രാജ്യസഭാംഗമായി മല്ലികാർജുൻ ഖർഗെ വീണ്ടും സത്യപ്രതിജ്ഞ ചെയ്തു. കർണാടകയിൽ നിന്ന് രാജ്യസഭയിലേക്ക് തിരഞ്ഞെടുക്കപ്പെട്ടതിനെത്തുടർന്നാണ് അദ്ദേഹം ഔദ്യോഗികമായി വീണ്ടും ചുമതലയേറ്റത്. പാർലമെന്റ് ഹൗസിൽ വെച്ച് നടന്ന ചടങ്ങിൽ രാജ്യസഭ ചെയർമാനും ഉപരാഷ്ട്രപതിയുമായ സി.പി. രാധാകൃഷ്ണനാണ് സത്യവാചകം ചൊല്ലിക്കൊടുത്തത്.
കോൺഗ്രസ് അധ്യക്ഷനും രാജ്യസഭയിലെ പ്രതിപക്ഷ നേതാവുമായ മല്ലികാർജുൻ ഖർഗെ, ഈ പദവിയിൽ തുടരുന്നതിനെ വലിയ ഉത്തരവാദിത്തമായാണ് കാണുന്നതെന്ന് വ്യക്തമാക്കി. സത്യപ്രതിജ്ഞയ്ക്ക് ശേഷം സമൂഹമാധ്യമത്തിലൂടെ അദ്ദേഹം നന്ദിയും കടപ്പാടും അറിയിച്ചു. പാർലമെന്റിലെ ഉപരിസഭയിൽ ജനങ്ങളുടെ ശബ്ദവും ആശങ്കകളും കൂടുതൽ കരുത്തോടെ ഉയർത്തുമെന്ന് അദ്ദേഹം ഉറപ്പുനൽകി.
ചടങ്ങിൽ കോൺഗ്രസ് പാർലമെന്ററി പാർട്ടി അധ്യക്ഷ സോണിയ ഗാന്ധി, വയനാട് എം.പി പ്രിയങ്ക ഗാന്ധി, രാജ്യസഭ ഡെപ്യൂട്ടി ചെയർമാൻ ഹരിവംശ്, കേന്ദ്രമന്ത്രിമാരായ ജെ.പി നദ്ദ, കിരൺ റിജിജു തുടങ്ങിയ പ്രമുഖർ സന്നിഹിതരായിരുന്നു.
കർണാടകയിൽ നിന്ന് രാജ്യസഭയിലേക്കുള്ള തിരഞ്ഞെടുപ്പിൽ എതിരില്ലാതെയാണ് ഖർഗെ തിരഞ്ഞെടുക്കപ്പെട്ടത്. വരാനിരിക്കുന്ന പാർലമെന്റിന്റെ മൺസൂൺ സമ്മേളനത്തിൽ പ്രതിപക്ഷത്തെ ഏകോപിപ്പിച്ച് സർക്കാരിനെ കൂടുതൽ ഉത്തരവാദിത്തമുള്ളതാക്കാൻ മുൻകൈ എടുക്കുമെന്നും അദ്ദേഹം വ്യക്തമാക്കി. ദീർഘകാലത്തെ പാർലമെന്ററി അനുഭവസമ്പത്തുള്ള ഖർഗെയുടെ സാന്നിധ്യം രാജ്യസഭയിൽ പ്രതിപക്ഷത്തിന് കൂടുതൽ കരുത്തുപകരുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
