ആർട്ടിഫിഷ്യൽ ഇന്റലിജൻസ് (AI) എന്ന പേര് മാറ്റി ഇനി മുതൽ ‘സൂപ്പർ ഇന്റലിജൻസ്’ (Super Intelligence – SI) എന്ന് വിളിക്കണമെന്ന് യു.എസ് പ്രസിഡന്റ് ഡോണൾഡ് ട്രംപ്. ഇന്നലെ ന്യൂയോർക്കിൽ നടന്ന ഐക്യരാഷ്ട്രസഭയുടെ പൊതുസഭയെ (UNGA) അഭിസംബോധന ചെയ്ത് സംസാരിക്കവെയാണ് ട്രംപ് ഈ സുപ്രധാന പ്രഖ്യാപനം നടത്തിയത്.
‘ആർട്ടിഫിഷ്യൽ’ (കൃത്രിമം) എന്ന വാക്ക് ഈ സാങ്കേതികവിദ്യ വ്യാജമാണെന്ന തോന്നലാണ് ഉണ്ടാക്കുന്നതെന്നും എന്നാൽ ഇത് വ്യാജമല്ല, മറിച്ച് മനുഷ്യന്റെ ചിന്താശേഷിയെ പോലും കടത്തിവെട്ടുന്ന ഒന്നാണെന്നും ട്രംപ് വ്യക്തമാക്കി. ഇനി മുതൽ അമേരിക്കയുടെ ഔദ്യോഗിക രേഖകളിലെല്ലാം എ.ഐ എന്നതിന് പകരം എസ്.ഐ (SI) എന്ന പദം ഉപയോഗിക്കുമെന്നും അദ്ദേഹം കൂട്ടിച്ചേർത്തു.
സാങ്കേതികവിദ്യയുടെ വളർച്ചയെ ഒരു കാരണവശാലും അനാവശ്യ നിയന്ത്രണങ്ങൾ വെച്ച് തടയരുതെന്നാണ് ട്രംപിന്റെ നിലപാട്. വ്യാവസായിക വിപ്ലവത്തേക്കാൾ വലുതായിരിക്കുമെന്ന് കരുതപ്പെടുന്ന ഈ സാങ്കേതികവിദ്യയുടെ കുതിച്ചുചാട്ടത്തിന് അമേരിക്ക പൂർണ്ണ പിന്തുണ നൽകുമെന്നും, ആഗോളതലത്തിൽ ഈ രംഗത്തെ മത്സരത്തിൽ രാജ്യം നിലവിൽ ഏറെ മുന്നിലാണെന്നും ട്രംപ് അവകാശപ്പെട്ടു. മുൻപും എ.ഐ സുരക്ഷാ മുൻകരുതലുകളെയും കർശന നിയന്ത്രണങ്ങളെയും വിമർശിച്ചിട്ടുള്ള ട്രംപ്, ഈ രംഗത്തെ വളർച്ചയ്ക്ക് തടയിടാനുള്ള നീക്കങ്ങൾക്കെതിരെയാണ് ഇപ്പോൾ രംഗത്തെത്തിയിരിക്കുന്നത്.
