ഐഎസ്എൽ ആരാധകരെ ആവേശത്തിലാഴ്ത്തി കേരള ബ്ലാസ്റ്റേഴ്സ് എഫ്.സിയുടെ ഉടമസ്ഥാവകാശത്തിൽ നിർണായക മാറ്റം. ക്ലബ്ബിന്റെ സമ്പൂർണ്ണ ഓഹരികളും യുഎഇ ആസ്ഥാനമായുള്ള അൽ ഫുർസാൻ (Al Fursan) സ്പോർട്സ് ഇൻവെസ്റ്റ്മെന്റ് ഗ്രൂപ്പ് ഏറ്റെടുത്തു. ഇതുസംബന്ധിച്ച അന്തിമ കരാറിൽ ഇന്നലെ മാഗ്നം ഗ്രൂപ്പുമായി പുതിയ ഉടമകൾ ഒപ്പുവെച്ചു. എന്നാൽ ടീമിന്റെ ഭാവിയെക്കുറിച്ചോറോർത്ത് ആരാധകർ ആശങ്കപ്പെടേണ്ടതില്ലെന്നും, ക്ലബ്ബിന്റെ ദൈനംദിന പ്രവർത്തനങ്ങളും കൊച്ചിയിലെ ഹോം മത്സരങ്ങളും യാതൊരു മുടക്കവുമില്ലാതെ തുടരുമെന്നും മാനേജ്മെന്റ് വ്യക്തമാക്കി.
വരുന്ന എട്ട് മാസത്തിനുള്ളിൽ വിവിധ ഘട്ടങ്ങളിലായാണ് 100 ശതമാനം ഓഹരികളുടെയും കൈമാറ്റം പൂർത്തിയാകുക. 2026–27 സീസണിന്റെ അവസാനത്തോടുകൂടി പുതിയ മാനേജ്മെന്റ് ക്ലബ്ബിന്റെ പൂർണ്ണ നിയന്ത്രണം ഔദ്യോഗികമായി ഏറ്റെടുക്കും. ഷെയ്ഖ് അഹമ്മദ് ബിൻ ഫൈസൽ അൽ ഖാസിമിയുടെ നേതൃത്വത്തിലുള്ള കൺസോർഷ്യമാണ് ബ്ലാസ്റ്റേഴ്സിനെ ഏറ്റെടുത്തിരിക്കുന്നത്. ക്ലബ്ബിനെ ആഗോളതലത്തിലുള്ള വലിയൊരു ഫുട്ബോൾ ബ്രാൻഡാക്കി വളർത്തുക എന്നതാണ് പുതിയ ഉടമകളുടെ പ്രധാന ലക്ഷ്യം. ഇതിന്റെ ഭാഗമായി സ്വന്തമായി അന്താരാഷ്ട്ര നിലവാരമുള്ള സ്റ്റേഡിയം നിർമ്മിക്കുന്നതുൾപ്പെടെയുള്ള ദീർഘകാല പദ്ധതികൾ അണിയറയിൽ ഒരുങ്ങുന്നുണ്ട്.
മാറ്റങ്ങൾക്കിടയിലും ടീമിന്റെ പരിശീലകനായി പ്രമുഖ കോച്ച് ആഷ്ലി വെസ്റ്റ്വുഡ് തന്നെ തുടരുമെന്നത് ആരാധകർക്ക് ആശ്വാസകരമാണ്. കൂടാതെ ആരാധകരുടെ പ്രിയപ്പെട്ട താരം അഡ്രിയാൻ ലൂണ ടീമിൽ തുടരുമെന്നും അധികൃതർ അറിയിച്ചിട്ടുണ്ട്. പുതിയ സീസണിനായുള്ള പ്രീ-സീസൺ പരിശീലന ക്യാമ്പുകൾ ആരംഭിച്ചു കഴിഞ്ഞു. ഒക്ടോബർ 11-ന് ഇന്റർ കാശിക്കെതിരെയാണ് ബ്ലാസ്റ്റേഴ്സിന്റെ പുതിയ സീസണിലെ ആദ്യ മത്സരം. ടീമിനെ കൂടുതൽ കരുത്തുറ്റതാക്കാൻ പ്രമുഖ കളിക്കാരെ ഉടൻതന്നെ ടീമിലെത്തിക്കുമെന്നും പുതിയ മാനേജ്മെന്റ് വ്യക്തമാക്കിയിട്ടുണ്ട്. ക്ലബ്ബിന്റെ അഡ്മിനിസ്ട്രേറ്റീവ് പ്രവർത്തനങ്ങൾക്കായി ‘ഓഫിയോ സ്പോർട്ടിനെ’ ഓപ്പറേഷണൽ പങ്കാളിയായും നിയമിച്ചിട്ടുണ്ട്. കേരളത്തിലെ ഫുട്ബോൾ പ്രേമികൾക്ക് പുത്തൻ പ്രതീക്ഷകളും വലിയൊരു വളർച്ചയും സമ്മാനിക്കുന്നതായിരിക്കും പുതിയ ഉടമകളുടെ വരവെന്നാണ് വിലയിരുത്തപ്പെടുന്നത്.
