കോൺഗ്രസ് നേതാവ് രാഹുൽ ഗാന്ധി പങ്കെടുത്ത ‘ഛാത്രോം കി ഗൂഞ്ച്’ (Chhatron Ki Goonj) പരിപാടിക്കിടെ പ്രധാനമന്ത്രി നരേന്ദ്ര മോദിയെ അനുകരിച്ച് നാടകം അവതരിപ്പിച്ച സ്റ്റാൻഡ്-അപ്പ് കോമേഡിയൻ പുൽകിത് മണിക്ക് വ്യാപക ഭീഷണി. സംഭവത്തെ തുടർന്ന് ഉത്തർപ്രദേശിൽ നടക്കാനിരുന്ന മൂന്ന് പ്രധാന ഷോകൾ അദ്ദേഹം റദ്ദാക്കി. ഇന്നലെ സോഷ്യൽ മീഡിയയിലൂടെയാണ് പുൽകിത് മണി ഇക്കാര്യം ഔദ്യോഗികമായി അറിയിച്ചത്.
കഴിഞ്ഞ ശനിയാഴ്ച മധ്യപ്രദേശിലെ ഇൻഡോറിൽ വെച്ചാണ് സംഭവം നടന്നത്. രാഹുൽ ഗാന്ധിക്കൊപ്പം വേദി പങ്കിട്ടുകൊണ്ട് പുൽകിത് മണി പ്രധാനമന്ത്രി മോദിയുടെ ശൈലിയും വിദേശ നേതാക്കളുമായുള്ള ഇടപെടലുകളും അനുകരിച്ച് ഹാസ്യരൂപേണ അവതരിപ്പിച്ചത്. ഈ കോമഡി സ്കിറ്റിന്റെ വീഡിയോ കോൺഗ്രസ് പാർട്ടി ഔദ്യോഗിക എക്സ് (ട്വിറ്റർ) പേജിൽ പങ്കുവെച്ചിരുന്നു.
എന്നാൽ ഈ പ്രകടനത്തിനെതിരെ ഭാരതീയ ജനതാ പാർട്ടി (ബി.ജെ.പി) കടുത്ത വിമർശനവുമായി രംഗത്തെത്തി. പ്രധാനമന്ത്രിയെയും അദ്ദേഹത്തിന്റെ മാതാവിനെയും അപമാനിക്കുന്ന രീതിയിലാണ് കോൺഗ്രസ് ഇത്തരം പരിപാടികൾ സംഘടിപ്പിക്കുന്നതെന്ന് ബി.ജെ.പി നേതാക്കൾ ആരോപിച്ചു. കോൺഗ്രസ് ഒരു ‘സർക്കസ് കമ്പനിയായി’ മാറിയെന്നും രാഹുൽ ഗാന്ധിയെ ഒരു കോമേഡിയനെ പോലെയാണ് കാണുന്നതെന്നും കേന്ദ്രമന്ത്രിമാരായ പിയുഷ് ഗോയൽ, കിരൺ റിജിജു തുടങ്ങിയവർ കുറ്റപ്പെടുത്തി.
രാഷ്ട്രീയ വിവാദങ്ങൾ ശക്തമായതിന് പിന്നാലെ നോയിഡയിൽ നടക്കേണ്ടിയിരുന്ന ഷോ ‘അപ്രതീക്ഷിത സാഹചര്യങ്ങൾ’ കാരണം മാറ്റിവെക്കുന്നതായി പുൽകിത് മണി ആദ്യം അറിയിച്ചിരുന്നു. തുടർന്ന് ലക്നൗ, കാൺപൂർ എന്നിവിടങ്ങളിലെ പരിപാടികൾ ചിലരുടെ ഭാഗത്തുനിന്നുള്ള നിരന്തരമായ ഭീഷണികളെ തുടർന്നാണ് റദ്ദാക്കുന്നതെന്ന് അദ്ദേഹം വ്യക്തമാക്കി. അക്രമകാരികളായ ചിലരിൽ നിന്നും തുടർച്ചയായി ഭീഷണികൾ ഉയർന്നുവരുന്ന സാഹചര്യത്തിലാണ് ഈ തീരുമാനമെന്നും അദ്ദേഹം കൂട്ടിച്ചേർത്തു. ആവിഷ്കാര സ്വാതന്ത്ര്യവും രാഷ്ട്രീയ ആക്ഷേപഹാസ്യവും സംബന്ധിച്ച് രാജ്യത്ത് വീണ്ടും വലിയ ചർച്ചകൾക്ക് ഈ സംഭവം വഴിതുറന്നിരിക്കുകയാണ്
