സേനയ്ക്കുള്ളിൽ തന്നെ ഞെട്ടലുണ്ടാക്കി സഹപ്രവർത്തകരായ റിക്രൂട്ട് ട്രെയിനികളിൽ നിന്ന് ലക്ഷക്കണക്കിന് രൂപ തട്ടിയെടുത്ത പൊലീസുകാരനെതിരെ ഇന്ന് ഔദ്യോഗികമായി കേസ് രജിസ്റ്റർ ചെയ്തു. കെഎപി (KAP) മൂന്നാം ബറ്റാലിയനിലെ സിവിൽ പൊലീസ് ഓഫീസറായ ശംഭു ആർ. കൃഷ്ണക്കെതിരെയാണ് പേരൂർക്കട പൊലീസ് കേസെടുത്തിരിക്കുന്നത്. യൂണിഫോം കമ്മിറ്റി അംഗത്തിന്റെ വിശ്വാസ്യത മുതലെടുത്താണ് പ്രതി ഈ വലിയ തട്ടിപ്പ് നടത്തിയത്.
യൂണിഫോം കമ്മിറ്റിയിൽ അംഗമായിരുന്ന ശംഭു ആർ. കൃഷ്ണ, പരിശീലനം പൂർത്തിയാക്കുന്ന പുതിയ പൊലീസ് റിക്രൂട്ട് ട്രെയിനികളിൽ നിന്ന് യൂണിഫോം തയ്യുന്നതിനും മറ്റുമായി വലിയ തുക ശേഖരിച്ചിരുന്നു. എന്നാൽ ഈ പണം യഥാസമയം ബന്ധപ്പെട്ട ആവശ്യങ്ങൾക്ക് വിനിയോഗിക്കുന്നതിന് പകരം സ്വന്തം ആവശ്യങ്ങൾക്കായി ഉപയോഗിക്കുകയാണുണ്ടായത്.
കഴിഞ്ഞ ജൂലൈ 3 മുതൽ 13 വരെയുള്ള ദിവസങ്ങളിലാണ് നിരവധി റിക്രൂട്ട് ട്രെയിനികളിൽ നിന്ന് പണം പ്രതിയുടെ വ്യക്തിഗത ഫോൺ നമ്പറിലേക്ക് ഓൺലൈൻ വഴിയായി ട്രാൻസ്ഫർ ചെയ്യിപ്പിച്ചത്. ഏകദേശം 7 ലക്ഷത്തോളം രൂപയാണ് ഇത്തരത്തിൽ പലരിൽ നിന്നായി ഇയാൾ തട്ടിയെടുത്തത്.
ഓൺലൈൻ ചീട്ടുകളിയിൽ മുങ്ങിയ പണം:
സഹപ്രവർത്തകരിൽ നിന്ന് കൈക്കലാക്കിയ ലക്ഷക്കണക്കിന് രൂപയും ശംഭു ഓൺലൈൻ ബെറ്റിംഗിലൂടെയും ഓൺലൈൻ ചീട്ടുകളിയിലൂടെയും ധൂർത്തടിച്ച് കളഞ്ഞതായി എഫ്ഐആറിൽ വ്യക്തമാക്കുന്നു. ആർത്തി മൂത്ത് ചൂതാട്ടത്തിന് അടിമയായതോടെയാണ് പ്രതി പണം മുഴുവൻ നഷ്ടപ്പെടുത്തിയത്.
ട്രെയിനികൾ പലതവണ യൂണിഫോമിനെക്കുറിച്ചും പണത്തെക്കുറിച്ചും ചോദിച്ചപ്പോൾ ഇയാൾ ഒഴിഞ്ഞുമാറുകയായിരുന്നു. തുടർന്ന് നടത്തിയ അന്വേഷണത്തിലാണ് തട്ടിപ്പിന്റെ വ്യാപ്തി പുറത്തുവന്നത്. സംഭവത്തിൽ പേരൂർക്കട പൊലീസ് വിശദമായ അന്വേഷണം ആരംഭിച്ചിട്ടുണ്ട്. സേനയുടെ പേരുചെടിക്കുന്ന ഇത്തരം പ്രവൃത്തികൾക്കെതിരെ കർശന വകുപ്പുകൾ ചുമത്തിയാണ് കേസ് മുന്നോട്ട് കൊണ്ടുപോകുന്നത്.
