കടലിൽ അപകടത്തിൽപ്പെടുന്ന മത്സ്യത്തൊഴിലാളികളുടെ ജീവൻ രക്ഷിക്കാൻ അത്യാധുനിക സംവിധാനങ്ങളുമായി കേരള സർക്കാർ രംഗത്ത്. ഇതിന്റെ ഭാഗമായി സംസ്ഥാനത്തെ ആദ്യത്തെ ഡ്രോൺ സ്റ്റേഷൻ തിരുവനന്തപുരത്തെ വിഴിഞ്ഞത്ത് സ്ഥാപിക്കാൻ തീരുമാനിച്ചു. വിഴിഞ്ഞം കടലിൽ ഡ്രോണുകൾ ഉപയോഗിച്ച് നടത്തിയ ട്രയൽ റൺ വിജയിച്ചതിനെത്തുടർന്നാണ് ഫിഷറീസ് വകുപ്പ് ഈ നിർണ്ണായക പദ്ധതിക്ക് തുടക്കം കുറിക്കുന്നത്.
കടലിൽ വെച്ച് കാണാതാകുന്നവരെയും അപകടത്തിൽപ്പെടുന്നവരെയും അതിവേഗം കണ്ടെത്താൻ സഹായിക്കുന്ന റോബോട്ടിക് ഡ്രോണുകളാണ് ഈ സ്റ്റേഷനിൽ സജ്ജമാക്കുന്നത്. കടലിനടിയിലും ഉപരിതലത്തിലും ഒരുപോലെ പ്രവർത്തിക്കാൻ ശേഷിയുള്ള സാങ്കേതികവിദ്യയാണ് ഇതിനായി ഉപയോഗിക്കുന്നത്. വിഴിഞ്ഞത്ത് വിജയകരമാകുന്ന മുറയ്ക്ക് ഈ പദ്ധതി സംസ്ഥാനത്തെ മറ്റ് തീരദേശ ജില്ലകളിലേക്കും വ്യാപിപ്പിക്കാനാണ് സർക്കാരിന്റെ ലക്ഷ്യം.
കടലിൽ സുരക്ഷാ പ്രശ്നങ്ങൾ വർദ്ധിച്ചുവരുന്ന സാഹചര്യത്തിൽ ഇത്തരം ആധുനിക സംവിധാനങ്ങൾ മത്സ്യത്തൊഴിലാളികൾക്ക് വലിയൊരു ആശ്വാസമാകും. കേന്ദ്ര-സംസ്ഥാന സർക്കാറുകളുടെ പിന്തുണയോടെ നടപ്പിലാക്കുന്ന ഈ പദ്ധതി തീരദേശ സുരക്ഷ കൂടുതൽ ശക്തമാക്കുമെന്നാണ് വിലയിരുത്തപ്പെടുന്നത്. ഇന്നലെ നടന്ന വിലയിരുത്തലുകൾക്കും ട്രയൽ റണ്ണിന്റെ വിജയത്തിനും ശേഷമാണ് പദ്ധതി യാഥാർത്ഥ്യമാക്കാനുള്ള അന്തിമ തീരുമാനത്തിലേക്ക് അധികൃതരെത്തിയത്.
