ഹോർമുസ് കടലിടുക്കിൽ വാണിജ്യ കപ്പലുകൾക്കുനേരെ ഇറാൻ നടത്തിയ ആക്രമണങ്ങൾക്ക് മറുപടിയായി അമേരിക്കൻ സൈന്യം ഇറാനിൽ ശക്തമായ വ്യോമാക്രമണം നടത്തി. ഇതോടെ, ഗൾഫ് മേഖലയിൽ വീണ്ടും യുദ്ധഭീതി പടരുകയാണ്. അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനുമായുള്ള ഇടക്കാല സമാധാന കരാർ അവസാനിച്ചതായി പ്രഖ്യാപിക്കുകയും, തുടർനടപടികൾക്ക് മുന്നറിയിപ്പ് നൽകുകയും ചെയ്തു.
അമേരിക്കൻ ആക്രമണത്തിന് മറുപടിയായി ഇറാൻ റെവല്യൂഷണറി ഗാർഡ്സ് ബഹ്റൈനിലെയും കുവൈറ്റിലെയും അമേരിക്കൻ സൈനിക താവളങ്ങൾ ലക്ഷ്യമാക്കി മിസൈൽ, ഡ്രോൺ ആക്രമണങ്ങൾ നടത്തിയതായി അവകാശപ്പെട്ടു. സംഭവത്തെത്തുടർന്ന് കുവൈറ്റ് സൈന്യം തങ്ങൾക്ക് നേരെ വന്ന ഡ്രോണുകളെയും മിസൈലുകളെയും തടഞ്ഞതായി ഔദ്യോഗികമായി അറിയിച്ചു. ബഹ്റൈനിലെ തലസ്ഥാനത്തും സൈറണുകൾ മുഴങ്ങുകയും സ്ഫോടനങ്ങൾ കേൾക്കുകയും ചെയ്തത് വലിയ ആശങ്കയുണ്ടാക്കി.
അമേരിക്കയുടെ നേതൃത്വത്തിൽ ഇറാനിലെ വ്യോമ പ്രതിരോധ സംവിധാനങ്ങൾ, മിസൈൽ സംഭരണ കേന്ദ്രങ്ങൾ, ഡ്രോൺ സൈറ്റുകൾ എന്നിവ ലക്ഷ്യമാക്കി നടത്തിയ ആക്രമണങ്ങൾ മേഖലയിലെ സൈനിക സന്തുലിതാവസ്ഥയെത്തന്നെ മാറ്റിമറിച്ചിരിക്കുകയാണ്. ഈ സംഘർഷം ആഗോള എണ്ണ വിപണിയെയും ബാധിക്കുമെന്ന ആശങ്ക ശക്തമാണ്.
മധ്യേഷ്യയിലെ ഈ പുതിയ സംഘർഷം തടയാൻ അന്താരാഷ്ട്ര തലത്തിൽ നയതന്ത്ര ഇടപെടലുകൾ നടക്കുന്നുണ്ടെങ്കിലും, ട്രംപിന്റെയും ഇറാൻ നേതൃത്വത്തിന്റെയും കടുത്ത നിലപാടുകൾ സമാധാനത്തിനുള്ള സാധ്യതകളെ മങ്ങിപ്പിക്കുന്നു. ബഹ്റൈൻ, കുവൈറ്റ്, ഖത്തർ തുടങ്ങിയ രാജ്യങ്ങൾ അതീവ ജാഗ്രതയിലാണ്. പൗരന്മാരോട് അതീവ ജാഗ്രത പാലിക്കാൻ അധികൃതർ നിർദ്ദേശിച്ചിട്ടുണ്ട്. മേഖലയിലെ സുരക്ഷാ സാഹചര്യം ഓരോ നിമിഷവും മാറിക്കൊണ്ടിരിക്കുന്നതിനാൽ, കപ്പൽഗതാഗതത്തിനും ഇന്ധന വിതരണത്തിനും തടസ്സങ്ങൾ നേരിടാൻ സാധ്യതയുണ്ടെന്ന് ഐക്യരാഷ്ട്രസഭയും മുന്നറിയിപ്പ് നൽകുന്നു.
