്കുകയാണ്.
