അയോധ്യ ശ്രീരാമജന്മഭൂമി തീർത്ഥ് ക്ഷേത്ര ട്രസ്റ്റിന്റെ ആദ്യ ചീഫ് എക്സിക്യൂട്ടീവ് ഓഫീസറായി (സിഇഒ) റിട്ടയേർഡ് എയർമാർഷൽ ജിതേന്ദ്ര മിശ്രയെ ഔദ്യോഗികമായി നിയമിച്ചു. ഇന്ന് നടന്ന സുപ്രധാന തീരുമാനത്തിലൂടെയാണ് അയോധ്യ ക്ഷേത്രത്തിന്റെയും ട്രസ്റ്റിന്റെയും ഭരണപരമായ ചുമതലകൾ കൂടുതൽ കാര്യക്ഷമമാക്കാൻ ഒരു മുതിർന്ന സൈനിക ഉദ്യോഗസ്ഥനെ നിയോഗിച്ചിരിക്കുന്നത്.
രാജ്യത്തുടനീളമുള്ള അയ്യായിരത്തിലധികം അപേക്ഷകരിൽ നിന്നാണ് ജിതേന്ദ്ര മിശ്രയെ ഈ ഉയർന്ന പദവിയിലേക്ക് തിരഞ്ഞെടുത്തിരിക്കുന്നത്. ക്ഷേത്ര നിർമ്മാണ പ്രവർത്തനങ്ങളും ദർശനത്തിനായി എത്തുന്ന ലക്ഷക്കണക്കിന് തീർത്ഥാടകരുടെ തിരക്കും സുഗമമായി കൈകാര്യം ചെയ്യുന്നതിനാണ് ട്രസ്റ്റ് ഒരു മുഴുവൻ സമയ സിഇഒ പദവി രൂപീകരിച്ചിട്ടുള്ളത്.
വ്യോമസേനയിൽ ദീർഘകാലം സേവനമനുഷ്ഠിച്ച ജിതേന്ദ്ര മിശ്ര, വെസ്റ്റേൺ എയർ കമാൻഡ് മേധാവി ഉൾപ്പെടെയുള്ള നിർണായക പദവികൾ വഹിച്ചിട്ടുള്ള പ്രഗത്ഭനായ ഉദ്യോഗസ്ഥനാണ്. കാർഗിൽ യുദ്ധകാലത്ത് മിറേജ് 2000 വിമാനങ്ങളിൽ ലേസർ നിയന്ത്രിത ബോംബുകൾ ഉപയോഗിക്കുന്നതിൽ നിർണായക പങ്കുവഹിച്ച ചരിത്രവും അദ്ദേഹത്തിനുണ്ട്. സൈന്യത്തിലെ അച്ചടക്കവും നേതൃപാടവവും മുൻനിർത്തിയാണ് ട്രസ്റ്റ് അദ്ദേഹത്തെ ഈ ദൗത്യത്തിനായി തെരഞ്ഞെടുത്തത്.
അയോധ്യ രാമക്ഷേത്രത്തിന്റെ സുഗമമായ നടത്തിപ്പിനും ഭാവി വികസന പ്രവർത്തനങ്ങൾക്കും ഈ നിയമനം മുതൽക്കൂട്ടാകുമെന്നാണ് ട്രസ്റ്റിന്റെ വിലയിരുത്തൽ. ലക്ഷക്കണക്കിന് ഭക്തർ എത്തിച്ചേരുന്ന അയോധ്യയിൽ ഭരണപരമായ കാര്യങ്ങൾ കൂടുതൽ ചിട്ടയോടെ മുന്നോട്ട് കൊണ്ടുപോകാൻ അദ്ദേഹത്തിന്റെ സാന്നിധ്യം സഹായിക്കുമെന്നാണ് പ്രതീക്ഷിക്കുന്നത്.
