ദശകങ്ങളായി കേരളവും തമിഴ്നാടും തമ്മിൽ നിലനിൽക്കുന്ന അതിരൂക്ഷമായ തർക്കവിഷയമായ മുല്ലപ്പെരിയാർ അണക്കെട്ടിന്റെ കാര്യത്തിൽ വീണ്ടും കടുത്ത നിലപാടുമായി തമിഴ്നാട് സർക്കാർ. തമിഴ്നാട്ടിൽ പുതുതായി അധികാരമേറ്റ സി. ജോസഫ് വിജയ് നേതൃത്വത്തിലുള്ള സർക്കാരിന്റെ ആദ്യ നയപ്രഖ്യാപന പ്രസംഗത്തിലാണ്, മുല്ലപ്പെരിയാറിൽ പുതിയ ഡാം നിർമിക്കാനുള്ള കേരളത്തിന്റെ നീക്കങ്ങളെ ഒരു കാരണവശാലും അനുവദിക്കില്ലെന്ന് ഗവർണർ രാജേന്ദ്ര വിശ്വനാഥ് അർലേക്കർ വ്യക്തമാക്കിയത്.
കേരളത്തിലെ വി. ഡി. സതീശൻ സർക്കാർ മുല്ലപ്പെരിയാർ വിഷയത്തിൽ ഉഭയകക്ഷി ചർച്ചകൾക്കായുള്ള നീക്കങ്ങൾ സജീവമാക്കിയിരിക്കുന്നതിനിടയിലാണ് തമിഴ്നാടിന്റെ ഭാഗത്തുനിന്നുണ്ടായ ഈ നിർണായക പ്രഖ്യാപനം. പുതിയ ഡാം നിർമിക്കാനുള്ള കേരളത്തിന്റെ നിരന്തരമായ ശ്രമങ്ങളെ നിയമപരമായും രാഷ്ട്രീയമായും ശക്തമായി പ്രതിരോധിക്കുമെന്ന് സർക്കാർ പ്രഖ്യാപിച്ചു. നിലവിലെ ഡാമിന്റെ സുരക്ഷ ഉറപ്പാക്കി ജലനിരപ്പ് 152 അടിയായി ഉയർത്താനുള്ള സുപ്രീം കോടതി ഉത്തരവുകൾ നടപ്പിലാക്കുമെന്നും നയപ്രഖ്യാപനത്തിൽ സർക്കാർ ആവർത്തിക്കുന്നു.
തർക്കത്തിന്റെ പശ്ചാത്തലം
1895-ൽ നിർമിച്ച മുല്ലപ്പെരിയാർ അണക്കെട്ടിന്റെ സുരക്ഷയെച്ചൊല്ലി കേരളം വലിയ ആശങ്കയിലാണ്. ഡാമിന്റെ ബലക്ഷയവും ഭൗമശാസ്ത്രപരമായ സാധ്യതകളും ചൂണ്ടിക്കാട്ടി, പുതിയ അണക്കെട്ട് നിർമിക്കുക എന്നത് കേരളത്തിന്റെ ദീർഘകാല ആവശ്യമാണ്. എന്നാൽ, ഡാം പൂർണമായും സുരക്ഷിതമാണെന്നും പുതിയ നിർമാണ പ്രവർത്തനങ്ങൾ തങ്ങളുടെ ജലലഭ്യതയെ ബാധിക്കുമെന്നുമാണ് തമിഴ്നാടിന്റെ നിലപാട്. ഈ വിഷയത്തിൽ ഇരു സംസ്ഥാനങ്ങളും തമ്മിലുള്ള അന്തർസംസ്ഥാന തർക്കം വർഷങ്ങളായി കോടതിയുടെയും വിദഗ്ധ സമിതികളുടെയും പരിഗണനയിലാണ്.
പ്രതിസന്ധി രൂക്ഷമാകുന്നു
കേരളം പുതിയ ഡാം എന്ന ആവശ്യവുമായി മുന്നോട്ടുപോകുമ്പോൾ, അതിനെ പൂർണ്ണമായും തള്ളിക്കളയുന്ന സമീപനമാണ് തമിഴ്നാട് സർക്കാർ സ്വീകരിച്ചിരിക്കുന്നത്. പുതിയ സർക്കാരിന്റെ ഈ നയപ്രഖ്യാപനം കേരളത്തിന്റെ രാഷ്ട്രീയ, ഭരണതലത്തിലുള്ള പ്രതീക്ഷകൾക്ക് കനത്ത തിരിച്ചടിയായിരിക്കുകയാണ്. അന്തർസംസ്ഥാന ചർച്ചകളിലൂടെ പ്രശ്നപരിഹാരം കാണാമെന്ന കേരളത്തിന്റെ ആഗ്രഹത്തിന് മേലാണ് തമിഴ്നാട് ഇപ്പോൾ തണുത്ത വെള്ളം കോരി ഒഴിച്ചിരിക്കുന്നത്.
ഇതിനോടൊപ്പം തന്നെ കർണാടകയിലെ മേക്കേദാട്ടു അണക്കെട്ട് നിർമാണത്തെയും തമിഴ്നാട് നയപ്രഖ്യാപനത്തിൽ ശക്തമായി എതിർത്തിട്ടുണ്ട്. കാവേരി നദീജല വിഷയത്തിലും പുതിയ ഡാം നിർമാണത്തെ നിയമപരമായി നേരിടുമെന്ന് സർക്കാർ വ്യക്തമാക്കിയിട്ടുണ്ട്.
മുല്ലപ്പെരിയാർ വിഷയത്തിൽ തമിഴ്നാട് സർക്കാർ സ്വീകരിച്ചിരിക്കുന്ന ഈ കടുത്ത നിലപാട്, വരും ദിവസങ്ങളിൽ ഇരു സംസ്ഥാനങ്ങളും തമ്മിലുള്ള ബന്ധത്തിൽ കൂടുതൽ ഉരസലുകൾക്ക് വഴിവെക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. വിഷയത്തിൽ കേരള സർക്കാർ തുടർന്ന് എന്ത് നിലപാട് സ്വീകരിക്കും എന്നതാണ് ഇനി നിർണായകമാകുക.
