ദേശീയതലത്തിൽ കൽക്കരി ക്ഷാമം തുടരുന്നതും താപവൈദ്യുത നിലയങ്ങളിലെ ഉത്പാദനം കുറഞ്ഞതും കേരളത്തിലെ വൈദ്യുതി വിതരണത്തെ ഗുരുതരമായി ബാധിച്ചിരിക്കുന്നു. സംസ്ഥാനത്ത് വൈദ്യുതി ലഭ്യതയിലുള്ള കുറവ് പരിഹരിക്കാൻ കഴിയാത്ത സാഹചര്യത്തിൽ, ഇന്ന് രാത്രിയും ആവശ്യാനുസരണം പവർകട്ടോ നിയന്ത്രണങ്ങളോ ഉണ്ടാകാൻ സാധ്യതയുണ്ടെന്ന് കേരള സംസ്ഥാന വൈദ്യുതി ബോർഡ് (KSEB) വ്യക്തമാക്കി.
സംസ്ഥാനത്ത് വൈദ്യുതി ഉപയോഗം സർവ്വകാല റെക്കോർഡിലേക്ക് ഉയർന്നതാണ് നിലവിലെ പ്രതിസന്ധിക്ക് ആക്കം കൂട്ടുന്നത്. സാധാരണ സെപ്റ്റംബർ മാസങ്ങളിൽ അനുഭവപ്പെടാറുള്ളതിനേക്കാൾ വലിയ തോതിലാണ് പീക്ക് സമയത്തെ (സന്ധ്യയ്ക്കു ശേഷമുള്ള സമയം) വൈദ്യുതി ഉപഭോഗം. ദക്ഷിണേന്ത്യൻ സംസ്ഥാനങ്ങളിലും സമാനമായ രീതിയിൽ ഉപയോഗം കൂടിയതും, ഓപ്പൺ മാർക്കറ്റിൽ നിന്നും ഉയർന്ന വില കൊടുത്ത് വൈദ്യുതി വാങ്ങുന്നതിനുള്ള ബുദ്ധിമുട്ടുകളും പ്രതിസന്ധി ആഴത്തിലാക്കുന്നു. യൂണിറ്റിന് ഉയർന്ന നിരക്ക് നൽകി വൈദ്യുതി വാങ്ങുന്നത് ഭാവിയിൽ ജനങ്ങൾക്ക് വൻ സാമ്പത്തിക ബാധ്യതയാകുമെന്നതിനാൽ അത്തരം ചില തീരുമാനങ്ങളിൽ നിന്ന് കെഎസ്ഇബി പിന്മാറിയിട്ടുണ്ട്.
കേന്ദ്ര വിഹിതമായ 1600 മെഗാവാട്ട് വൈദ്യുതി ലഭിക്കുന്നതിലും കാര്യമായ കുറവുണ്ട്. ഈ മാസം അവസാനം വരെ പ്രതിസന്ധി തുടർന്നേക്കാമെന്നാണ് വിലയിരുത്തപ്പെടുന്നത്. ഈ സാഹചര്യത്തിൽ, ഉപഭോക്താക്കൾ എല്ലാവരും സ്വയം നിയന്ത്രണം പാലിക്കണമെന്നും, പ്രത്യേകിച്ച് വൈകീട്ട് 6 മണി മുതൽ രാത്രി 12 മണിവരെയുള്ള പീക്ക് സമയങ്ങളിൽ അത്യാവശ്യമല്ലാത്ത വൈദ്യുതോപകരണങ്ങളും എസിയും പരമാവധി ഒഴിവാക്കി വൈദ്യുതി ഉപഭോഗം കുറയ്ക്കണമെന്നും കെഎസ്ഇബി ചെയർമാനും മാനേജിംഗ് ഡയറക്ടറുമായ എം.ജി. രാജമാണിക്യം ഐ.എ.എസ് അഭ്യർത്ഥിച്ചു.
